Roman 14
14
Kede Ku yi Nseda Shiriya
1Ku keleba worede man sori a siki beigaskyesu ba, sede kede ku bebele baki nja su sobon de tunani su ma mbom nja ku. 2Beigaskye ntani worosu su yeda su de su suku guru mbode sua bila de su suku, sede nsude man sori a siki beigaskyeyi ba yaa suku genya lombu na kin. 3Nsude ma suku guru mbo bila de e suku kede e nene nsude ma suku genya lombu na kin ba; yomuna nsude ma suku genya lombu na kin kede yi nsude ma suku guru mbom shiriya; sobon Mirikisi rigye keleba nseni. 4Waa ma e ke de ka yi bunwa nseda shiriya? E ma ANKI nsugizisu la de e nkye bunwa ni yi kyakyawu ko mumungu. Sua yi yaa shakiya, sobon Obagizi yaa sa su de su yi nasara.
5Worosu su ntani su la nana daa e pi nana daa kyawu anya su, worosu su kuma su la guru nana su ma ndandaa la. Konwawa mu e man sisika tebeshi a siki dishiyeyi. 6Worede su tunani nana daa pi daa su yi yomuna sobon yobo ni Obagizi; worede su ma suku guru mbode sua bila de su suku su yi yomuna de su yobo Obagizi, sobon su ma gbede Mirikisi sobon mbosi. 7Sobon mu man leyi sobon nkyamu na kin ba, yomuna mua muntu sobon nkyamu na kin ba. 8Nde mu man leyi, e ma sobon Obagizi la mu man leyi, yomuna nde mu muntu, e ma sobon Obagizi la mu muntu. Nkayomu ko mu man leyi ko mu muntu, mu mani Obagizi la. 9Sobon delili mu la Kiristi muntu e kwa dege nleyi de e ma Obagizi ni worede su man leyi nja worede su muntu. 10E ke de ki ma suku genya na kin, yaya na ka yi worosu su shiriya? E ke de ki ma suku guru mbo, mina sa de ki ma nene yayiwa ke? Sobon guru amu mua sakisi a geba kingbolo shiriya Mirikisi de yi mu shiriya. 11Sobon takada Mirikisi nkye,
<<Nde E ni na ni ma Mirikisi nsu leyi, nzi Obagizi,
konwawa yaa nya nguyam a geba na,
konwawa yaa pala nkye E ni la ni ma Mirikisi.>>
12Sobon kowoni nseda mu yaa pala mbode yi a geba Mirikisi.
Kede Ki sa Yayiwa ke E puari
13Nkayom, mu bila yi nkiya mu shiriya. De mua yi yomu, se konse yi tunani nkye e shi yaa taba yi mbode yaa sa yayiwa e yi e titimi ko e puari a siki lepi ba. 14Zumunshi na nja Obagizi Yesu sa ni ma ni tebeshi nkye ba mbosi de e ma nsu kazanta ba; sede nde ku la nkye worosu su mbosi su man kazanta, e ma nsu kazanta naka ba ku. 15Nde mbosi de ki ma si yaa sa yayiwa ke damuwa, ki nana yayiwa ke so ba aka. Kede mbosi de ki ma si e sa yayiwa ke de Kiristi muntu sobon nshi e yi lepi! 16Kede mu bila mbode mu la yi ma kyakyawu e ma mbo beta mumungu. 17Sobon Solota Mirikisi e ma beta ni si nja sha naba, sede ni gangasi, nja selema, nja perisiki a siki Aworo Nsuseki. 18Guru nsude ma bowuta Kiristi a turiki mu, yaa jima Mirikisi nja ntani sua yeda nshi.
19Nkayomu, e ma dole na de mu yi mbode yaa zo ni selema nja mbode mua ja nkyamu sori guyam. 20Kede mu juru ANKI de Mirikisi yi sobon mbosi. Guru mbosi e ma kyakyawu la, sede yi kyawu de mu si mbosi de yaa sa nseda yi lepi ba. 21Mbo kyakyawu de mua yi e shiya ma mu bila suku nama, nja sha riki, ko yi mbode yaa sa worosu su yayuwa su puari. 22Bila mbode ki beigaskye nshi a kiya beta mu, e ma, a sakani ke nja Mirikisi. Nsu anabirika na worede dishiya su ba su lepi a kiya mbode su la mbode ema kyakyawu! 23Sede nde su ma dishiya bi kiya mbode su si, Mirikisi yaa yi su shiriya nde su si, sobon su beigaskye a dishiya su ba. Guru mbode e dengela ni beigaskye ba e ma lepi la.
The Word for the World International and The Word for the World Nigeria