Lim Aŋgàa Ntum 6
6
Ŋgaà lìm woo saàmbà
1Wáa dzə e ghan fóo fèy, kintatì ke wìr Jesus ki kú a kùʼ, a dù duùn fó mbìy, a wír ámóʼó súŋnin lám woo fó laʼ, ámóʼó wó Grik. Ve vé‑eè súŋnin Lám Griki nèn lò, a ghvə̀vrì vee fó laʼ jii, á jav vifá e vikǐy ŋkfəə, bóʼ a vee áwuné mbìv. 2Aŋgàa ntum Jesus vee nshòv sibaà e ghvə̀me nèn kùm wír veé kintatì adzə̀m, e sùúy jii, «Kí yoʼ ghèén ji ver vee aŋgàa ntume shaa fó a fìʼtì kinyo ke Nyùy, a leéy a dzə̀ fó vifa ve yi. 3Afə̀r ver, mo kí dzəə̀n ben, kí bòŋ ji vèn shóʼtí wír saàmbà fo věn mvəm, aá wáa lìm vinyo vee shooy. Vèn lóo shoʼtí, vèn lèéy a dzə̀ wír ve wìr dzə̀m biíme ji dzə̀ vee là kiloʼ, e kfə̀n a dzə wír ve á kiìn vinyo, Kiyoy ke Ranén kí rún aáwuné meliv. 4Ver vee aŋgàa ntume sí yiì a yu kér a dzə̀ fó bùnrì, a fìʼtì kinyo ke Nyùy.»
5Wíri yú kinyo kee shooy, kí bòŋ áwune adzə̀m. Á nèn shòʼtí wíri, a wùmòʼ‑oò dzə̀ Tefan wo wù‑uù biimen Nyùy e ŋàŋ, Kiyoy ke Ranén kí kfən rùn e wùn shiliv. Ámóʼó Filiv wùn à Pokarur, à Nikanor, à Timon, à Pamenar, à Nikolar woó Antiyok wo wù‑uù bìnkìn bínkin ji wír woó Juda. 6Á nèn lì wír vìn, e dù, e dìn aàŋgàa ntum Jesuse. Áwune neèr wó yév aáwuné vitu, e bùnrì fo áwune. 7Kinyo ke Nyùy ki nèn a sàmèr, kintatì keé Jerusalem ki wáa kùʼ kùʼùn, a dù fo mbìy. Atàá cùu wáa way sa shilív e Jesus wùn anín.
Á tóy Tefan e kinyò
8Tefan wo vé‑eè shoʼon və̀n‑eè dzə̀ wír, a Nyùy leey fo wun e ŋàŋ, fó wun vitaáví, a wù yii vinyo ve ghaʼtín ví e wírí mvəm, a ví din vitaáví vé Nyùy. 9Wír ámóʼó nèn wìy, e kèʼ mbìʼ wùn à Tefan, a dzə̀ wír ve vé‑eè kér ŋgày bùnrì ye á yoŋ ji ye wìr ve á bòyìn ne. A kù dzə̀ sá wír veé Juda ve á wiy fo vitum vee Serina wùn à Aleŋsandria, à Silisia, à Asia. 10Wùn à Tefan wáa bìʼ bèy, a bó yòʼ‑oò dzə̀ áwune bìnèr kinyo kfə́ gheéy, bìʼ fo Kiyoy ke Ranén kí‑iì fó wun vifií é ŋàŋ.
11Kí gháʼ, á nèn bàyír wír ámóʼó, á wáa boʼtí jii, vé‑eè yù, a Tefan kuurì a Mooser wùn Nyùy. 12Á bèy kí ku nèn ŋàʼár melív me wíri, e kfə̀n ŋàʼár me atǎr wòŋ wùn à me wìr ve á duŋrì nsər Nyùyi. Á nèn koò Tefan, e dù sho fo vé wòŋé si. 13Wír vìyi kfən wìy e vé kimboʼtì ámóʼó, á wáa toy vinyo e Tefan bàm, a suúy jii, «Bó wìr və̀n yòʼ yii dzə́ là fó kù a kuùrì *lav cù rə̀n wùn à *Nsər Mooser. 14Vèr‑iì yù, a wù suuy jii, Jesus woó Naasarer və̀y wíy kèr lav cù rə̀n, e kfə̀n kuvsín liì wòsən wòŋ wo Mooser‑iì lèmèn e dzə̀m.» 15Wír ve vé‑eè dzəə̀n é lav nsaʼ foo fèy adzə̀me nèn tùy sí e Tefan wùn, e lòo yen, a vishí və́ ví bínkír ne, a kìʼ moo vé nshìylav Nyùy.
موجودہ انتخاب:
Lim Aŋgàa Ntum 6: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL