Lim Aŋgàa Ntum 8
8
1a Saul tíy fo, bínsi.
Saul nyavrì e wír Jesuse
Kèʼ fo kishiíy fóo fèy, á ku nèn a fo ŋgeʼ ye biibí e kintatì ke wìr Jesus keé Jerusalem ki, á wáa nyeŋkír adzə̀m, a taʼrí e wòŋ woo Juda. Ámóʼó dùkìr e wòŋ *Samaria, ku bèr aŋgàa ntum Jesus e Jerusalem cáʼcáʼ. 2Wír ámóʼó ve vé‑eè ghvə́m Nyùyi ku yòʼ lì dzə́n Tefan, e dzəə̀mè, a dìy kpú rə́ féyì, a shèŋ kitú. 3A Saul kù taʼ kfə́ e laàr kintatì ke wìr Jesus láarin. Wù lo, wù wàa ghan e melav, a fətí aŋgàa biimé, kìn dzə̀ woo wiíy, kìn dzə̀ woo lumèn, a dòm, a dù sho e lav sháŋ.
Filiv fiʼtì kinyo ke Nyùy e Samaria
4Aŋgàa biimé ve vé‑eè taʼrin víyi nèn a ghan virə́ʼ vidzə̀m, a fìʼtì kinyo ke Nyùy. 5Filiv dù kfə́ a dzə̀ é mvə̀mlaʼ Samaria, a fìʼtì kinyo kee kùm *Mfə̀ə́r wo Nyùy‑iì kàʼàn fó. 6Wír aníne wáa yu, e kfə̀n a yen viŋgaʼnìn ve vinyò ve wù yii, a kòŋ fó a yuurí kinyo ke wù fiʼtì. 7*Anyùy ve á jívir wírií lo, á wàa rəəmé, a fəəkír fo wírí wùn, á wàa bonén anín, aàŋkivkìr wùn aàntèŋe bónen sa nyanyày. 8Kishéʼrì ke kuʼùn kí nèn a dzə e mvə̀mlaʼ foo fèy.
9Wìr wùmòʼ wáa dzə e mvə̀mlaʼ fèn, a yírí dzə̀ Simon, a wù‑uù sí din sə́m rə́, e kèʼ fo ŋgùʼ, yoŋ kitú kfə́ ji wír wo ghaʼán wùmòʼ, a wír veé Samaria adzə̀me leey, kér gháʼ. 10Wìr dzə̀m ku nèn a yuurí shúu və́, à wír ve kuʼkìné shó, a suúy jii, «Simon və̀n dzə̀ nyùy wùmòʼ wo á yoŋ ji Vitaáví ve Ghaʼán ví.» 11A vé‑eè yuúri kinyo kfə́ bey, bìʼ fo wù‑uù sí din sə́m rə́, e kèʼ fo ŋgùʼ, a wíri yén, kér gháʼ. 12Mo Filiv wìyìn, a fìʼtì sáʼka Nyùy wo juŋ woo kùm Jesus Kristu, a naàrì mo sáʼ Nyùyi dzəə̀n, wìri nèn a biimé, à vikìy, à vilum, á wáa way áwune é ndzəv. 13Wúnwun woo Simon biímé sá, á wáy wun e ndzəv. Wù ku nèn a dzə e Filiv ghaŋ, a yen vinyo ve ghaʼtín ve wù‑uù yii, a ví din vitaáví vé Nyùy, a ker gháʼ.
14Aŋgàa ntum Jesus ve vé‑eè gòʼòn é Jerusaleme wìy yù ji wír veé Samariàa biìmé ne saa kinyo ke Nyùy, e nèn tùm Pita wùn Joon fó. 15Áwune dù, e yèn aŋgàa biimé vee shooy, e nèn a bùnrì ji Nyùy ku tùm á Kiyoy kfə́ ke Ranén kí fo áwune, 16bìʼ fo kí yòʼ‑oò ló ne wìy fo áwune. Á kù‑uù wày áwune é ndzəv a dzə̀ e Taàtá Jesus yir cáʼ. 17Pita wùn Joon bùnrì, e nèn neèr wó yév aáwuné vitu, Kiyoy ke Ranén kí wìy fo áwune.
18Simon yén mo aŋgàa ntum Jesuse neèrìn wó e wírí vitu, Kiyoy ke Ranén kí wìy fo áwune, wù nèn a fo mbàm aáwune, 19a suúy jii, «Vèn ku fò mo vitaáví sá, m lóo neèr wó e wìr kitu, é Kiyoy ke Ranén kí wáa wìy fo ŋgaàŋ.» 20Pita bìnèr sho jii, «Vèn à mbàm sé see shooy si ku dù duùn é və̀y. À kwaʼ ké ji dzə̀ wìr yùn fómo Nyùy e mbàm si a? 21Bó yòʼ dzə̀ féyì à wàa ker kilíŋ e mvə̀m kinyò fèn, bìʼ fo shilív shé shi yòʼ dzə̀ shigheénén fo Nyùy. 22Ku bìnèr shilív shé shi fó kwàʼtì ye bi ye à kér rə̀n, a lon fo Nyùy Tàr ji wù laysin kinyo ke bi ke à kì taʼ, e yiì kìn. 23M yén ji kighèʼ ki bìvír ne shilív shé, aà sì kwǎn vinyò ve bi ví.» 24Simon nèn a lon Pita wùn Joon jii, «Vèn kú a bùnrì fo Nyùy Tàr ji lá kinyo kímóʼ kí fo ve vèn suuy vìn ki yòʼ kòóy mo.»
25Áwune màysì, e fìʼtì kinyo ke Jesus, e naàrì mo wù dzəə̀n, e nèn lò, a kfən e Jerusalem. Á lòo kfən, a ghan e ntèʼ seé wòŋ Samaria símóʼ sí sinín, a fìʼtì sáʼka Nyùy wo juŋ fo.
Wìr woó Etiopia biímé Jesus
26Nshìylav Nyùy Tàr siíy, e wìy, e yèn Filiv, e sùúy sho jii, «Ku lò, a səy səyín é mbìv ròŋ, mee fo, à wàa jùmrì dzə́ə ye yì lo fo Jerusalem, tósin wóʼ, du e Gasa.» 27-28Filiv nèn a səy fo. A wìr woó Etiopia#8.27‑28: Etiopia: Yì‑iì dzə̀ woŋ e ghaa ndzəv yee Naay mo á loòn fó Ejiv, a koʼ koʼón, e nə̀ə́ e nsay ye dzəə̀n lán ji Sudan, e kfə̀n nə̀ə́ e ye Etiopia. wùmòʼ kì dù, e bùnrì Nyùy e Jerusalem, a kfən fo laʼ, a wù ghán a dzə̀ é kar ye səŋ nyám si. Wù‑uù dzə̀ wír wo kuʼùn é wòŋ Etiopia, a kér wun kitáv ké Yaà Kandar wo wù sáʼ fó. Wù wáa dzə e wùn kar, a yòŋ kinyo fo ŋwàʼ wo Aysaya woo ŋgaà ntum Nyùy‑iì saŋen. 29Kiyoy ke Ranén kí nèn sùúy e Filiv jii, «Kóʼtí, a ghan e ghaa kar fèy.» 30Filiv nyéŋrí, e dù e ghaŋ wo, e yù, a wù yoŋ ŋwàʼ Aysaya. Wù nèn dzə̀r shó jii, «À kù yòʼ yoŋ bèn, yú kinyo ke ŋwàʼa suuyì a?» 31Wù bìnèr jii, «A dzə̀ m yù é le, a bó wìr yoʼ tòʼtí e mò?» Wù nèn sùúy ji Filiv kóʼ, é wùn wun wàá dzəʼəm é kar. 32#Aysaya 53.7‑8 (Grik). A kinyo ke wù‑uù yoŋ fo ŋwàʼ fèy ki dzə̀ jii:
«Wù‑uù dzə̀ moo njiì wo á li, e dù, e see.
Kfə̀n a dzə moo wan njiì wo á lóo kom wuy, la wù yòʼ a toŋ.
Kù dzə̀ mo wù yòʼ‑oò ló a ghay sa kinyo.
33Vé‑eè shoor wun, la wìr wo wù bin kinyo kfə́ réŋ yòʼ a dzə.
Kfə̀n wíy a yòŋ la wón və́, a vé‑eè tìn ne dzəʼə̀m rə́?»
34Wìr wo kuʼùn və̀y nèn dzə̀r e Filiv jii, «Ku sùúy mo, *ŋgaà ntum Nyùy və̀n‑eè suuy kinyo kìn kùm la? Wù suuy a dzə̀ kitú kfə́ moo ké wìr wo sən á?» 35Filiv nèn kèʼ fo kinyò ke ŋwàʼ fèy, a naàrì sáʼka wo juŋ woo kùm Jesus sho.
36Wùn wun kú a dù e dzəə. Á meé é kirə̀ʼ kímóʼ kí, a ndzə́ví dzə̀ fó, wìr wo kuʼùn və̀y suúy jii, «Ndzə́ví rə̀ne, a dzə̀ kfə̀n jìvír ka fo à wáy mo é ndzəv?» [37Filiv bìnèr jii, «Aà fèn wày ne shilív shé shidzə̀m e Jesus wùn, bo dzə̀ m wày wò e ndzəv.» Wù bìnèr jii, «M biìmé ne ji Jesus dzə̀ á Wan Nyùy.»] 38Wù nèn sùúy jii, á tiír á kár. Á tiír, wùn Filiv sə́ʼə́y, e nə̀ə́ e ndzəv, Filiv wáy wun sho. 39Á fəə́ fó ndzəv, Kiyoy ke Ranén kí nèn lì Filiv fo fo, la wìr wo kuʼùn və̀y yòʼ dzəə yèn wun gheéy. Yii bèy, wù kú a dù dzə́ə rə, a sheʼrí. 40Filiv lòo sìn, a wù sì é ntèʼ yee Asotur. Wù nèn a shaà, a fìʼtì sáʼka Nyùy wo juŋ ntèʼ sidzə̀m, e dù, e mèé e mvə̀mlaʼ Sisaria.
موجودہ انتخاب:
Lim Aŋgàa Ntum 8: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL