Marcos 6
6
Atoni Nazaré sin ka nloem fa he nataim Usif Jesus
(Mateus 13:53-58; Lucas 4:16-30)
1Nalali te, Jesus nok In asium-noinaꞌ sin ok-okeꞌ nnaon nfain on In kuan Nazaré. 2Neno nane naꞌeuk nok atoni Judeu sin neon onen, Jesus antaam mbi uim onen ma he naꞌnoinaꞌ. Neno nane, nmuiꞌ atoni namfau ntaman neu uim onen nane. Olas sin nneen In aꞌnoinaꞌ, sin namkakan mnak, “Atoni ii, lo namneo-namneo nahiin! In nmuiꞌ kuasan amsat! On mee es tal antee In on leꞌ ii? 3In leꞌ nane, mepu haa tukan haub. Hit tahiin In enaf, bi Maria; ma nok In oilf ini, es leꞌ: naꞌ Tiago, naꞌ José, naꞌ Judas, ma nok naꞌ Simão. In nmuiꞌ fetof amsat. Hai ok-okeꞌ mtook kuan meseꞌ mok Ne!” Es on nane, sin natoꞌan ma ka nlomin fa he nneen In molok antein.
4Ma Jesus natoon mnak, “Nane namneo! Atoni nloem mofhaeꞌ Uisneno In mafefa kninoꞌ naꞌko bale bute. Mes sin ka nloem fa he atoni naꞌko sin kuan aa kuuk.”#João 4:44
5-6aMes atoni leꞌ nane, sin aꞌnaak fatun. Tal antee sin ka nloem fa he npalsai ntein neu Jesus ben. Nane fun, In namkaak, ma In ka npaek fa In kuasa mbi nane. In naleko nana tuaf fauk aah.
Usif Jesus nfee mepu neu In asium-noinaꞌ sin, atoni boꞌes am nua
(Mateus 10:5-15; Lucas 9:1-6)
6bOke te, Jesus nnaon napuun-nateef kuan-kuan leꞌ ampaumakat, ma naꞌnoinaꞌ atoni neik Uisneno In aꞌlomin. 7In noꞌen In asium-noinaꞌ, atoni boꞌes am nua nane, he nleul sin annaon, sin tuaf na-nua nnaon natonan Uisneno In Aꞌan Alekot. In nfee sin kuasat amsat henati nliꞌun pah-tuaf. 8-9In naplenat sin mnak, “Hi naik ka meik baleꞌ namfa-fau mbi lalan. Naik ka meik bukael, loit, ma nok aluk. Meki haa tes nok peen-haꞌe, nok sabalu mbija hi aom in. 10Kalu nmuiꞌ atoni nataim ki mbi in ume, hi musti mtokom mbi nane tal antee hi mnao mtein. 11Mes kalu mtee baal es, ma atoni sin ka nataim ki, ma ka nloem he nneen ki, mfeen mnao miꞌko bale nane. Nalali te, mitoon sin mak, “Hi ka mloem fa he mneen ate, maut he msutai kim hi saant ini!”#6:11 Olas mbi nae, atoni ntekal afu naꞌko sin haek in he nfani takaf nak, atoni leꞌ ka naloem fa he nneen, nsutai saant in. Mtaeꞌ mbi sulat Naiꞌ Lucas 10:4-11, ma nok sulat Atos (Kisah Para Rasul) 13:51.
12Oke te, sin nnaon natoon Aꞌan Alekot nane. Sin nak neu toob in henati sin musti nmoin natuin lalan Uisneno. 13Ma sin nliuꞌ napoin pah-tuaf ini. Oke te, sin nꞌoseꞌ mina neu atoin in sin aꞌnaak in, ma henati nꞌonen naleko sin. Ma sin naleok nanin amsat.#Tiago 5:14
Usif Erodes nleul he nꞌoet nafeek naꞌ João in aꞌnakan
(Mateus 14:1-12; Lucas 9:7-9)
14Olas nane, atoni mbi mee-mee nahiin Jesus. Ma usif Erodes anneen nalail amsat uabaꞌ matoom nok Jesus In kuasan. Nmuiꞌ atoni naꞌuab am nak, “Naiꞌ João Aslain Atoni nane, nmoni nfain es Jesus in nekan! Es on nane te, In nabeiꞌ nmoeꞌ lasi mkakat namfau.”
