Rom 4
4
Kinyo ke Abraham ki din mo dzə̀ wìr ghèén fo Nyùy
1A dzə̀ vèsən lì mfìʼ vinyò vìn fo ke kí‑iì kooyin Abraham woo tàr à ràm yér yeé Juda. 2A fèn dzə̀ ji Nyùy‑iì yèn wun ji wír woo là jay ji bìʼ fo wù‑uù lim mo Nyùy taʼà, bo yì‑iì dzə̀ wù wàa sùmrì wún. A bó yòʼ‑oò dzə̀ wù wàa ker kinyo ké a sùmrì wún shó e Nyùy si gheéy, 3#Kèʼlo 15.6. bìʼ fo Ŋwàʼ Nyùyi suuy jii, «Abraham‑eè biìmé kinyo ke Nyùy, Nyùy nèn lì wun ji wír woo là jay bìʼ shilív she wù‑uù wayin e wun wùn.» 4A bó ké Abraham kìn ki yòʼ dzə̀ moo ké wìr wo wù lìmèn lim, á láʼ, bìʼ fo dzə̀ á kù làʼ ŋgaàŋ láʼan, a bó kee shooy ki yòʼ dzə̀ mbùʼmé. 5Ké Abraham ki nén a dzə moo ké wìr wo bó wù yòʼ leey ji wun lim kifá ke dzə̀ á làʼ wun fo fo. Wù wáy kfə́ shilív a dzə̀ e Nyùy wùn ji dzə̀ kù yiì Nyùy, bo wun woo ŋgaà vinyò ve bi ví rán fó nsaʼ. Nyùy nèn lì wun líin ji wír və woo là jay. 6A Fòn Davir‑iì lo fèr mo wìr wo Nyùy liìn ji wír woo là jay yii shéʼri, a bó yòʼ dzə̀ ji wù kì lìm lim yímóʼó, bo Nyùy li wun bèy. Wù‑uù suuy jii:
7 #
Nsùyrì Nyùy 32.1‑2. «Bòŋ ké wìr ve Nyùy laysìn ajay vév,
téʼ vinyo vév ve bi ví téʼén.
8Bòŋ ké wìr wo bó Nyùy yòʼ kív njò se wù jáyí.»
9Mo yòŋèn Fòn Davir vijuŋ vìn, m nén a ghay jii, wù sà‑aà yoŋ a dzə̀ e wír ve á saŋen mbèʼ sév ji wír Nyùy, mo wù‑uù yoŋ sa vee là sáŋ a? Ke vèsən kiìn kí dzə̀ jii, Nyùy‑iì lì Abraham ji wír woo là jay a dzə̀ bìʼ fo wù‑uù wayin shilív e wun wùn. 10Vèsən nén a leéy jii, wù sà‑aà li bèy, aá náŋsín ne Abraham ji wir Nyùy, mo wù‑uù li, a bó á yóʼ ne kìíy ké *mbèʼ se saŋen sí á? Vèsən kì jii, wù‑uù li, a bó á yóʼ ne kìíy. 11Á nèn wìy a naŋsín a dzə̀ fó bàm ji wáa dzə kisəəm ké kinyò ke Nyùy‑iì yiìn, a wù dzə̀ə́ là náŋsín. A kí dzə̀ jii, Nyùy kù‑uù lì á wun líin ji wír və, bìʼ fo wù‑uù wayin shilív e wun wùn. Abraham nén a dzə ji tàr à wìr dzə̀m e kinyò ke Nyùy. Wù dzə̀ wo wìr ve á wáy shilív e Nyùy wùn, a wù li áwune ji wír və́, a bó á yoʼ fə̀m nàŋsín. 12Wù kfə́n a dzə wo wìr ve naŋsíné, a kù dzə̀ vee shó ve á wáy shilív e Nyùy wùn réŋréŋ mo tàr wòsən woo Abraham‑eè wayin, é bo á wìy a naŋsín wun, a bó yòʼ dzə̀ ve á kù náŋsin nàŋsín cáʼcáʼ.
Wìr kooy ŋkàʼme Nyùy a dzə̀ mo wù wáy shilív e Nyùy wùn
13Kímóʼ kí nen kfə̀n a dzə jii, Nyùy‑iì lo kàʼ Abraham wùn à rám rəə́ ji áwune wíy yòv a ndzə. A bó wù yòʼ‑oò kaʼ bèy, bìʼ fo Abraham‑eè gheenen fo wun ji wù kì lem nsər. Wù‑uù kaʼ a dzə̀ bìʼ fo Abraham‑eè wayin shilív e wun wùn, wù lì wun líin ji wír woo là jay. 14A bèn dzə̀ ji Nyùy yii yii kinyo ke wù kàʼàn a dzə̀ e wìr wo wù gheen fo wun ji bìʼ fo wù lem nsər, bo wìr wo wù wáy kfə́ shilív e Nyùy wùn moo Abraham ji dzə̀ kù yiì Nyùy bo wun gheén, wáy bèy kisáŋ. A bó yòʼ dzə̀ Nyùy yiì kinyo ke wù kàʼàn ŋgaàŋ sho. 15Kinyo ke dzə̀ nsər kù yiì ki dzə̀ jii, Nyùy lóo sayrí wír fo nsər, shilív shí kù a nyar wun a nyárín. Kù mày cáʼ jii, a nsər‑iì bùŋ, bo bó wíri yòʼ jáy a vinyo e kúmé, tínsin shilív shé Nyùy.
16Kinyo ke kí yii, bo Nyùy wáa kàʼ wír e kifa a dzə̀ wo wù wáy shilív e wun wùn, kí dzə̀ jii, wun din á ji ŋkàʼmé və kù dzə̀ mbùʼmé, a wun buʼ wír sho kisáŋ, e kfə̀n a dìn sa jii, wù dzə̀ á fo wìr dzə̀m wo wù wáy shilív e wun wùn réŋréŋ mo Abraham‑eè wayin. A bó yòʼ dzə̀ fo wír ve á kér nsər se Mooseri cáʼcáʼ. A dzə̀ wun woo Abraham wo dzəə̀n tàr wòsən vee wír Nyùy adzə̀m 17#Kèʼlo 17.5. réŋréŋ mo vé‑eè saŋen ji Nyùy‑iì yòŋ e wun a jii, «M lèm ne wò ji tàr à vitum vinín.» Abraham nén a dzə tàr wòsən fo Nyùy si. A dzə̀ wun woo Nyùy wo Abraham‑eè wayin shilív é wùn wó, kfə́n a dzə wun wo wù yii, a wìr wo wù kpuun ne kfə́n e tin, kfə̀n yii, a vinyo ve ví yòʼ siìn ví kooy mo wù‑uù kàʼàn.
18 #
Kèʼlo 15.5. Nyùy‑iì lo kàʼ Abraham e kinyò, a bó yòʼ‑oò dzə̀ wù wàa ker kwaʼtì ji dzə̀ á kí kòóy bey. Yii bèy, wù ku yòʼ wày shilív e Nyùy wùn, a shìy ŋkàʼmé woo shooy. Wù nèn wìy lò, a dzə tàr à vitum vinín réŋréŋ mo Nyùy‑iì yiìn ne kàʼ sho jii, «Rám yée wíy a dzə nyanyày moo mejiy meé yuv.» 19Wáa dzə e ghan se Nyùy‑iì kaʼ wun e kinyò fèn, a wù sí mee kiyá wií, a bó wù yòʼ kér wán. Yii bèy, mo wù fə̀m‑eè sènmèn ne, a Sara woo yeè lav və dzə̀ kár, la wù yòʼ a moònìn gheéy. 20Wù ku wày shilív a dzə̀ e Nyùy wùn, a shìy kinyo ke wù‑uù kàʼàn, kí wáa lùm e wùn shiliv, wù wáa burí Nyùy ghán sidzə̀m, 21a wù‑uù biìmé féyì ji dzə̀ Nyùy kù yiì a kinyo ke wù kàʼàn wun sho. 22Mo Abraham kù‑uù wáy shilív a dzə̀ e Nyùy wùn, kí nèn yiì, wù gheén fo Nyùy, wù lì wun ji wír woo là jay 23réŋréŋ mo vé‑eè saŋen é Ŋwàʼ Nyùy. A kinyo ke vé‑eè saŋen fó ji Nyùy‑iì lì Abraham líin ji wír və kin ki yòʼ dzə̀ kfə́ wùn mòʼón gheéy. 24Vé‑eè sàŋ sá fo vèsən adzə̀m ve Nyùy li lèn sa ji və́ vee wír, bìʼ fo vèsən wáy shilív a dzə̀ e wun wùn, wun woo Nyùy wo wù‑uù fəərin Tàr wòsən Jesus Kristu fo kpu. 25Kù‑uù sìysì wun ji Kristu kpú fo vèsə́n vinyò ve bi ví, e kfə̀n fə̀ə́r fo kpu ji wun mán ajay vesən, e fíʼ lì ji wír vee là jay.
موجودہ انتخاب:
Rom 4: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL