Lomɛ́ŋ 9
9
Támbák mayɔ́ɔ́n nisíp ni Isilayɛ́ɛl
1Ánipílát niámɛ́ ne Kilíis, epú yɔɔyɔnɛ́ nyɛ kémuémue, indipá imbúle. Ɔtɛ́m wáámɛ́ átápukanɛn ké Emfúnukufúúmɛ wɔ́ iŋɔyɔn ɛ́ɛ́ yɔɔ́kɔyɔ kémuémue: 2kémuémue ukáánɛ́ unyɛ́ ɛ́ɛ́: insíkíl yi iŋɔ́n inyɛ́ káámɛ kɔ ɔtɛ́m, nɛ kutɛ́ɛ́ kú tiányípá kúyɔtɔn. 3Yaákaamba ɛ́ɛ́ insɛ́ɛ iŋúɛ Támbák ínyɔm, wúŋátɔn ne Kilíis ó pusíó pú peseé u paandimán páámɛ inyɛɛ́ pesí pɔɔkúnɛ́ pómoómí nɔɔpɔ́, 4pɔ́ pɛ́nyɛɛ́ paán pí Ísilayɛ́ɛl, paán pɛ́ ɛ́ɛn pá Támbák, wetíínyi pɔ́ nuúmu núɛ́yɛ́, waanyá nikál nɔɔpɔ́, weeki pɔ́ kikotí, na aná pɛ́ɛsikɛnɛnɛ́ kukɔtɔ é kukúmesi wɔ, ni indan; 5pɔ pɛ́nyɛɛ́ níindaanda pesí pɔɔkúnɛ́ píinsúá pɛ́mɛndɛ́ na Támbák. Kɔ́ɔ́p ɛ́ kikɛtɛ́kɛtɛ́ɛ Kilíis ólinoné á numɔɔndɛ. Kilíise unyɛɛ́ anyálí kɛ́ ɛtɔ ú puandá kitikit; wɔ́ unyɛɛ́ Támbákɛ́ɛ wɛɛsikɛnɛnɛ́ ɛ́ɛ́ pékúmesi wɔ́ teeníík ne níík. Anakáánɛ́. 6Pútipá pútíínyenyi kɔk ɛ́ɛ́ mekélíe má Támbák meepi: púnyɛɛ́ ɛ́ɛ́ epé kitikit pɛnyɛ́ kɔ́ ɔlɔŋ ú niindaanda ní Isilayɛ́ɛl tipá pɔ́ɔ́pɔnɛn nikúli ní Ísilayɛ́ɛl ní kémuémue; 7andíkɛ́k, epé pɛ́nyɛɛ́ á niindaanda ní Ápilaháam, peem tipá paán pɛ́ɛ́yɛ́ pé kémuémue. Á kiákí ɛ́ɛ́ Támbák mɛɛlɛ́ ká Ápilaham ɛ́ɛ́: «niindaanda ímányikufá indan á nɛ́ kokuólin kí Isáák.» 8Anakáánɛ kunyɛ́ ɛ́ɛ́: pátipá paán póólinoné á nipɛ́t ni mɔɔnd na akáandɔ́ kɔ́ɔ́m pɛ́nyɛɛ́ pá Támbák, epé póólinoné kí indan í Támbák pééŋény póyoosoné pɔ asɛ niindaanda ní kémuémue. 9Á kiákí ɛ́ɛ́ Támbák meekí indan, wɔ́ ɛ́ɛ́: «ɛ́ kiɛ́tɛ kisikɛl ekie, yɔɔŋ yóóloné, yoónyóond, Salá kapá umámaná epíén kinɔ́k.» 10Pútipá pukáánɛ́ púéŋény; Lepéka nyɛ kɛ́kɛ́ɛ́yɛ́ pulinsí. Wɔkɔ́l niim ní nipɛ́ɛ́sɛ á nipɛt nɛy ne sí waasɔ́ Isáakɛ wúéŋény; 11Nááne kɔkɛɛ́ paán pakáánɛ́ mapá pámanyi pétipípíén, pamanyi pɛ́tiɛlɛ́ tɛ peseé tɛ kilɔk. Maná ɛ́ɛ́ kilɔŋɛ́t kí Támbák píwóónyi, kilɔ́ɔ́ŋɛ́t kíyúúnanɛ́ɛ é weéŋeli 12kitiányípá kíyoonson melíe, maná púoyooson Támbákɛ́ɛ upílanɛ́, pɔɔyitɛn wɔ́ ɛ́ɛ́: Wɔɔkɔ́n ɔ́ɔ́nyíkɔtɔn weekétí, 13yá aná púnyɛɛ puɔ́ŋɔ́n, yɔɔ́yɛ́t Yákɔpɛ yoondo yɛɛfɛm Esayu. 14Kiáki kɔk kí kuɔyɛt? Támbák tipá indɛ́ndɛ́nɛ á? Aákóo unyɛ indɛ́ndɛ́nɛ. 15Kɔ́ɔk wɔkɔɔyɔn Moyííse: Yaányípá iŋɔnɔkɔn nɔ sɔk yaambanɛ́ ɛ́ɛ́ ímbá iŋɔnɔkɔn, yoondo yɛɛ́n ɔsɔk ewú yaambanɛ́ ɛ́ɛ́ yɛ́ɛ́n ɔsɔk. 16Putipá kɔk púólinon ɔ́ kilɔ́ɔ́ŋɛ́t tɛ á pukaaka pú mɔɔnd, maná ɛ́ niɛ́n ɔsúkɛ ní Támbák. 17Yá aná ɔnfíɔ́ŋ ɔ́ɔ́yɔɔnɛ Támbák matíán Efuŋ u kitɔŋ kí isipit: Imakuyɔ́ɔ́n imbána imbána ɛ́ɛ́ índíínyi kááwɔ pukaaka púámɛ, andíkɛ́k ɛ́ɛ́ kisiɛ́n kíámɛ pípéke e kúúsí kitikit. 18Akáánɛ́ kɔk wɛɛ́kɛɛ́nɛn ɔsɔk ewú wɔɔyɔɔnɛ́ɛ woondo ulúndesi ɔtɛ́m é wúúwú wɔɔyɔɔnɛ́ɛ.
