Rom Shúu Fù
Shúu Fù
Por‑iì sàŋ ŋwàʼ və̀n fo kintatì ke wìr Kristu ke kí dzəə̀n é *Rom ki, aá fíʼ kiíy mo yéʼéy rəə́ dzəə̀n, é bo wù wáa dù, e ghan áwune. A wù‑uù wày ne ji wun du, e yèʼéy áwune fó shintàm shímóʼ shí, aáwune tóm wun, é bo wù tósín, a dù e wòŋ Spen. Wù nén a naàrì e ŋwàʼ fèn mo Nyùy‑iì sìysìn ji dzə̀ wìr ghàn, e bó a dzə wir Nyùy bìʼ Kristu, a dìn mo dzə̀ kinyo ke Kristu ki sə̀ wír, é wù wáa kiíy móo lì dzəʼə̀m rə́, a yu a dzə̀ fo Nyùy. A ŋwàʼ və̀ne din kinyo kidzə̀m ke Por yéʼeyì, e shaà aŋwàʼ və́ ámóʼó adzə̀m.
Wù lòo kèʼ ŋwàʼ və̀n, e tòmbìy shàʼtì kintatì, a fèr aáwune mo wù rə́si bunrì fo áwune, e bóo shòy tím kinyò ke kí dzəə̀n é ŋwàʼ fèn. A kí dzə̀ jii, sáʼka Nyùy wo juŋ din a mo Nyùy mán vinyo ve wìr, li ŋgaàŋ ji wír woo là jay. A wù li a dzə̀ wír wo wù wayin shilív e Wan və Jesus Kristu wùn, a bó dzəə̀ yìmòʼ yòʼ kfə̀n dzə̀ shó gheéy (1.17).
Wù nén shaà fo mbìy, a sanrí tím kinyò kee shooy lèn e naáy naáy, a dìn ji wír adzə̀me dzə̀ ben, aá kù lì ne a lòn, kìn dzə̀ wír woó Juda, kìn bó yòʼ dzə̀ woó Juda, bìʼ fò á kù‑uù sí yú a dzə̀ fó vinyò ve bi ví adzə̀m. Dzə́ə ye dzə̀ Nyùy màn jay wìr sho nén a dzə cáʼ ji ŋgaàŋ wáy shilív e Jesus Kristu wùn ji wù bèʼèy ne a lòn və́ woo shooy. Wù nen kfə̀n a fèr mo wír ve á tatin wùn à Jesus Kristùu sí kér dzəʼə̀m a dzə̀ ye fíyi, bìʼ fo áwune siìn lèn ji wón Nyùy. Wùn à Nyùy nén a dzə kijuŋ, á wáa yu a dzə̀ fo Kiyoy ke wun woo Nyùy foon áwune, a kí fó áwune vitaáví, la á yòʼ dzə́ə a yiì vinyo ve mensə́ mev mè lim, wáy áwune a dzə̀ é lòn. Kèʼ fo kintsə̀m kee 5–8, Por wáa naàrì kinyo ke kí‑iì yiìn, bo Nyùy wáa fo sa nsər, a dìn ji bó nsər yòʼ fó vitaáví ve fó Kiyoy ke Ranén kí e wìr ji wù gháʼ vinyo ve bi ví. Por nen kfə̀n a sòv kinyo ke Nyùy sìysìn kùm wír veé Juda wùn à ve bó yòʼ dzəə̀n veé Judàa, a ghay kinyo ke kí‑iì yiìn, bo Nyùy shóʼ wír veé Juda ji Kristu woo Mfə̀ə́r wíy fəə fo áwuné ram, a bó á yòʼ fə̀m biíme lèn mo wù wìyìn. Wù nèn yèn ji Nyùy‑iì yiì bey ji sáʼka woo kùm Jesus Kristu fíʼ dù sa fo vitúm vi vidzə̀m, á lóo biimé, é wù li áwune ji wír və́, wír veé Judàa lóo yen, lóo tuy vinyè, aá wáa biimé sa. Por lóo màysì, a fèr mo dzə̀ wír Kristu, á wàa dzə, bo taaka mo dzə̀ fə́r wùn fə̀r, á wàa dzə. Wù wáa naàrì mo wìr wáa lìm fo Nyùy mo ntuʼ ye Nyùy bùʼùn wun sho dzəə̀n, a dìn mo dzə̀ wír Kristùu wàa yu sa sáʼ ye dzəə̀n yé wòŋ, a tir wíri fo wìr wáa leéy wùmòʼ ntéŋ ji wù nyaʼ vifá, a wù nyaʼ bèy a dzə̀ mo dìnèn Nyùy sho.
Vilíŋ ve ŋwàʼ
Shúu mbìyi wùn à tím kinyò ke ŋwàʼ 1.1‑17
Wìr dzə̀m kù lì ne lòn 1.18–3.20
Mo Nyùy ghán, e bó a lùŋèr wíri 3.21–4.25
Dzəʼə̀m ye fíyi ye yí lo fo Kristu 5.1–8.39
Kinyo ke Nyùy sìysìn kùm wír veé Isray 9.1–11.36
Liì wo dzəə̀n wo wìr Kristu 12.1–15.13
Ntir kinjòʼsìbàm wùn à shaʼtìi 15.14–16.27
موجودہ انتخاب:
Rom Shúu Fù: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL