Daniel (dc) 1
1
Daniel iñeïru reta ndive Babilonia pe
1Joacim mboapɨa año ma oiko Judá pe mburuvicha guasurä yave, Nabucodonosor mburuvicha guasu Babilonia pegua ou isundaro reta ndive jare opa oñova tëta guasu Jerusalén.#2 R 24.1; 2 Cr 36.5-7. 2Jare yandeYa omee ipo pe, Joacim mburuvicha guasu Judá pegua, jare jeta tembiporu reta Tumpa jo pegua; jare güeru ɨvɨ Sinar#1.2 Sinar, jae ko: Babilonia. pe, itumpa jo pe, jare oñono tembiporu reta, mbaembae jepɨ yae vae oñeñovatúa pe, itumpa jo pe. 3Jare mburuvicha guasu jei Aspenaz pe, jembiokuai eunuco#1.3 Emae Glosario pe. reta juvicha pe, güeru vaerä Israel iñemuña reta güi amogüe mburuvicha iñemuña reta, 4kunumi reta jete kavi vae, kunumi kavi, opaete arakuaa reta re oyemboe vae, opaete yemboe reta pe iyarakuaa katu vae, ikavi yae oyeokuai reta vaerä mburuvicha guasu jo pe vae. Jare oyókuai vi omboe vaerä Caldeaɨgua reta iñee jare iyemboe reta re.#2 R 20.17-18; 24.10-16; 2 Cr 36.10; Is 39.7-8. 5Jare mburuvicha guasu jei oñemee vaerä tembíu chupe reta ara ñavo, jae jembiurä vae güi, jare vino jae jou vae güi; jare omboe vaerä mboapɨ año rupi, jökorai mboapɨ año oasa ma yave yogüeru vaerä mburuvicha guasu pe oyeokuai reta.
Daniel iñeïru reta ndive mburuvicha guasu jo pe
6Kuae reta ipɨte pe ñogüɨnoi Daniel, Ananías, Misael jare Azarías; jae ko Judá iñemuña pegua reta. 7Kuae reta, eunuco reta juvicha ombojee körai: Daniel ombojee Beltsasar, Ananías ombojee Sadrac, Misael ombojee Mesac jare Azarías ombojee Abed-nego. 8Ërei Daniel oñono ipɨa pe agüɨye vaerä oyemongɨa Tumpa jóvai jókuae tembíu mburuvicha guasu jembíu güi oyeekɨ vae pe jare vino jae jou vae pe; jáeramo oiporu eunuco reta juvicha pe agüɨye vaerä omoñera etei jou vaerä. 9Jare Tumpa ombopɨakavi eunuco reta juvicha Daniel kotɨ; 10jare eunuco reta juvicha jei Daniel pe:
—Akɨɨye cheruvicha guasu güi, echa jae omeeuka perembiurä jare peɨu vaerä; ërei jae oecha perova iyu yae jókuae ïru taɨrusu vae reta güi yave, pereko pegua mburuvicha guasu cheyukata ko.
11Jayave Daniel jei Melsar pe, jae ko eunuco reta juvicha oñono oyangareko vaerä Daniel, Ananías, Misael jare Azarías re vae:
12—Romoñera oremboaporova vaerä payandepo ara rupi, emee torou tembíu isoombaeño jare ɨño. 13Javoi emboyovake kuri orerova ïru kunumi reta jova ndive, jókuae mburuvicha guasu jembíu güi jou vae reta, jaɨkue rupi eyapo oreve nde reikuaa rupi.
14Jare ikɨ̈reɨ chupe reta jókuae re; omboaporova jae reta ndive payandepo ara rupi. 15Jare payandepo araa pe, oyekuaa kuae kunumi reta jova ikavi yae jare oikove katu yae ïru kunumi reta okaru mburuvicha guasu jembíu güi vae reta güi. 16Jökorai, Melsar güɨraja iyeupe tembíu jare vino jae reta jouta tëi vae, jare omee jou reta tembíu isoombaeño.
17Jökorai kuae irundɨ kunumi reta pe Tumpa omee jeta mbae oikuaa reta vaerä jare iyarakuaa katu yae reta vaerä opaete yemboe reta rupi; jare Daniel oikuaa katu opaete mbaɨu reta regua jare Tumpa mbae oechauka vae rupi. 18Oasa ma ara reta yave, eunuco juvicha güeru mburuvicha guasu Nabucodonosor jóvai, jae oyókuai jese rami. 19Jare mburuvicha guasu imiari jae reta ndive, jare oecha mbaetɨ ye oñeväe ïru vae reta ipɨte pe Daniel, Ananías, Misael jare Azarías rami vae; jökorai opɨta reta mburuvicha guasu pe oyeokuai reta vaerä. 20Opaete yemboe arakuaa pegua re mburuvicha guasu oparandu chupe reta vae pe iyarakuaa katu yae reta, oyapɨraa ye payandepo pe opaete ichoropa vae reta jare yasɨ pɨau re jare yasɨtata re güɨrovia vae reta, opaete iporookuaía pe yogüɨreko vae reta. 21Jare Daniel oiko joko pe Ciro oike tenondegua año mburuvicha guasurä yave regua.#Esd 1.1.
موجودہ انتخاب:
Daniel (dc) 1: GUABD
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Biblia DC Guaraní Bolivia © Bolivian Bible Society, 2001.