Weéŋelí u Támbák
19Maná kɔk, akaand kundíán ɛ́ɛ́, kiákí Támbák áandɛɛ́ kuánsa? Ɛ́nyɛ́ɛ unyɛɛ́ kutímbimit kɛ́ɛ́yɛ́ ɔ́ kilɔ́ɔ́ŋɛ́t? 20Mɔɔnd, aŋɔ́ kɔk ɛnyɛɛ́ ɛ́nyɛ, ɛ́ɛ́ épekenyipekenyi na Támbák? Nima tipá kutían emenímusényí ɛ́ɛ́: kiákí ɛ́mɛ́nyiŋɛlɛ́ anɛ? 21Emenímusényí tipá ɔkɔ́n u nima níɛ́yɛ́ ɛ́ kuɛlɛ, na nima niɛ́tɛ, wɛɛl isényí á masɔ́m mɔɔkɔ́n, musényí múlotí á masɔ́m mánananɛ́ á? 22Índɛ kɔk Támbákɛ́ɛ, aká waambanɛ́ útíínyi ilópi yɛ́ɛ́yɛ́ wóondo útíínyi pukaaka púɛ́yɛ́, wepílimbit ne kuésepenyi puólíkóoli, musényí múɛ́yɛ́ woónyóotine mú ilópi é punyím, 23púkáánɛ́ kɔk ɛ́ɛ́ nútíínyi punɛ́m pú nukanyi é musényí mú niɛ́n ɔsúkɛ, kisíósíó umɛɛ́yɛ́n á nukanyi, 24pasɔ́ tunyɛɛ́ pɛ́ɛ́yɛ́ umaápílíkɛn kútipá kɔ́ɔ́m ɛ́ kikɛtɛ́kɛtɛ́ɛ kí Pɛyúútɛn, maná andíkɛ́k ɛ́ kikɛtɛ́kɛtɛ́ɛ kí piɛ́nɛɛ́n pílotí. 25Púnyɛ yá anɛ wɔɔyɔɔnɛ́ kɔ́ ɔmbɔp ú Osé: Ewú umɛɛ́lɛ́ utiɛlɛ́ é nikúli níámɛ, yaányípílikɛn wɔ́ ɛ́ nikúli níámɛ, ewú umɛɛ́lɛ́ utiɛlɛ́ iŋɔyɔ yaamɛ, yaányípílikɛn wɔ́ ɛ́ɛ́ iŋɔyɔ yaamɛ; 26Kɔ́ɔ́m pámatíán pɔ́ kɔk ɛ́ɛ́: Nutipá nikúli níámɛ, pányípílan pɔ́ ɛ́ɛ́ pinɔ́k pí Támbákɛ́ɛ wɔɔkɔ́si. 27Isayí ɛ́ kíɛ́yɛ́ kiáyí mɔɔyɛ́t ó pusíó pú Isilaɛl: Tɛ púpá ɛ́ɛ́ paán pi Isilaɛl nyɛ kutek ɛlɛɛ́ ɛnsɛ́lɛk ú mááŋ, pisíénesíéne póónyísótosíe; 28Á kiákí Ɔkɔ́n ónyíwóónyi nukál núɛ́yɛ́ kitikiteékítíkíte e kúúsí pɛkɛtɛpɛkɛt. 29Púnyɛ andíkɛ́k epú Isayí mɔɔ́yɛ́t kisíósíó: Índɛ Ɔkɔ́n u petííti ú ɔlɔŋ ú mɛnɛ́mɛnɛ́ɛ sɔ́tɔ utiyapɛ́n niindaanda, Tusíip é kuesúkin pakatá ɛlɛɛ́ Sɔtɔ́m, nɔ Kɔmɔ́ɔl. 30Kiákí kí kuɔyɛt ekie? Piɛ́nɛɛ́n pílotí pímɛɛ́lɛ́ pítiambá indɛ́ndɛ́nnɛ í Támbák áátáŋáp yɛ, indɛ́ndɛ́nɛ yoólinoné á kuátap. 31Naánɛ́ kɔk ɛ́ɛ́ Isilaɛl maambá kupá indɛ́ndɛ́nɛ ó pikotí wɛɛl utiáminɛn. 32Ó pusíó pú kiákí, ó pusíó ɛ́ɛ́ indɛ́ndɛ́nɛ ikáánɛ́, petimepéétenyi yɛ́ á kuátap, pápítááka kutáŋap yɛ́ é melíe. Pɔ́ɔpíntɔndɛn á nitányí ní imbúpén, 33Yá aná púnyɛɛ́ puɔ́ŋɔ́n, índɛ imátal Siyoon á nitányí ní imbúpén, nitányí níkusenyée: Maná ewú waátapanɛ́ nitányí nikáánɛ́, tiányikuá.
موجودہ انتخاب:
Lomɛ́ŋ 9: yav
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2026, CABTAL