एस्तेर 6
6
राजा क लारे मोर्दके क सम्मान
1तेने राती राजा क नींद नी आवी, एकालीय ओका हुकुम सी इतीहास नु कीपात लावी गय, आरु भनीन राजा क सोमवाड़्यो गयो। 2#एस्तेर 2:21-22ओकामा यो लीखलो हुओ मिळ्यो, की जोत्यार राजा क्षयर्ष क हाकीम क द्वारपाल वी हुतो, उनामा सी बिगताना आरु तेरेश नावोन दुय जना न उना पोर हाथ चालाड़नेन वीचार कोर्या हुता उना मोर्दके न प्रगट कोर्लो हुतो। 3तोत्यार राजा न पुछ्यो, “एका बोदले मोर्दके नु काय प्रतीष्ठा आरु बड़ाई कर्यो गयो?” राजा क जे सेवक ओकी चाखरी कोर रोया हुता, हुये ओको जपाप आप्या, “ओका लीय काय वी नी कोर्यो गुयो।” 4राजा न पुछ्यो, “आँगना मा कुन छे?” तेने टेमे हामान राजा क भवन सी खोयड़े आँगना मा एना वीचार सी आयो हुतो, की ज खाम्बो हुयो मोर्दके क लीय तीयार कोरायो हुतो, उना पोर ओको लटकाय देनेन वात राजा सी कोरे। 5तोत्यार राजा क चाख्र्या न उनासी कोया, “आँगना मा ते हामान उबो छे।” राजा न कयो, “ओको धड़े बुलाय लावु।” 6जोत्यार हामान धड़े आयो, तोत्यार राजा न उनासी पुछ्यो, “जेना मानुस नु प्रतीष्ठा राजा कोरनो चाहतो हय ती ओका लीय काय कोरनो वारु होयसे?” हामान न यो सुचीन, की म्हारे सी जागा राजा कुदाक प्रतीष्ठा कोरनो चाहतो हसे? 7राजा क हामान जपाप आप्यो “जेना मानुस क प्रतीष्ठा राजा कोरनो चाहे, 8ओका लीय राजकीय पुतल्या लाया जाय, ज राजा पेहरतो छे, आरु एक घुल्लो वी, जेना पोर राजा सवार होयतो होय, आरु ओका मुनका पोर ज राजकीय मुकुट मेक्यो जातो छे हुयो वी लायो जाय। 9ओळी चो पुतल्या, आरु हुयो घुल्लो राजा क कुदा मोटा हाकीम क सोवंप्यो जाय, आरु जेरी प्रतीष्ठा राजा कोरनो चाहतो होय, ओको हुये पुतल्या पेहराया जाय, आरु उना घुल्ला पोर सवार कोरीन, नगर क चोक मा ओको फिरायो जाय; आरु ओका अगळ-अगळ यो पोरचार कोर्यो जाय, जेरी प्रतीष्ठा राजा कोरनो चाहतो छे, ओका साथ असोज कोर्यो जासे।” 10राजा न हामान सी कयो, “उतवाळ कोरीन आपसा कोहनेन ओनसारे तेनु पुतल्या आरु तेना घुल्ला क ली, उना यहुदी मोर्दके सी ज राजभवन क फाटक मा बोठ्या कोरतो छे, तसोज कोर। जसो तुन कयो छे उनामा काय वी कोमी होयनो नी जुवे।” 11तोत्यार हामान न उना पुतल्या, आरु घुल्ला क लीन, मोर्दके क पेहरायो, आरु उना घुल्ला पोर चड़ावीन, नगर क चोक मा एने रीते आयड़तो हुयो फिरयो, “जेरी प्रतीष्ठा राजा कोरनो चाहतो छे ओका साथ असोज कोर्यो जासे।” 12ती मोर्दके ते राजभवन क फाटक मा लौटी गुयो पुन हामान शोक कोरतो जाईन आरु मुनको ढाँकीन झट आपसे घर क गुयो। 13हामान न आपसी घरवाळी जेरेश आरु आपसा आखा दुसतीदार सी आखो काहीन ज उना पोर वीत्यो हुतो कयो। ती ओका ओकोलवाळा दुसरतीदार आरु ओकी घरवाळी जेरेश न उनासी कव्या, “मोर्दके जेनाक तु नेचो देखाड़नो चाहतो छे, कदाम हुयो यहुदियो क ओवलीयाद मा क छे, ती तु उना पोर जीत नी होयने पावसे उनासी पुरी रीती नेचो होय जाईस।”
हामान नु मोत
14हुये उनासी वातेत कोरता हुता, की राजा क खोजे आवीन हामान क एस्तेर क कोरला भोज मा उतळाव सी बुलाय ली गुया।
The Dhankavi Bible © The Word for the World International and Dhankavi Mandli, Khargon, Raykhed, Nandurbar, Maharashtra 2025