Markus 6
6
Isa Atomendeu i Nazaret
6:1-6a
(Mat. 13:53-58; Luk. 4:16-30)
1Kasiimpo Isa alingkamo minaaka iwe sumai apoose tee manga murina tee akawamo i Nazaret, tampana mbooresana wakutuuna dhaangiapo anaana. 2I eona Saputuu, Incia apepuumo aadhari i tampana ibaadatina miana Yahudi tee mia bhari modhaangiana iwe sumai amente arango kaadharina.
Kasiimpo manga incia apogau, "Minaaka i iapai o mia incia sii apotibhaaka manga giu incia sumai? Hikimati mboo opea uka buaka irahumatiaka to Incia? Tuaapa amembali Incia apadhaangia manga muuzizati mboo sumai? 3Ingkita tamataua ande Incia sii o pande kau, o anana Siti Mariam, witinaina Yakub, Yoses, Yudas, tee Simon! Tee manga andina bhawine uka adhaangia iwe sii asaangu kota tee ingkita!" Jadi manga incia inda aparacaea tee inda atarimaia.
4 #
Yah. 4:44. Kasiimpo Isa apogau tee manga incia, "Samia nabii atohoromati iapai-iapaipo uka tabeana i lipu asalana, i tanga-tangana witinaina, tee i bhanuana." 5Iwe sumai o Isa inda amembali apewau saangu muuzizati uka, tangkanamo apaunto pia-pia mia momapii tee adhikaakea limana i bhawona bhaana manga incia. 6aIncia amente mpuu roonamo manga mia i kampona karona inda aparacaeaia.
Isa Alamboko Sapulu Rua Mia Rasulu
6:6b-13
(Mat. 10:5-15; Luk. 9:1-6)
6bKasiimpo Isa alingka tee atiingi lipu incia sumai minaaka i saangu kampo sakawana i kampo mosagaanana apoose aadhari. 7Incia akemba sapulu rua mia murina tee manga incia alambokoa arua-rua mia, tee adhawuakea kuasa i manga incia to apadhencu manga rohi madhaki.
8 #
Luk. 10:4-11. Isa asamea i manga incia, "Bholi ubhawa opeopeapo uka i nuncana lingkaamiu tabeana o katuko. Bholi ubhawa kinande, tasina bhaku, atawa o doi i nuncana kamandamiu. 9Ingkomiu amembali upake sandalimiu, maka tangkanamo amembali upake sapasa pakea." 10Isa uka apogau, "Ande ingkomiu upesua i bhanuana mia, umbooremo iwe sumai sakawana ingkomiu ulingka tee ubholi tampa incia sumai. 11#Tul. 13:51. Tee ande ukawa i saangu tampa, kasiimpo manga mia iwe sumai inda atarima tee aperangoikomiu, bholimea o tampa incia sumai tee utantamakamea o ngawu minaaka i aemiu to tanda kaudhania#6:11 utantamakamea o ngawu minaaka i aemiu to tanda kaudhania: Giu incia sii o maʼanana, manga mia inda motarimana manga mia ilambokona Isa atoabhi apokana mboomo mia mokaafiri tee manga mia alambokona Isa indamo atanggojawapu to manga incia. Manga incia bheatohukumu tee o giu incia sumai amembali masaʼalana karona manga incia. to manga incia."
12Kasiimpo alingkamo sapulu rua miaia o murina Isa sumai. Manga incia alingka apakawaaka lele ande o maanusia tabeana atoba minaaka i manga dosana. 13#Yak. 5:14. Abhari o seetani ipadhencuna manga incia, tee manga incia uka amina-minaikia tee mina zaitun to manga mia momapii, tee manga mia momapii sumai auntomo minaaka i kapiina.
Nabii Yahya Mopapebhahona Atopekamate
6:14-29
(Mat. 14:1-12; Luk. 9:7-9)
14 #
Mat. 16:14; Mrk. 8:28; Luk. 9:19. Raja Herodes arango bhari-bharia ipewauna Isa. Roonamo sarona Isa amataumea mia bhari, dhaangia o mia mopogauna,#6:14 dhaangia o mia mopogauna: Dhaangiapo uka manga kaburi momangenge mopogauna, "Incia (Herodes) apogau, 'Nabii Yahya adhadhi pendua.' " "Isa sumai o Nabii Yahya Mopapebhahona tee sii-sii adhadhimo pendua minaaka i tanga-tangana mia mate. Rampaakanamo sumai Incia amembali apadhaangia bhari-bharia muuzizati sumai."
15Maka manga mia mosagaanana apogau, "Incia sumai o Nabii Ilyas."#6:15 Nabii Ilyas: Ilyas sumai samia nabii molaianina Kawasana Opu i zamanina manga raja Israel motoangkana i sorogaa wakutuuna incia dhaangiapo adhadhi. Manga incia afikiri Nabii Ilyas ambuli pendua i dunia tee asarongiaka karona o "Isa."
Dhaangia uka o mia mopogauna, "Incia samia nabii mobhaau, mboomo manga nabii i zamani mangenge."
16Maka wakutuuna Herodes arangoa, incia apogau, "Yahya mopadhana itumpoku bhaana sumai adhadhimo pendua!"
17 #
Luk. 3:19-20. Raja Herodes apogau mboo sumai roonamo karona motumpuna mia to arako Nabii Yahya tee abhokea i nuncana katorongku. Incia apewau mboo sumai roonamo pokaiana akawiaka Herodias bhawinena Filipus, tee o Filipus sii o witinai awona raja. 18Giu incia sumai apewaua roonamo Nabii Yahya audhaniaka Raja Herodes, "Aharamu uala Herodias, bhawinena witinaimu." 19Rampaakanamo sumai o Herodias amapii incana tee Nabii Yahya, tee gauna bheapekamatea, maka inda amembali 20roonamo Raja Herodes akailiili tee Nabii Yahya. Incia amataua ande o Nabii Yahya satotuuna o mia mobanara tee momangkilo sabutuna incia atojagani tee atodhawuaka tampana peulusa. Maka ande o Raja Herodes aperangoi opea ipogauakana Nabii Yahya, sadia o ngangarandana abingu, maka satotuuna incia uka apeelua aperangoia.
21Aahirina dhaangia uka tee kalalesa momalape to Herodias, siitumo wakutuuna Raja Herodes apadhaangia kariaana eona laahiriana to manga kaogesana, manga kapita,#6:21 kapita: Mia mokapalaina tantarana Raja Herodes. tee manga mancuanana lipu mominaakana i poropinsi Galilea. 22I nuncana kariaa sumai, anana Herodias bhawine apesua kasiimpo amanari, tee o hali incia sumai amaasiakea incana Raja Herodes tee bhari-bharia kakemba mokandena iwe sumai.
Kasiimpo apogaumo o raja i ana bhawine sumai, "Uemanimo opea ipeelumu, dhaanamo bhekudhawuakako!" 23Kasiimpo Raja Herodes ajanji i kabuabua sumai tee apotunda, "Opeapo uka iemanimu bhekudhawuakako, moomini sagaa minaaka i pamarintaku uka."#6:23 Maʼana ipogauakana Raja Herodes sii, incia arela adhawuaka hadia maoge.
24Kasiimpo alimbamo ana bhawine sumai to aabha i inana, "Opea bheiemaniku?"
Lawanina inana, "Uemanimo bhaana Nabii Yahya Mopapebhahona!"
25Ana bhawine sumai uka alausaka apesua akaago-ago to apoaro tee raja, kasiimpo apogau, "Iaku gauku sii-sii uka udhawuakaaku bhaana Nabii Yahya Mopapebhahona i saangu piri maoge."
26Raja amaasimo mpuu incana sarangona kalawanina sumai. Maka roonamo padhamo aposumpa i aroana manga kakembana, incia inda apeelu to amendeu opea iemanina ana bhawine sumai. 27Raja alausaka atumpu samia suludaduna to abhawa bhaana Nabii Yahya, sabutuna suludadu sumai alingkamo tee atumpo bhaana Nabii Yahya i nuncana katorongku. 28Inda amangenge sapadhana sumai suludadu sumai abhawamo bhaana Nabii Yahya i saangu piri maoge tee adhawuakea i ana bhawine sumai. Kasiimpo ana bhawine sumai adhawuakea i inana.
29Sarangona lele incia sumai manga murina aumbamo to aala maeatina Nabii Yahya tee akoburua.
Isa Apakande Lima Rewu Mia
6:30-44
(Mat. 14:13-21; Luk. 9:10-17; Yah. 6:1-13)
30Kasiimpo manga rasulu sumai ambuli pendua aporomusaka tee Isa. Manga incia apetulatulaakea opea mopadhana ipewauna tee iadhariakana. 31Maka abhari mpuu o mia moumbana iwe sumai sabutuna manga incia indamo tee wakutuuna moomini akande. Rampaakanamo mia bhari sumai, Isa apogau, "Maimo talingkaaka i tampa momalino tee taponiunto sabantara."
32Jadi manga incia asawimo i bhangka kasiimpo abhose i tampa momalino. 33Maka garaaka wakutuuna Isa tee manga murina abhose, dhaangia tee manga mia mokamatea, tee manga mia sumai amataua o tampa bheilingkaisina Isa tee manga murina. Sabutuna manga mia sumai adhala ae minaaka i kotana samia-samia to aose Isa, sampe dhaangia moposabuntulina mamudhaakana akawa aporikanaaka Isa tee manga murina i tampa incia sumai. 34#Kab. 27:17; 1Ra. 22:17; 2Taw. 18:16; Yeh. 34:5; Zak. 10:2; Mat. 9:36. Sasapona minaaka i bhangka, Isa akamatamo mia bhari tangasaana aantagi umbaana. Sakamatana giu incia sumai, Isa amaasimo mpuu incana tee manga incia roonamo manga mia sumai mboomo dumba inda mokogembala. Kasiimpo Isa apepuumo aadhariakea bhari giu to manga incia.
35Wakutuuna bheasoomo eo, manga murina aumbatimo Isa. Manga incia apogau, "Tampa incia sii amalino tee sii-sii apepuumo amalo. 36Tumpumea manga incia alingka i kampo-kampo tee i desa-desa i saripi sii mamudhaakana amembali aaliaka kinande to karona."
37Maka o Isa alawani, "Tabeana o karomiu modhawuna kinande to manga incia!"
Manga murina alawani, "Inda amungki! Minaaka i iapai ingkami tapotibhaaka rua atu tibha doi pera#6:37 doi pera: Satibha doi pera satotuuna o ponambona saeo to mia mokarajaa. to taaliaka kinandena mia mobhari mboo sii? Siitumo ponambona samia mokarajaana walu mbula!"
38Apogaumo Isa, "Saopea kabharina roti modhaangiana i ingkomiu? Parakisaapea!"
Sapadhana aparakisaaia, manga murina apogaumo, "Dhaangia lima angu o roti tee rua mbaa ikane."
39Kasiimpo Isa atumpumo manga mia bhari sumai to auncura atombu-tombu karona i tampa mokorumpu momaijo. 40Sabutuna auncuramo manga incia atombu-tombu karona, dhaangia saatu mia, dhaangia uka lima pulu mia. 41Isa aalamo roti lima anguna tee ikane rua mbaana sumai, kasiimpo apotingara i laiana tee aemani sukuru i Aulataʼala to manga kinande sumai. Sapadhana sumai aweta-wetamea o roti sumai tee limana tee adhawuakea i manga murina to apapodhawu-dhawuakea i manga mia bhari sumai, tee uka atumpu manga murina to apapodhawu-dhawuakea o ikane rua mbaana sumai sakawana bhari-bharia mia apotibhaaka dhawuna. 42Kasiimpo manga incia akande sakawana amambosu. 43Sapadhana sumai, manga mia sumai arombusakamo bhilaana manga roti tee ikane sumai, garaaka dhaangia sapulu rua langka o bhilaana. 44Kabharina mia mokandena roti sumai kera-kera lima rewu mia umane.
Isa Adhala i Bhawona Uwe
6:45-52
(Mat. 14:22-23; Yah. 6:16-21)
45Sapadhana incia sumai, Isa alausakamo atumpu manga murina akompa i bhangka to apolimba porikana i Bait Saida tee Incia uka atumpu mia bhari sumai ambuli. 46Sapadhana aposanga i manga mia bhari sumai, Incia apangaramo i gunu to adoʼa. 47Wakutuuna amalo o bhangkana manga murina adhaangiamo i tanga-tangana tawo, sainamo Incia dhaangiapo i ati samia-miana. 48Isa apentiromo ande manga murina tangasaana i nuncana karasai abhoseaka bhangkana roonamo dhaangia tee ngalu makaa mokangkanaina manga incia minaaka i aroa mbakana amarasai amaju. Kera-kera amakasu raneeo, Isa asapoiki manga incia tee adhala i bhawona uwena tawo sumai, mboomo gauna bhealaloi manga incia. 49Maka wakutuuna manga incia akamata Isa adhala i bhawona uwena tawo, manga incia asarongia kanjoli, sabutuna manga incia akakee-keemo, 50roonamo manga incia akamatea adhala i bhawona tawo tee atokidha. Maka o Isa alausakamo apogau, "Pekatangkamea incamiu! Iaku sii, bholi umaeka!" 51Kasiimpo Isa akompa i bhangkana manga incia, tee o ngalu sumai auntomo tee manga incia bhari-bharia amentemo mpuu. 52Manga incia indapo uka amaʼanaia o maʼanana pakandeana lima rewu mia sumai, roonamo ngangarandana tee fikirina manga incia dhaangiapo atotutubhi tee indapo amaʼanaia incema o Isa satotuuna.
Isa Apaunto Manga Mia Mapii i Genesaret
6:53-56
(Mat. 14:34-36)
53Sakawana i sawetana, Isa tee manga murina asandaramo i kampo Genesaret tee alabu iwe sumai. 54Sasapona minaaka i bhangka, manga mia iwe sumai alausaka amataua ande moumbana sumai o Isa. 55Sakamatana Isa aumba i Genesaret, manga mia sumai aposabuntulimo tee apakoleleakea i saangua lipu sumai, jadi apepuumo manga mia momapii mopotidholena i bhawona kolemana atosodha tee abhawea i iapai-iapaipo uka i tampana Isa adhaangia. 56Iapaipo uka Isa alingka, malape i kampo-kampo, i kota-kota, atawa i desa-desa, manga mia iwe sumai adhika manga mia momapii i dhaoa, tee aemani i Isa mamudhaakana aundaakea to adhingku tapana jubana, tee bhari-bharia mia modhingkua alausaka aunto o kapiina.
موجودہ انتخاب:
Markus 6: KMW
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ongoing © Wycliffe Bible Translators, Inc
