यूहन्ना 21

तीबिरीयान समुद्रान मिरे यीशु चेलाह देखाणो

1ओवतो तीबिरीयान समुद्रा आहनी यीशु आपणो चेलान ओगाण पोशो स्वताहा प्रगट किरील, तान स्वताहा ज्यानहोस प्रगट किरील: 2शिमोन पतरस, थोमा (जो दिदुमुस केतेह एता) गलीलामायवाला काना न्यावाला नथनेल, जब्दीन सोरा एने तान चेला दिहरा दुयू जन हे एक्ठाच जमाना येतो. 3शिमोन पतरसाने ताह कियील, “मी मासा देरणेन जात हि.” ते ताह कियेल, “आमु पुण तारहेऱ्यो आविह हि.” तेवी ते ताहेऱ्यो गीया एने नावीम जाइन, बोह्ना पुण ता राती ते कायीच देरू शकले नाहं.

4एविवूर वेगीस एनी एती तेवी यीशु मेरापूर उबरील रेणू; पुण चेला ताह ओलखिल नाहं कि तो यीशु हि. 5ओवतो यीशु ने ताह कियील, “सोरांन, तुमरेहे-यो काही मासा हि?” तास उत्तर आपील, “नाहं.” 6ओवतो तान कियील, “नावीन डाख-यो भागाम जालो टाकु, तर तुमूह काही जुडी” तेवी तास जालो टाकील पुण जुलुम मासाकेरिन ते जालाह पोशा ताफायरीन खेचेल जात नाह एता. 7केरीन तो चेलो जापोर यीशु प्रेम केरतालो ताह तो पतरसाह कियील, “हा तर प्रभु हि, ताहे-यो शिमोनान हे होमलील कि तो प्रभु हि तेवी तान आपणा बाहेर फाडका पेरेल एने पाण्यामाय उडी मारना कारण तो उघडा एतो.” 8पुण दिहरा चेला नावीम मासा से बोरील जाल खेचतीन आवा, काहाकाय ता मेरा से सेटा नाह एता, दुय होव आथ सेटा एता.

9तेवी ते मेरापूर आवा तास ता जागापूर हेलगतालो एईच कियील आकठो देखील, तापोर मासा एने रूटू भूजनेनकेरता मिलील एता. 10यीशु ताह कियील, “तुमूह जे ऐवी मासा दिरील हि, तामायरीन काही लीन आवो.” 11ओवतो शिमोन पतरस नावीपोर गीयो एने मोठला माशांनी भूरील जालो मेरापूर खेचील जालामाय ओलोक मासा एता तेभी जालो फाटनो नाहं. 12यीशु ताह कियील, “याहारू आवो, एने जेवण केरू” तान चेला मायरीन कुणीन हि इमुत आवा नाहं कि ताह फुसणे जुवी, तू कूण हि? कारण तास ओलखिल एता कि तो प्रभु हि. 13यीशु ओगाण गीयो एने तान रूटू लीईल एने ताह आपील एने ओहलाच मासा पुण आपील. 14एविवूर हि तिसरी टाइम एती जेवी यीशु मरनेनओवतो जीवतालू इयेलपूर आपणो चेलान ओगाण तो प्रकट एनो.

यीशु एने पतरस

15ओवतो ताहे-यो तान जेवण एय गीयो तेवी यीशु ने पतरसाला कियील, “यूहन्नान सोरा शिमोन, जोलाक प्रेम हे मारपुर केरणू काय तू ताणओंगानरीन होवटो प्रेम मारपुर करने? पतरसाने यीशुह कियील, होव, प्रभु, तुवाह मालूम हि कि तारपोर प्रेम करने यीशु ने पतरसाला कियील, मारी कोकरा चार.” 16तो ताह दिहीरीवार कियील, “यूहन्नान सोरा शिमोन, काय तू मारपुर प्रेम करने? पतरसाने यीशुह कियील, होव प्रभु, तुवाह मालूम हि कि तारपोर प्रेम करने यीशु ने पतरसाला कियील, मारो मेंढरान राखवाली केर.” 17यीशु पतरसाला पोशो कियील, यूहन्नान सोरा शिमोन, काय तू मारपुर प्रेम करने? तेवी पतरस जादा नाराज एनो कि यीशु ताह तीस-यांदा फुसील, काय तू मारपुर प्रेम करने? तेवी पतरसाने यीशुह कियील, “हे प्रभु, तुवाह आखा काही मालूम हि, तुवाह मालूम हि कि मी तारपोर मी प्रेम करने यीशु ने ताह कियील, मारो मेंढराह चार.” 18मी तुवाह खेरो किथे, ताहे-यो तू जुवान एतो तेवी तू आपणो कोमराह रुमाल बांधीन जाहारी ईच्छा एती ताजागेन जात एतो पुण ताहे-यो तू डावाला एय तेवी आथ सेटो केरुहू एने कूण दिहरो तारो कोमरोह रुमाल बांधीन ज्याडगी तू जाहू नाह एतो ता जागापूर तुवाह लीन जाहू. 19तान हे देखाळण्यापूररीन कियील कि तो कायतान होस मृत्युसे बोगवानान महिमा केरुहू ओलोक केयीन तो ताह कियील मारो पासाण आव.

यीशु एने तान मोगालो चेलू

20पतरस पासाण वोलीन देखील, का जो चेलो ज्यापूर यीशु प्रेम केरतीन एतो, तो तान पासाण आविह हि हा तोच एतो ज्यान जेवण केरतीन येतो यीशुन छातीपूर वाकून फुसील एता, “हे प्रभु, तो कूण हि? जो तुवाह धोकामाय धेराविले तो?” 21ताहे-यो पतरस ताह देखील, तेवी तो यीशुह कियील, “हे प्रभु, यान काय एय?” 22यीशु ताह कियील, “जर मारी ईच्छा रेंय ताहउर तान न्याहीरीज रिजी तर तुवाह तान काय? तू मारो पासाण आव.” 23ज्यानहोस हि वात बायाकामाय इह्केरीन प्रकारे पोरचार एनो कि तो चेलो मारणार नाहं; यीशु हे कियील नाहं कि तो मारणार नाहं, पुण हे कियील एता, कि “जर मारी ईच्छा रेंय तर जेवीवोर मी पोशा आवूह, हा न्याहीरीज रिजी तर तुवाह तान काय?”

उपसंहार

24जोस तो चेलो हि जो ता वातू विषयी गवाही आपथु एने तान केरता हे लेखील हेते, आमूह मालूम हि कि तान गवाही खेरो हि. 25यीशु ने उंजू जादा कामे केरील हेते जर एक-एक केरीन ता आखा लेखील हि, तर मी विचार करने कि ते पुस्तक ओलोक एय गीयो हि कि आखा जगाम पोर तो होमाना नसतू.

موجودہ انتخاب:

यूहन्ना 21: NLXNT

سرخی

کاپی

موازنہ

شئیر

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Nahali (नाहाली) Bible by The Love Fellowship is licensed under Creative Commons Attribution-ShareAlike 4.0 License.

नाहाली کے بارے میں مزید معلومات حاصل کریں