15Ma nmuiꞌ atoni bian nak, “Kahat! Ije naꞌi Elias es anmoni nfain es In nekan.” Nmuiꞌ tuaf bian amsat nak, “In leꞌ nane, Uisneno in mafefaꞌ bian naꞌko ba un-unuꞌ sin.”#Mateus 16:14; Marcos 8:28; Lucas 9:19
16Mes olas usif Erodes nneen sin namolok matoom neu Jesus on nane te, in natae mnak, “Ije, naiꞌ João Aslain Atoni leꞌ neno unuꞌ au ꞌleul sin nꞌoet nafeek in aꞌnakan. Mes olas ii, in nmoni nfanin, he!”
17-18Usif Erodes anleul on nane, fun in anmuiꞌ lasi ꞌnaek nok naꞌ João. In lasi on ii: Usif Erodes nmatsaon ntein nok in olif naꞌ Filipe in feel, in kanan bi Erodias. Mes naꞌ Filipe nok bi Erodias feꞌ ka nmapoi laakn in. On nane, naꞌ João nakain sin haef-haef nak, “Usiꞌ ka nabeiꞌ mait ho olif in feel. Fun nane mtanhaiꞌ hit nonot Judeu!” Mes usif Erodes nmatsao nok ne. Nalali te, in nleul atoni nnaon nhuuk naiꞌ João he nataam ee neu paꞌan.#Lucas 3:19-20
19Fun natuin naiꞌ João nakain haef-haef on nane te, bifeel nane neekn aa nasꞌunu ꞌnaek he naꞌmate. Mes feꞌ ka nmuiꞌ sonaꞌ he naꞌmate, fun usif Erodes nataam naiꞌ João es paꞌan, 20ma nleul solalus sin mpaob ee lek-leok.
Usif Erodes aunun ꞌnakan neu naꞌ João. In nahiin nak Uisneno es ansonuꞌ naꞌ João nane. Ma naꞌ João nane, atoin alekot. Usif Erodes nloem he nneen naꞌ João in molok. Mes mbi haef es-haef es, in neekn aa ka nloem fa he nneen naiꞌ João in molok.
21Nalali te, mbi neno es, bi Erodias napein balas nafani in nekan amenat. Neno nane, sin nmoeꞌ fesat neu usif Erodes in neon mahonit. Sin naꞌsineꞌ atoin aꞌnaet sin he neem naah neu fesat neon mahonit nane. Leꞌ amnemat sin nane, alahaa atoni anaaꞌ aplenat, ma solalus sin aꞌnakaf, ma nok amnaes kuan mbi pah Galilea sin. 22Mbi fesat in nanan, bi Erodias in aan feto ntaam mbiul. In mbiul ta alekot, tal antee nmoeꞌ usif Erodes in nekan nok amnemat sin neek in namliilꞌ in. Ma on nane te, usif Erodes noeꞌn ee neem mnak, “Ho mloem he mtoit saaꞌ meu kau, niꞌ mutoon! Lof au ꞌfee ko. 23Masti ho mtoit au ꞌsoupu ii he ꞌbati nua msat, au ꞌfee ko. Au ꞌsuup, nabeiꞌ au ꞌteek Uisneno in kanan!”
24Ma liꞌaan feto nane nnao ntoit in enaf mnak, “Enaꞌ! Ena nabeiꞌ ho mloem au ꞌtoit saaꞌ leꞌ es au amaꞌ nmuꞌi?”
Ma in enaf natae mnak, “Haaa, nane es au ꞌloem! Mnao mtoti haa João in aꞌnakan.”
25Oke te, liꞌaan feto nane nnao sabake neu usif Erodes mnak, “Amaꞌ! Au ꞌtoit ho mfee kau João in aꞌnakan, mtao bahe neu bandeja. Meiki neem es leꞌ ii!”
26Usif Erodes nneen on nane te, in neekn aa namneuk naan. Mes in ka nabeiꞌ fa he nait nafaniꞌ in haan supat nane, fun toob ok-okeꞌ nneen nalail ne. 27Oke te, in nleul solalus in aꞌnakaf meseꞌ he nnao nꞌoet nafeek naꞌ João in aꞌnakan mbi paꞌan. 28Sin nꞌoet nafeek João in aꞌnakan, oke te, ntaob ee neu bandeja, he nnaon nfeel ee neu liꞌaan feto nane. In nataim bandeja nane, ma in natnaat neiki nnao nfeel ee neu in enaf. 29Olas nane, naꞌ João in asium-noinaꞌ sin nnenan nak sin nꞌoet neik naꞌ João in aꞌnakan, ma sin neman nait in aon taꞌun, he nnaon nsuub ee.
[Naꞌ João in lasi maten, nheuba leꞌ ii.]
Usif Jesus nahao toob nifun niim manesiꞌ
(Mateus 14:13-21; Lucas 9:10-17; João 6:1-14)
30Mbi olas es, asium-noinaꞌ leꞌ Jesus nsonuꞌ sin, sin nfain ok-okeꞌ, ma nabuan nfain nok Ne. Sin natoon saaꞌ leꞌ es sin nmoeꞌ nani, ma nok saaꞌ leꞌ es sin naꞌnoinaꞌ nani neu atoin in. 31Mes olas nane, nmuiꞌ atoni namfau nnaon-neem nnaon-neem he naim Jesus. Tal antee In, nok In asium-noinaꞌ sin ka naah nanan fa. Ma Jesus natoon In asium-noinaꞌ sin nak, “Eim he hit tnao taim bael sonaꞌ, he hit tasnaas taan akleꞌo feꞌ.”
32Nalali te, sin ok-okeꞌ nsaen neu beroꞌ, ma he nnaon namin bael sonaꞌ leꞌ nakloꞌo naꞌko kuan.
33Mes toob namfau nane napeen niit Jesus sin aꞌberoꞌ nnaon natuin nifu ꞌnaek in ninen. Nalali te, sin npoi naꞌko kuan amsat, ma nnaon natuin laal metoꞌ he natuin Jesus sin. Mes toob in sin nnaon nteen nahunun. 34Olas Jesus nsaon naꞌko beroꞌ, In niit toob namfau leꞌ sin nanpaob Ee. In namnau sin, fun sin ok-okeꞌ ka nahinen fa he nmoeꞌ on nak mee, namnees on leꞌ bib-kase leꞌ ka nmuiꞌ fa atukus. Nalali te, In naꞌnoinaꞌ sin lalan Uisneno,#Numerus 27:17; 1 Uisf ini 22:17; 2 Kronikas 18:16; Ezequiel 34:5; Zacarias 10:2; Mateus 9:36 35-36naꞌko maans aa naheun tal antee nabenaꞌ. Ma In asium-noinaꞌ sin natoon Ee mnak, “Amaꞌ! Naleko nneis, Amaꞌ Ho mleul toob in he nnaon nsosan amnahat neu kuan-kuan leꞌ mpaumaak mbi ii. Fun ii maans aa nabenaꞌ ee, ma bukael ka nmuiꞌ fa es ii.”
37Mes Jesus natae mnak, “Ka nabeiꞌ! Hi es mihao sin.”
Mes sin ntoit nafain Ee mnak, “Aꞌauu! Kalu hit nabeiꞌ tahao toob namfau on ii, hit musti tapoin loit namfau nneis! On leꞌ ameupt es in noin funan toon es!#6:37 Sula Kninoꞌ lasi Gregu unu-unuꞌ nluul nak, “lupia denari natun nua”. Lupia denari meseꞌ, naꞌko batan unuꞌ, namnees on leꞌ ameup tukan in noin nbaen neno es. Tmoeꞌ on mee henaꞌ hit tapein loit namfau on nane?”
38Ma Jesus natae mnak, “Hi mnao mtoit feꞌ aiꞌ sikau es leꞌ neik bukael.”
Nalali te, sin nnaon ntotin. Ma sin nnaon nfanin, natoon sin mnak, “Anmuiꞌ paon fuaꞌ niim, nok ikaꞌ koꞌe nua.”
39Nalail Jesus nleul toob ok-okeꞌ he ntokon puk-nook mbi maꞌu. 40Sin ntokon puk-nook. Bian ntokon puk-nook naotn es-naotn es, ma bian ntokon puk-nook boꞌ niim-boꞌ niim.
41Nalali te, Jesus nait paon fuaꞌ niim, nok ikaꞌ koꞌe nua. Ma In anfuat on neno tunan, ma In ntoit manekan naꞌko Uisneno. Oke te, In nꞌeib paon naꞌpisaꞌ-pisaꞌ, ma nnonaꞌ neu In asium-noinaꞌ sin, ma he nnaon mbatin neu leꞌ toob ok-okeꞌ. Ma ikaꞌ koꞌe nua nane, In mbatin ntein neu sin. 42Nalali te, sin ok-okeꞌ nahan tala namsenan. 43Naah nalail on nane, asium-noinaꞌ sin nnaon nabuab nfain mnaah nesif, naheun ꞌponi boꞌes am nua.
44Sin on he ntee, toob nifun niim. Nane tsoꞌi haa atoni es anaah. Feꞌ kaꞌ tsoꞌi ntein bifeel ma liꞌanaꞌ.
Usif Jesus nnao natuin oel aa tuun
(Mateus 14:22-33; João 6:16-21)
45Oke te, Jesus nleul In asium-noinaꞌ sin he nnaon nsaen nukaꞌ beroꞌ he nnaon nahunun mbi kuan Betsaida, mbi nifu ꞌnaek panin. Mes In feꞌ nabalah mbi nane, he nleul toob amfaut in he nnaon nfanin. 46Olas toob ok-okeꞌ nnaon nfanin, In ansae mbi ꞌnuꞌaf es he nꞌonen.
47-50Olas anfaiꞌ, Jesus nsanu nfain. Ma In napeen niit nahuun In asium-noinaꞌ sin aꞌberoꞌ ntee nifu in atnanan. Mes sin anfoꞌin aꞌberoꞌ nasuus pokan, fun natuin beroꞌ nnao nseun anin. Olas moeꞌ he nmeu-nfiin, Jesus nnao natuin sin. Mes In nnao natuinaꞌ oel aa tuun. Olas In he nfiin jen naꞌko beroꞌ, sin napeen niit Ee. Sin naskeken. Oke te, sin mantotin mnak, “Ije saꞌan? Nitu ka, aiꞌ saaꞌn aa?”
Mes Jesus namolok am nak, “Huus! Kaisaꞌ mimtau! Ije Au.”
51Olas Jesus nsae neu beroꞌ tunan, ma anin namnee nain amsat. In asium-noinaꞌ sin ok-okeꞌ namkakan. 52Sin fa niit sa nahiin Jesus npaek In abeꞌin he nahao toob nifun niim maneis. Mes sin feꞌ ka nahiin maneꞌo In kuasan, fun sin neek in feꞌ namanun.
Atoin ameent in mbi Genesare ok-okeꞌ nnaon neu Usif Jesus
(Mateus 14:34-36)
53Olas sin nnaon ntee nifu ꞌnaek in panin, sin nsaon mbi kuan Genesare in nifu ninen. 54Olas sin nsaon naꞌko beroꞌ, toob namfau napeen niit sin, ma noꞌen mnak, “Hoi! Jesus neem!” 55-56Sin ok-okeꞌ naenan nnaon natoon neu bale-bale, he atoin in nloi neik atoin ameent in he neman.
Ili lamu, sin nanenan nak Jesus neem es bale nae, sin ok-okeꞌ nloi neik atoin ameent in, ma natupaꞌ sin mbi naijaan amnesat. Sin naneꞌop mnak, “Ili lamu atoin ameent in nlaab nana haa Jesus in sabalu tuukn amsat, lof sin naleok.” Kalu sin nlaab nalail Ne, sin naleok nanin.
موجودہ انتخاب:
Marcos 6: BBKN
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2003, 2015, 2025 Wycliffe Bible Translators Inc
