Lomɛ́ŋ 10
10
Nɛ Pɛyúútɛn na pátiányípá pɛyutɛn apian Ɔkɔ́n omoómí
1Paandimán, kilɔ́ɔ́ŋɛ́t kí ɔtɛ́m wáámɛ ni imbísókólí yaamɛ á Támbák ó pusíó pú Pɛyúútɛn nyɛ ɛ́ɛ́ pápia kisótio 2Á kiákí inyɛ etétúnyí wɔɔpɔ́, paápian tuɔ́l kuwa ó pusíó pú Támbák, maná pátipá ne kumeny kuutámb; 3Pééfénen indɛ́ndɛ́nɛ yoólinone ku Támbák paamba kutɛ́k yɔɔpɔ́, pééken i Támbák. 4Á kiákí Kilíise unyɛɛ́ mamanɛ́n mó kikotí, ɛ́ɛ́ mɔɔnd na mɔɔnd waátapanɛ́ wɔ pá indɛ́ndɛ́nɛ. 5Moyííse wɔ́ muɛ́t mɔɔ́ŋ ó pusíó pú indɛ́ndɛ́nɛ yoólinoné ó kikotí: Mɔɔnd ukoónyíwóónyi kɛ́ ɔ́ɔ́nyísɔ́t á kɛ́ɛ. 6Maná indɛ́ndɛ́nɛ yoólinoné á kuátap áákála anɛ: Ɔtiɔyɛ́t kááwɔ kɔ́ ɔtɛ́m ɛ́ɛ́: ɛ́nyɛɛ́ ukaányímákat mɛnɛ́mɛnɛ́ɛ? Púnyɛ kuseli kilíis. 7Kúnyaánɛ ɛ́ɛ́: ɛ́nyɛ́ ukeényítúnuk ké eŋulúm? Púnyɛ kuondi Kilíise é piku. 8Á kiákí indɛ́ndɛ́nɛ yoólinoné á kuátap ɔ́ɔ́kɔɔyɔ ɛ́ɛ́; Nukál nyɛ masíá naawɔ kááwɔ é niít nɔ ɔtɛ́m wááwɔ. Nukál nukáánɛ́ núnyɛ nukál nú kuátap tukémenée. 9Índɛ kááwɔ é niít éékeémenyi ɛ́ɛ́ Yésus nyɛ Ɔkɔ́n, oondo kááwɔ kɔ́ ɔtɛ́m, aátapan ɛ́ɛ́ Támbák meémí wɔ́ á pilɔ́ŋ, aányípá etúkúnén. 10Á kiákí ɛ́ɛ́ kuátap kɔ́ ɔtɛ́m ááyuukan kí indɛ́ndɛ́nɛ, kupípala é niít ááyuukan ó kisótio. 11Á kiákí ɛ́ɛ́ ɔnfiɔŋ ɔ́ɔ́kɔɔyɔ ɛ́ɛ́: Ewú ne ewú waátapanɛ́ wɔ tiɔ́nyɔɔ́p ɛtɔ kunua. 12A káánɛ́ kiséndie tipá ne Yúútɛn nɛ piɛ́nɛɛ́n pilotí; Peem áápian Ɔkɔ́n omoómí, weekenyée pɔ́ pinɔ́k pí maandá ɛ́ɛ́ pɛɛnd kitikit pápílanɛ́ wɔ. 13Akáánɛ́, ewú ne ewú waányípílanɛ́ kisíén kí Ɔkɔ́n ányípa etúkúnén. 14Maná, tiɛkíɛ́ kɔk páányípílanɛ́ wɔ́ pɔ́ tɛ kuátap wɔ? Tiɛkiiɛ́ pɛ́nyɛɛ́ kuátap wɔ́, pɔ́ tɛ kuɔ́p wɔ? Pɔ́ɔ́p wɔ́ tiɛkíɛ́ kɔk índɛ mɔɔnd siɛlɛ utipékít wɔ. 15Tiɛkíɛ́ kɔk ɛnyɛɛ́ ukupéke índɛ atipá atúmán? Yá anɛ púnyɛɛ́ puɔ́ŋɔ́n ɛ́ɛ́: Pikɔ́nd pí péépé pékemené insɔ́m yi indámb inyɛɛ́ kupɔt. 16Maná peem timɔɔ́pɛn insɔ́m yi indámb, á kiákí Isayi ɔ́ɔ́kɔɔyɔ ɛ́ɛ́: Ɔkɔ́n ɛ́nyɛ́ɛ umaátáp kukéme kúásɔ́? 17Akáánɛ́ kuátap óókoólinon é púúpú tupítɔ́likɔnɛ́ɛ, tupítɔ́likɔn nukál nú Kilíis. 18Yoókoówon kɔk ɛ́ɛ́: Pɔ́timɔɔ́p é? Ɛ́ɛ́ pɔ́mɔɔ́p! Púnyɛ puɔ́ŋɔ́n ɛ́ɛ́: E kúúsí kitikit ikelú síɔ́p mɔpɔ́ɔ́pɛ́t, tukál túɔ́p túanyaám kí insúkie i kúúsí. 19Yoókoówon kɔk ɛ́ɛ́: Isilaɛl timɔɔ́p é? Epú Moyíis mɔɔ́yɛ́t ukutúan. Ukanyɛɛ́ kuɔyɔ ɛ́ɛ́: Yeényínúlikesi ɛ́ɛ́ núɛlɛɛ́ núpá embúl ne péépé pátiányípá tɛ é nisíp ní insiŋí, ó pusíó pú esíp yakáánɛ́ yoónyínútiokoliti itɛ́m. 20Isayi é waapímak kupékit ɛ́ɛ́: Pɛ́mɛɛ́lɛ́ pátiŋambá pɛ́miiŋɛ́n, yeepitíínyi é péépé pɛ́mɛɛ́lɛ́ pótiŋówún puandá. 21Maná ó pusíó pú Isilaɛl ukanyɛɛ́, iŋgúme i puɔ́s yoótóŋínyí nikúli niinuenesíé imbɔk nitiányípá nííŋɔ́pinɔn.
موجودہ انتخاب:
Lomɛ́ŋ 10: yav
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2026, CABTAL