Lim Aŋgàa Ntum 17
17
Por wùn Silar dú é Tesalonika
1Por wùn Silar nèn a dù, a shaà e mvə̀mlaʼ yee Amfipolir wùn à yee Apolonia, e tòsín, e mèé e Tesalonika fo ŋgày bùnrì wìr veé Juda yìmòʼ‑oò dzəə̀n. 2Por nèn a dù e ŋgày bunrì foo fèy mo wù kù yii yii, a suŋnín wùn à wíri fó vishiíy vé bam vitaár, a toʼtí Ŋwàʼ Nyùy aáwune. 3Wù‑uù din fo fo ji *Mfə̀ə́r wo vé‑eè shiyì kù‑uù waà wíy yen a ŋgeʼ, e kfə̀n fəə fo kpu, a suúy jii, Jesus wo wun fiʼtì aáwune lèn dzə̀ á Mfə̀ə́r woo shooy. 4Ámóʼó yú, e biìmé, e tàtí Por wùn Silar. Wír veé Grik ve vé‑eè sí ghvə́m Nyùy, wùn à vikǐy wìr ve kuʼkìn ámóʼó tátí sá áwune anín.
5Wír veé Juda ve vé‑eè tenené nèn a ghèʼ Por wùn Silar, e bàʼtí wír ámóʼó ve vé‑eè ghán, sev kisáŋ, wùn áwune kèʼ melaà. Ntèʼ nèn tàtí e dzə̀m, e keèmè, e dù, e kìv lav Jason ji á taʼ a Por wùn Silar, e fəə́r, e fo e wír vee fó ndzəə. 6Á tàʼ ntéŋ, e nèn sə̀ŋ Jason wùn aàŋgàa biimé ámóʼó, e dù sho fo atǎr ntèʼé, a waamé jii, «Wír vìne ghán, binèr woŋ, a wú kfə́n tsə̀ə́tsəŋ. Aá wìy ne sa lèn e ntèʼ fen, 7Jason səə́sí, e wày e wùn lav. Áwune shóʼor nsər se Fòn woó *Rom, suuy jii, ‹Wo sən woo fon dzə̀ shó, aá yoŋ ji Jesus.› » 8Atǎr ntèʼ wùn à wíri yú bey, kindzə́m kí gwàr áwune. 9Á nèn kàn Jason wùn aŋgàa biimé vìyi, á sòŋ kishóv fó kfə̀n wìy mùm kímóʼ kí, é bo á maʼti áwune, aá wáa dù.
Por wùn Silar dú é Beria
10Ndzə yiì sə̀n, aŋgàa biimée lì Por wùn Silar, e tsə̀nsí, á wáa dù e ntèʼ yee Beria. Á dù, e mèé fo, e kfə̀n dù e wír veé Judàá ŋgày bùnrì. 11Wír veé Juda vee fóo wáa dzə wír, aá yii kwaʼtì kinyo, e shaà veé Tesalonika. Á nèn a ker shií fó a yuurí kinyo ke Por wùn Silar. Lóo yuurí, á wàa yòŋ Ŋwàʼ Nyùy vishiíy vidzə̀m, a leéy fo fo ji kinyo ke áwune suuy ki sà kù yòʼ dzə̀ réŋ á? 12Á nèn lò, e biìmé anín. Fo mbìv wìr veé Grik, vikǐy wìr ve kuʼkìné biímé sá anín, vilum ámóʼó wáa biimé sa. 13Wír veé Juda ve vé‑eè dzəə̀n é Tesalonikàa siíy, e yù jii, Por sí fiʼtì a kinyo ke Jesus e Beria, e nèn wìy, e bàyír wíri, á wáa tàʼ melaà. 14Aŋgàa biimée ku nèn tsə̀nsí Por, wù wáa dù dzə́ə fó shùu rìbà ndzə̀v. Silar wùn Timoti siíy, e gòʼ kév é Beria. 15Wír ve vé‑eè tsəənen Pori dù, e mèé e Aten, e nèn màʼtì wun fo. Áwune lòo kfən e bàm, Por tiísí ji Silar wùn Timoti ku wìy a cér.
Por dzə̀ é Aten
16Por ku nèn a shìy Silar wùn Timoti e Aten, e lòo ghan fo, e yèn, a ntèʼ dzə̀ anyùy anyùy, a shèŋ kitú, a rə̀m. 17Wù nèn dù e wír veé Judàá ŋgày bùnrì, a suŋnín wùn áwune, à wír veé Grik ve vé‑eè wiy sa, bunrì foo. Wù kfə́n a dù sa e virə̀ʼ vé way vishiíy vidzə̀m, a suŋnín wùn à wíri fó. 18Aŋgàa yeʼéy ámóʼó yén wun fo, a dzə̀ ve vé‑eè yéʼey kinyo ke *Epikurur wùn à ké Shitoy ki. Por wáa yeʼéy áwune kinyo kee kùm Jesus, a fèr mo wíri wíy fəə fo kpu. Wùn áwune nèn a bìʼ kinyo kee shooy, ámóʼó wáa sày jii, «Kiyúŋ kísə ki táŋri a dzə̀ ka?» Aámóʼó suuy kév jii, «Kí shwínin mo wù súŋnin kùm anyùy ve fíyi.» 19Áwune nèn lì Por, e dù sho fo dzə̀ʼə̀m atǎr ntèʼ ye á yoŋ ji *Aropagur, e sùúy jii, «Vèr koŋ fó kfə̀n yu yéʼéy yé ye fíy rə̀yi lèn kijuŋ. 20Vinyo ve à yéʼey vímóʼ ví dzə̀ jeéy, a vèr taʼ ji á kiíy mo ví dzəə̀n.» 21A vé‑eè dzə́r bèy, bìʼ fo áwune vee wír veé Aten wùn à viŋgwìy ve ví dzəə̀n fó vi kù‑uù koŋ, a rəsí, a yuurí vinyo ve fíy vi, a bìʼ mbìʼ sho.
