Lim Aŋgàa Ntum 14
14
Por wùn Banabar dú é Ikoniyum
1Mo Por wùn Banabar duùn é Ikoniyum, kinyo ki ku kfə̀n kòóy áwune fó réŋréŋ mo kí‑iì kooyin é Antiyok. Wùn wun dù e ŋgày bùnrì yee fó, a fìʼtì kinyo kee kùm Jesus e dzəə ye wír veé Juda wùn à vitúm vi wáa biimé nyanyày. 2Yii bèy, wír veé Juda ve vé‑eè tenené nèn lò kév, e bayír wír ve bó yòʼ dzəə̀n veé Juda ámóʼó, e bìvír vifií vév, á wáa bàn aŋgàa biimé. 3Por wùn Banabar ku yòʼ a dzə fo ntàmda, a fìʼtì kinyo ke Taàtá Jesus tèéter, a naàrì mo wù bùʼùn wíri, a fo áwune vitaáví, á wáa yiì viŋgaʼnìn ve vinyò, ví wáa dìn ji kinyo ke áwune fiʼtì ki dzə̀ á rú. 4Á wáa fìʼtì bèy, wír veé ntèʼ fóo fèyi nèn jàvsìn. Ámóʼó kfə́n e wír veé Juda ve vé‑eè tenené mbìv, ámóʼó kfə́n áàŋgàa ntum Jesusé mbìv.
5Wír veé Juda vìyi nèn tàtí wùn à ámóʼó ve bó yòʼ dzəə̀n veé Judàa, e dù, e yèn atǎr ntèʼ, wùn áwune táŋ ji á wáa nyàvrì a aàŋgàa ntum Jesuse, a yuyrí e tíy sí. 6Áwune kiíy, e nyèŋ, e dù e wòŋ woo Likonia, a ghan e mvə̀mlaʼ yee Lista wùn à yee Derbe, e kfə̀n a ghan e ntèʼ see fó ghaŋ, 7a fìʼtì sáʼka Nyùy wo juŋ fo.
Por wùn Banabar fér ŋkivkìr e Lista
8Wìr wùmòʼ wáa dzə e Lista foo fèy, a vé‑eè dzəə wun, a sì ndzə́m, a bó yòʼ dzə̀ wù ghàn. Wìy lòo dzə e kishiíy kímóʼ kí, wù wáa dzə, 9a yuurí kinyo ke Por fiʼtì. Por yén, a wìr və̀y biímé ji dzə̀ Nyùy fèr á wun, 10wù nèn yòŋ kitávín jii, «Nànèn, e tìím e yuv.» Wù ku nèn lìy é yuv, a ghan. 11Màŋgòŋ yén kinyo ke Por mùmèn, e nèn a buʼ rəə́, a suúy aáwuné làm jii, «Anyùyi sə̀ʼə́y ne e nsay, aá shwínin wíri, e wìy fo vèsən.» 12Á nèn shù ji Banabar dzə̀ á nyùy wo kuʼùn wo á yoŋ ji Siyur, a Por, mo kù yám súŋnin wun, dzə̀ á nyùy woo Hemar.#14.12: Anyùy vìne dzə̀ vé wìr veé Grik, a Hemar dzə̀ wo wù yii ghán ntum sév.
13Lav ye áwune‑eè cu nyùy woo Siyur və̀y sho‑oò dzə̀ é ghaa laʼ foo fèy. Taà cù woo fó nèn lì lúm se nàʼ wùn à vibuushì vé vifa vi, a wìy sho e shùu kibùʼ ji wùn à wíri cu Banabar wùn Por sho. 14Áwune yú kinyo ke wír vìyi taʼ, e yiì, kí nyár áwune, á sàr ndzə̀y fó wùn, e tò fó ntìntìn, a waamé jii, 15«Wír vìn, vèn yii kin a dzə̀ ka? Vèr kù dzə̀ kér cáʼ ji wíri réŋréŋ moo ven. A vèr wìy fèn ji á fiʼti ven sáʼka Nyùy wo juŋ, é vèn fiʼ màʼtì anyùy kisaŋ vìn, e kfə̀n fo Nyùy wo wù dzəə̀n e tin. A dzə̀ Nyùy woo shooy wo wù‑uù bomen yúv wùn à nsay, à ndzə́ví, à vifá ve ví dzəə̀n shó vi vidzə̀m. 16Wù‑uù màʼtì wíri fó ŋgùʼ, á wáa yiì mo á koŋè. 17Yii bèy, wù kú a yiì vinyo ve juŋ vi e wíri, aá fíʼ a kiíy ji wun dzə̀ á sho. Wù fó ven wuú é ghan se gheenén sí, a vifá vi kúyí, a vèn kér vifá ve yi, yí, shéʼri.» 18Por wùn Banabar suúy bey, la wír vìyi yòʼ fə̀m a tàʼ, e yàr fó cù áwune gheéy.
19Wír veé Juda ámóʼó nèn dù wìy fo Antiyok wùn à fó Ikoniyum, e sə̀ŋrì wír anín aáwuné mbìv. Á tsə́mrí Por e tíyí, e sə̀ŋ, e fəə̀sín mvəmlaʼ sho, e màʼày, a ki ji wù kpù á ne. 20Wír Jesuse wìy, e bànén e kitu wo, wù nèn yiì lò, e kòʼór, e kfə̀n é mvə̀mlaʼ foo fèy. Yì rán kibvəə́shí, wùn Banabar nèn lò, e dù e mvə̀mlaʼ yee Derbe.
21Áwune fìʼtì sáʼka Nyùy wo juŋ e Derbe, e kòóy aŋgàa biimé anín, e nèn lò, e kfə̀n, a ghan e mvə̀m sé laʼ see Lista wùn à Ikoniyum, à Antiyok e wòŋ Pisidia foo fèy. 22Á wáa ghan bèy, a lùmèr melív me aŋgàa biimé, a tir áwune ji á kú a ghar kinyo ke Jesus kijuŋ, a kiíy a ji wùn áwune kér fó wìy yen ŋgeʼ sinín, e bóo wìy nəə́ e Nyùy mvə̀m saʼ. 23Áwune kfə́n a lèm atǎr vintatì virə́ʼ vidzə̀m. Lóo lèm, á wàa lèm jíŋ, a bùnrì, a way áwune e Taàtá Jesus wo áwune biimén kiwo.
Por wùn Banabar kfə́n fó laʼ
24Áwune shaà woŋ Pisidia, e tòsín, e dù e wòŋ woo Pamfilia, 25a fìʼtì kinyo ke Nyùy e mvə̀mlaʼ yee Pega. Á màysì fo fo, e sə̀y é mvə̀mlaʼ yee Ataliya. 26Áwune nəə́ é kikoŋ fo fo, a ghan e rìbà ndzə̀v, a kfən e Antiyok, a dzə̀ fo vé‑eè wayin áwune e Nyùy kiwo, bo á wáa ghan, a yiì lim ye á màysìn rən.
27Á meé fó, e bàʼtí wír veé kintatì, a fìʼtì mo áwune ghán, a Nyùy sə́ áwune, mvəʼtì melív me wìr ve bó yòʼ dzəə̀n veé Juda, aá wáy shilív e Jesus wùn. 28Áwune nèn kfə̀n dzə̀ʼə̀m wùn aàŋgàa biimée fó ntàmda.
موجودہ انتخاب:
Lim Aŋgàa Ntum 14: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL