Luka 17
17
Ko te Agahala
(Mat 18.6-7, 21-22; Mlk 9.42)
1Na vāgana atu ia Iehu ki ona hoko, “Ko nā mea e pākukū ai ia tagata ki te agahala, e mautinoa lava e tutupu; kae heāloa la te tino e fakatupu e ia! 2E hili ai mo te tino tēnā pe kana nonoa he fatupae lahi ki tona ua ma togi ai ki te tai, i lo mo ia ke faia he mea ke uma ai te fakatuatua mai kia te au, o hētahi o kilātou iēnei e tamaiti. 3Kikila lelei la ki nā mea a koutou e fai!
“Kāfai tō uho e fai hana mea kino kia te koe, apoapoaki ki ei, ma kāfai e halamō, oi fakamāgalo ai e koe. #Mat 18.15 4Kāfai e fakafitu ona fai ni ana mea kino kia te koe i te aho, ma lea vē atu kia te koe i nā taimi takitahi iēnā, ‘Ko au kua halamō,’ e tatau ke fakamāgalo e koe.”
Ko te Fakatuatua
5Kua lea atu te kau apohitolo ki te Aliki, “Fakatupu lahi kō to mātou fakatuatua.”
6Na tali mai te Aliki, “Kana ia te koutou he fakatuatua e vē ko te fuaefa o he fatu hīnapi, e mafai ke lea koutou ki te hūkāmolu,#17.6 hūkāmolu He lākau e kai ona fua ma e pa ki te 6 mita te loa. E fua i te tau māfanafana, kae malili ona lau i te tau mālūlū ‘Laga ake koe ki luga i nā aka e koe lava, ma fano ai oi tū i te tai!’ ma e uhitaki atu lava.
He Tiute o he Kaukauna
7“Ko ai nei he tino o koutou e iei hana kaukauna e fakamalūa te kelekele, pe leoleoa te lafumāmoe, e lea vē ki ei kāfai e foki mai i te fātoaga, ‘Hau loa oi kai?’ 8Kae e i na ka hē lea nei koe vēia ki ei, ‘Laulau mai loa taku meakai. Fai tō kofu kuka ma hau oi kikila taku meakai ke uma toku kai ma inu; ma ka uma loa tēnā, oi fātoā kai ai koe!’ 9E fakafetai nei koe ki te kaukauna auā kua fai e ia te mea na fakatonu e koe ki ei? 10E vēnā foki la koutou; kāfai kua uma te fai e koutou o nā mea uma kua fakatonu atu koutou ke fai, oi lea ai vē, ‘Ko kimātou ni kaukauna hē aogā; kua fai lava e kimātou nā mea e tatau ke kimātou faia.’ ”
Kua Fakamālōlō e Iehu nā Tino e toka Hefulu
11I te fanoga o Iehu ki Ieluhalema, na kui atu ai i te kelekele e tuākoi ai ia Hamalia ma Kalilaia. 12Kua pa atu ia ki hētahi nuku, oi na fakafetaui mai ai ki ei ni tamāloa e toka hefulu, nae maua i te lēpela. Kua tutū mamao mai 13kae taufōlua vē, “Iehu! Te faiākoga! Alofa mai kō kia te kimātou!”
14Na kitea atu kilātou e Iehu, oi na lea vē atu ai ki ei, “Olo la oi fakaali outou tino ki nā ohitāulaga.#17.14 fakaali outou tino ki nā ohitāulaga Ko nā tino e maua i te lēpela nae tatau ke iloilo o lātou tino e he ohitāulaga, ke fakamāonia ai ko kilātou kua mamā ma mafai ai ke auai ki nā tāpuakiga” #Lev 14.1-32
I te taimi na olo ai, na mālōlō ai lava. 15I te kiteaga e tētahi o kilātou ko ia kua mālōlō, oi na toe liliu mai ai, ma viviki ake ki te Atua i te leo lahi. 16Kua fakapakū fakapūlou ki te kelekele ki tafa o nā vae o Iehu, ma fakafetai ki ei. Ko te tamāloa ko he Hamalia. 17Kua lea atu ia Iehu, “E toka hefulu ia tino na fakamālōlō; ei fea la tētahi toka iva? 18Heā te kua nā ko te tino nukukehe oioti, te kua toe liliu mai oi fakafetai ki te Atua?” 19Oi na lea atu ai ia Iehu ki te tino tēnei, “Tū la ki luga oi fano; ko tō fakatuatua kua mālōlō ai koe.”
Ko te Mālō o te Atua.
(Mat 24.23-28, 37-41)
20I tētahi aho na fehili ai iētahi tino o te kau Falehaio kia Iehu, pe ko āfea te pa mai ai te Mālō o te Atua. Ma na tali vē atu ai ia ki ei, “E hē mafai ke iloa e tagata ona e kikila ki ni fakailoga, pe ko āfea te pa mai ai te Mālō o te Atua. 21Ka hēai he tino e lea vē, ‘Kikila, tēnei!’ pe lea vē, ‘Tēia i ko!’; auā ko te Mālō o te Atua e i loto ia te koutou.”#17.21 e i loto ia te koutou pe e iei fakatahi ma koutou
22Oi na vāgana atu ai ia ki te kau hoko, “E hau te taimi ka lagona ai e koutou te fia kikila ki he aho e fokotahi o nā aho o te Ataliki o te Tagata, kae ka hē koutou kitea. 23Kāfai e lea vē atu nā tino kia te koutou, ‘Kikila, tēnei!’ pe, ‘Kikila, tēnā!’ Koutou nahe olo oi mulimuli ki ei. 24Auā e vē ona napa te uila ma māinafia haukātoa ai te lagi mai i tētahi itūlagi ki tētahi itūlagi, ka vēnā foki lava te Ataliki o te Tagata i tona aho.#17.24 i tona aho ko iētahi tuhituhiga anamua e hē i loto te fakakupuga tēnei 25Kae e tatau ke maua muamua ia i puapuagā e lahi, ma teteke ki ei ia tagata o te tupulaga tēnei. 26E vē ko te mea na tupu i nā aho o Noa, ka vēnā foki lava i nā aho o te Ataliki o te Tagata. #Ken 6.5-8 27Nae kakai pea lava ma inu ia tagata, nae āvavaga ia tamāloloa ma fafine ke pa lava ki te aho na fano ai ia Noa ki luga o te vaka, oi na pa mai ai te lolo ma na fakaumatia uma ai kilātou. #Ken 7.6-24 28E vē foki lava ko te mea na tupu i nā aho o Lota. Nae kakai pea lava ma inu ia tagata; nae fefakatauaki a lātou koloa, totō o lātou fātoaga, ma fau o lātou fale. #Ken 18.20—19.25 29Kae i te aho na fano kehe ai ia Lota mai Hotoma, na to ifo ai te afi ma te teiō mai te lagi e vē he ua, ma na fakaumatia uma ai kilātou. 30Ka vēnā foki lava te mea e pa ki ei, i te aho e fakailoa ai te Ataliki o te Tagata ki te lalolagi.
31“I te aho tēnā, ko te tino e i luga o te tuāfale o tona fale, nahe fanaifo ki lalo ki loto o te fale ke kave ana mea; e vēnā foki te tino e galue i te fātoaga, nahe toe foki ki tona fale. #Mat 24.17-18; Mlk 13.15-16 32Ke koutou manatua te mea na tupu ki te āvaga a Lota! #Ken 19.26 33Ko nā tino e mānumanu ki o lātou ola, ka hē kilātou maua, kae ko nā tino e māumau o lātou ola, ka maua e kilātou. #Mat 10.39; 16.25; Mlk 8.35; Luk 9.24; Ioa 12.25 34E lea atu au kia te koutou, i te pō lava tēnā, ka toka lua ia tino ka momoe i te moega e fokotahi; e fokotahi ka kave, kae tuku tētahi. 35E toka lua ia fafine ka tuki haito fakatahi; e fokotahi ka kave, kae tuku tētahi.” 36#17.36 Ko iētahi tuhituhiga e fakaopōpo ki ei te fuaikupu 36: E tokalua ia tamāloa ka gālulue i he fātoaga: e fokotahi ka kave, kae tuku tētahi (kikila ki te 24.40)
37Oi na fehili atu ai ki ei te kau hoko, “Te Aliki, i fea?”
Na tali mai ia Iehu, “Ko te mea e iei te tinooti, ka tumu atu foki ki ei nā āeto.”
موجودہ انتخاب:
Luka 17: TOKU
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bible Society New Zealand Charitable Trust