22Por nèn nànèn aàtǎr ntèʼ víyí ntìntìn, a suŋnín, a suúy jii, «Ven vee wír veé Aten, m yén ji vèn dzə́ bèn, a vèn ghvə́m anyùy e ŋàŋ. 23Mò‑oo lóo ghan e věn ntèʼ, a leéy virə́ʼ vén vé cù, e dù, e mèé fomóʼó, e yèn, aá sáŋ fó jii, ‹Kirə́ʼ ké nyùy wo bó á yòʼ kiìn.› Nyùy wo vèn sí ghvə́m, a bó á yòʼ kì və̀n, dzə̀ woo shó wo m suuy e vèn lèn.
24«Dzə̀ wun wo dzəə̀n Tàr à yùv wùn à nsay, bìʼ fo yì‑iì bomen wun ndzə wùn à vifá ve ví dzəə̀n shó vi vidzə̀m. A bó wù yòʼ yii dzə́ e lav se bomen wíri, 25a bó yòʼ dzə̀ sá wù wàa leéy ji wìr lim fo wun mo wun woo Nyùy kì búŋ kifá. Yii wun, bo wìr dzə̀m wáa yòy, a ŋèʼ, a ker vifá ve á kér shií shó vidzə̀m. 26Wù‑uù tòmbìy bòm wír e mòʼón, e nèn fèr vitúm vidzə̀m fo fo, e lèm kitú ke nsay kidzə̀m. Bo wù wáa fèr, a wù‑uù sìysì ne ghán se á wíy a dzə, e kfə̀n sìysì virə́ʼ jeéy jeéy ve á wíy a dzə sho. 27A wù‑uù yii bèy ji wíri fíʼ a tàʼ wun, lóo ghaà, e ghan símóʼ sí, aá wàá yén. Yii bèy, a bó Nyùy yòʼ yii dzə́ kwaʼda fo vèsən gheéy. 28A dzə̀ réŋréŋ mo wìr wùmòʼ‑oò suuyin jii:
« ‹Yii Nyùy, bo vèsən wáa ŋèʼ,
a ghan, a dzə mo á dzəə̀n.›
Kfə́n a dzə sa mo aŋgàa kimfèr vén ámóʼó‑oò suuyin jii:
‹Vèsən adzə̀m dzə̀ sá wón Nyùy.›
29«Mo vèsən dzəə̀n wón wun woo Nyùy, lá vèsən yòʼ a kwàʼtì ji mbom rə dzə̀ moo kibámmbó ke naŋsin wír e vifií və́ ví, kìn wù tòn a dzə̀ kisha, kìn wù sèm a dzə̀ tíy. 30Yì‑iì dzə̀ fó ŋgùʼ, a bó Nyùy yòʼ‑oò ló a nəə́ e mvə̀m vinyò ve wíri‑iì yii, a bó á yóʼ ne kìíy wun. Yii bèy, a wù suuy lèn ji wír adzə̀me biner á melív mev fó vinyò ve kisaŋ vi. 31A wù suuy bèy, bìʼ fo wù‑uù sìysìn ne kishiíy ke á wíy a saʼ nsaʼ wìr dzə̀m, a tinén réŋréŋ mo yì dzəə̀n. Wù‑uù shòʼ ne wír wo wù wíy tinén nsaʼ yee shooy, e lòo fəə́r ŋgaàŋ fo kpu, e dìn, wìr dzə̀m yén ji kinyo kee shooy ki wíy koóy rú.»
32Áwune yú, a Por suuy ji wìr wùmòʼ‑oò fəə̀ ne a fo kpu, á nèn a sheʼ sheʼén. Ámóʼó wáa suúy kév jii, «Vèr koŋ, e kfə̀n wìy yu kinyo ké kìn e ghan símóʼ sí.» 33Por nèn màʼtì áwune, e fəə̀. 34Wír ámóʼó ku yòʼ biìmé kinyo kfə́, e tàtí áwune. Wùmòʼ‑oò dzə̀ Dionisiyur wo dzəə̀n sá ŋgàŋ dzə̀ʼə̀m yee Aropagur rə̀n. Wùmòʼ wiíy, a yír rəə́ dzə̀ Damarir, à wír ámóʼó sá.
موجودہ انتخاب:
Lim Aŋgàa Ntum 17: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL