मत्ती 11
11
यीसु अना योहन बप्तिस्मादेवन वारा
(लूका 7:18-35)
1आपरो बारा चेला गीन, ला हुकूम देवन को मघा यीसु वहान लक हीट गयो। गलील छेतर को नगर-नगर मा परचार करन लगयो।
2योहन ना जेल मा यीसु मसीह को काम की गोस्टी आयकीस, अना आपरो चेला गीनला वोको लक, यो पूसन ला धाड़िस 3“का आवनवालो तूच से का आमी दुसरो, को रस्ता चोवोबिन?”
4यीसु ना जवाब देइस “जो काही तुमीना, आयकीसेव अना चोयोसेव सबा जायके योहन लक सांगो। 5का अँधरा चोवासे लंगडो चलासे। कोढी गीन साजरो होवासे अना भैरा आयकसे, मुरदा जित्तो होवासे। अना गरिब गिनला साजरो बारता आयकोवासेत।” 6अना धन्य “किस्मत वारा से” उ जोन मोला अपनावा सेत।
7जबा वय वहान लक चले गइन तबा यीसु योहन को बारेमा सागन लग्यो। “जंगल मा तुमी काजक चोवन आयो सेव? घागरा गवथ#11:7नदी नाला कठा को हिवरी घास जो बास जसी रव्हसे ला? जोन वारा मा हिला सेत। नहीं! 8मंग तुम्ही काजक चोवन आयीसेव? का एक मानूस ला जोन साजरो झंगा घालासेत? असो मानूस तो राज भवन मा च रव्हासेत। 9मंग काजक लाय आयो सेव? का कोनी भविस्यवक्ता ला चोवन आयो सेव?” हव मि तुमी लक कव्हसू, “का भविस्यवक्ता लक मोठयो सेत ला।” 10यो वोच मानूस से, जोनको बारेमा असो गिरंथ मा लिख्यो से “चोव! मी आपरो दुत ला तोरो पुढा धाड़ासू। जोन तोरो लाई रस्ता तैय्यार करयेत।” 11“मि तुमी लक खरो-खरो सागांसू, योहन बप्तिस्मा #11:11पाप लक मरनो अना नेकी को लाय जिवनो देवन वालो लक कोनी मोठो मानूस जलम नही लियो सेत। मंग सरग को राज मा सब लक, लहान मानूस योहन बप्तिस्मा देवनवारो लक मोठो सेत। 12योहन बप्तिस्मा देवन वालो को दिवस लक, अबा तकन सरग को राज भयानक लड़ाई झेलत आयो से, अना हिन्सा को ताकत लक एला हिसकन को कोसीस चालू सेत।” 13योहन बप्तिस्मा देवन वारो तकन सारो भविस्यवक्ता अना मोसे को नियम, आवन वालो गोस्टी को बारेमा सांग्यो होतो। 14#मत्ती 17:10-13; मरकुस 9:11-13“अना अदी तुम्ही मोसे को नियम अना भविस्यवक्ता गीनना जो काही कह्यो होतो वोला अपनान तैयार सेव, जोनको आवन को बारेमा कह्यो होतो यो योहन वोच एलिय्याह से। 15यो गोस्टी ध्यान धरके आयको।”
16“आज को जुग को लोकगीन को बरोबरी कोन लक करू? वय असो लेकरा को जसो सेत, जोन हाटमा बसके एक दुसरो लक हाकल के कव्हासे। 17अमिना तुम्हारो लाय बंसरी बजायो अखीन तुमी नही नाचयत! अमीना सोक को गाना गायो, अना तुम्ही नहीं रडयो।” 18काहे की योहन बप्तिस्मा देवन वालो आयो, जोन ना जेवत होतो, अना काही पिवत होतो, लोक वोला कव्हत होतिन, “एकोमा बुरो आतमा से।” 19“मंग मानूस को टूरा आयो, जोन सबको जसो जेवन करा सेत, तरी वय लोक कव्हासेत। चोवो! यो अघोरी गजब खावन-पीवन वारा मानूस, अना बरगन लेवन वारा, अना पापी गीन को संगी सेत।” तरी काम लक अक्ल सहीमा कसो सेत पता चलासेत।
बिना बिस्वासी पर हाय
(लूका 10:13-15)
20मंग यीसु उन नगर ला धिक्कारन लगिस जोन मा वोना अद्भुत काम करयो होतो। काहेका वोनो नगर का लोकगीन पाप करनो नही सोड़यो होतो, अना आपरो मनला नही बदलो होतीन। 21“अरे अभागो खुराजीन नगर, अरे अभागो बैतसैदा नगर तुम्ही मा जोन अचरज को काम कियो गयो सेत। अदि नास कियो नगर, सुर अखीन सैदा मा होत्यो। त वहान की जनता, रड़त-रड़त गम मनाय के, कबा लक पाप लक मन ला हटाय लेई होतिन। 22पर मी तुमरो लक सागसू, का न्याय को दिवस, नास कियो नगर सुर अना सैदा को जसो हाल भयो होतो, अबा वोको लक ज्यादा खराब दसा ऐना नगर की भई जाहेत। 23हे कफरनहुम नगर! का तू सरग लक, वरता करयो जाहेत? नही तु तो पताल लक जादा धस जाहेत। काहेका, जोन ताकत को काम तोरो, अँदर मा कियो गयो से। वोच काम सदोम नगर मा करयो, जातो ता उ आज तकन बनयो रव्हतो। 24#मत्ती 10:15; लूका 10:12पर मी तुम लक कव्हासू, का न्याय को दिवसमा इनको हाल सदोम अना गमोरा देस लक जादा बूरो भई जाहेत।”
बोझ लक दबया हुयो लाई आराम
(लूका 10:21,22)
25वोच बेरा यीसु ना कव्हयो “परमेस्वर बाबूजी सरग, अना धरती को पिरभु, मी तोरो धनवाद करासू, का तूना यो गोस्टी ला अक्कलवर अना समजदार लोकगीन लक, लूकाईसेस अना लेकरागिन पर परगट करयो से।” 26“हे परमेस्वर बाबूजी तोला असोच साजरो लगिसेस।”
27“ #योहन 3:35; 13:3; 17:2 मोरो परमेस्वर बाबूजी मोला, सब काही भेटयो से, अना टूरा ला कोनी नही जानासे, बस परमेस्वर बाबूजी, अना परमेस्वर ला कोनी नही जानासे, बस टूरा! अना टूरा जोन पर परगट करवानो, चाव्हासे वा परमेस्वर लक भेट कर सकासे। ”
28“ओ! सब मेहनत करन वारा, बोझा को खालया दबो लोकगीन, मोरो कठा आओ मि तुमला चैन देहू। 29मोरो जुआड़ी आपरो पर धरलो अना मोरो लक सीको। काहेका मी आतमा मा नरम, अना मन को गरीब सेव तबा तूमी आपरो मन मा चैन पावने। 30काहेका मोरो जुआड़ी सरल अना मोरो बोझा हलको से।”
موجودہ انتخاب:
मत्ती 11: PSP25
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
The Powari Bible© The Word for the World International and Powari Madhya Pradesh, 2025.
