Lim Aŋgàa Ntum 11
11
Pita naárí kinyo ke kí kooyin e Konelur lav
1Aŋgàa ntum Jesus wùn aàŋgàa biimé veé wòŋ woo Juda adzə̀me nèn yù ji wír ve bó yòʼ dzəə̀n veé Judàa biìmé ne saa kinyo ke Nyùy. 2A wír ámóʼó dzə̀ áàŋgàa biimée mvəm, aá kù yii tíy kév ji á kér fó saŋ *mbèʼ se wìr wo bó yòʼ dzəə̀n woó Juda mo liì woó Juda dzəə̀n, é bo ŋgaàŋ gheén ji wir Nyùy. Pita wìy kfə̀n é Jerusalem, wír vìne nèn a roòmè, 3a suúy jii, «À du, ghán wír ve bó yòʼ dzəə̀n veé Juda, kfə̀n maysì, yíkir vèn áwune.»
4Pita nèn a naàrì kinyo ke kí‑ii kooyin é naáy naáy, a suúy jii, 5«Mò‑oò dzə́ e Joppa, bunrì, kinjeenjèm ki nèn lò, e shì mo, m yén, a kifá ki sə́ʼəy fo yuv, a kí dzə̀ moo kintsə̀m ké ndzə̀y kikuʼùn, aá ghár buú sikweè. Kí sə́ʼə́y, e tìím e mǒ si. 6M leéy mvə́m, e yèn, a nyám se koʼoyín sí dzə̀ shó kfəə́ si, kfəə́ si. A símóʼ sí dzə̀ see fó laʼ, símóʼ sí seé kwaʼ, símóʼ sí seé ndzəv, wùn à menə́n mè. 7M lòo yu, jì wìr yòŋ mo jii, ‹Pita, lò é yuv, a seerí, a kfər.› 8M bìnèr jii, nyaa mǒ Tàr, bó yòʼ dzə̀ m mùm. Bó m yòʼ‑oo yií ne wày kifá e mǒ shuù ke kí kóʼoyì, kér *kifàn. 9Jì rə̀y nèn kfə̀n sùŋnín fo yuv jii, ‹Lá à yòʼ a nyaŋsí kifá ji kí kóʼoyì, a Nyùy suúy ne ji kí dzə̀ kijuŋ.› 10Kí koóy bey akàŋ ataár, kifá kee shooy ki nèn kfə̀n é yuv.
11«Wíri ku nèn meè é shuù lav ye mò‑oò shiiy sho ataár. A vé‑eè tùm fó Sisaria ji á wiy, e jàŋ mo. 12Kiyoy ke Ranén kí suúy e mò jii, lá m yòʼ a nyàʼ fó dù a vèr à wír vìne. Aàŋgàa biimé veé Joppa vee ntuùfú víne‑eè lo dù sa vèr áwune, á dù, e nə̀ə́ e wìr və̀y lav adzə̀m. 13Mo vèr nəən, wù wáa fèr jii, wun‑eè yèn nshìylav Nyùy e wùn lav, yì suúy á ji wun tsə́nsí wír e Joppa, é wù jaŋ wír wo á yoŋ ji Simon Pita. 14Wù yíi wìy, é wù fiʼti á kinyo ke wùn à wír vee wùn laʼa wíy lùŋ fo fo. 15M ku nèn kèʼ, a fìʼtì kinyo, e lòo suŋnín, Kiyoy ke Ranén kí nèn wìy, e nə̀ə́ e wír vee shooyí meliv réŋréŋ mo kí‑iì nəən e vèsə́n meliv fó mbìy. 16M yén, e nèn kuùmé kinyo ke Tàr wòsən Jesus‑eè suuyin jii, ‹Joon‑eè wáy wíri é ndzəv, aá wíy a way ven a dzə̀ e Kiyoy ke Ranén kí kiwo.› 17Mo Nyùy‑iì bùʼùn wír vee shooy e fómo, a dzə̀ wùwun wo wù‑uù bùʼùn sá vèsən shó e ghan se vèsən‑eè wayin shilív e Tàr wòsən Jesus Kristu wùn, bo m dzə̀ kém la, e bó a shaʼnín kinyo ke yii Nyùy?»
18Wíri yú kinyo ke Pita kìn, kí gheén áwune. Á nèn a burí Nyùy, a suúy jii, «Bo Nyùy fò ne sa kilíŋ e wír ve bó yòʼ dzəə̀n veé Judàa ji á wáa bìnèr melív mev, e fíʼ wìy lùŋ.»
Kinyo ke Jesus ki dú é Antiyok
19Mo á kù‑uù sí rə́si fó ŋgeʼ e wír Jesuse, e kèʼ fo ghan se vé‑eè yuyrin Tefan, á nèn a nyeŋkír, a taʼrí. Wír ámóʼó dù e wòŋ Fənisia, ámóʼó dù kév é wòŋ woo Saypur, ámóʼó kfən dù sa e mvə̀mlaʼ yee Antiyok. Á du bèy, á kù a fìʼtì kinyo ke Jesus a dzə̀ e wír veé Judàa cáʼcáʼ. 20Aŋgàa biimé ámóʼó nèn dù wìy sa e Antiyok, a dzə̀ wír veé Saypur, ámóʼó veé Serina. Wír vìne nèn a ghan sa wír ve bó yòʼ dzəə̀n veé Juda, a fìʼtì sáʼka woo kùm Jesus aáwune. 21Nyùy nèn sə̀, áwune wáa bìnèr wír anín, á wáa way shilív e Jesus wùn.
22Kinyo kee shooy ki tó áàŋgàa biimé veé Jerusalemé kitùʼùr. Á nèn tùm Banabar e Antiyok fèy. 23Wù dù, e mèé fo, e yèn mo Nyùy bùʼùn wír vìy e vijuŋ vi, wù wáa sheʼrí, a tir áwune ji á kú a tiy a wùn à Taàtá Jesus shilív shimòʼón. 24Banabar və̀n‑eè dzə̀ wír woo nyaáŋ, a wù biímé Nyùy e ŋàŋ, Kiyoy ke Ranén kí wáa run e wun shiliv. Wír aníne nèn kfə̀n a biimé kinyo ke Jesus e Antiyok foo fèy, kintatì kfə́ kí wáa kùʼ.
25Banabar nèn wìy lò, e dù, a tàʼ Saul fo Tasor. 26Wù tàʼ, e yèn, e lì, wùn wun kfə́n é Antiyok. Áwune dzə̀ʼə̀m wùn à kintatì kee fó ki kiyá kifur, a yeʼéy wír aneénín. Kí nèn kèʼ a dzə̀ é Antiyok foo fèy, bo á wáa yòŋ aŋgàa biimé ji wír Kristu.
27Wáa dzə e ghan fóo fèy, wír ámóʼó lò fo Jerusalem, e wìy e Antiyok, a dzə̀ ve vé‑eè lo, á wàa yu vinyo fo Nyùy, a tiisí e wíri. 28Kiyoy ke Ranén kí nèn yiì, wùmòʼ woo wír nànèn, aá yoŋ ji Agabur, a tiisí jii, «Jìŋ ye ghaʼán wíy koo a woŋ dzə̀m.» Yì nèn wìy sìíy, a koo a dzə̀ é ghan se Kiladiyur‑iì dzəə̀n Fon woó *Rom. 29Aàŋgàa biimé veé Antiyoki‑iì yù ne fú Agabur rə̀y, e sìysì ji wìr dzə̀m suʼti á mbàm, aá sə́ afə́r vév ve á dzəə̀n é wòŋ woo Juda sho. Á lóo fo, wìr wàa fo a mo wù kérí. 30Áwune nèn sùʼ mbàm, e tùm Banabar wùn Saul sho ji á du, e wày áàtǎr kintatìí kiwo.
موجودہ انتخاب:
Lim Aŋgàa Ntum 11: LNB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2022 CABTAL