मत्ती 28

यीसू गो दुसर जी उठणो

(मरकुस 16:1-10; लूका 24:1-12; यूहना 20:1-10)

1सब्त गै बाद जद दीतवार गै दिन दिनगै दिनगै मरियम मगदलीनी अर दूसरी लुगाई मरियम कबर संभालण आई। 2जद सुरग ऊं प्रभु गो एक सुरगदूत बठै आयो हो। जद बिं टेम एक मोटो भुचाळ आयो। सुरगदूत आ'गे बो पथर हटागे बिं पर बेठग्यो। 3बिंगो रूप आकास गी बिजळी तरियां चमकै हो। अर बिंगा कपड़ा दूध गी तरियां धोळा हा। 4ओ देखगे कबर पर पेरो देण आळा सिपाई डरगे कांपण लागग्या। अर इंया हो'ग्या जिंया बे मरेड़ा होवै। 5जद सुरगदूत बां लुगाईयां नै केयो, “डरो ना। मनै ठा है थे यीसू नै ढूंडण लागरी हो। झिकै नै करूस पर चढायो। 6बो अठै कोनी। जिंया बण केयो, बो मरण गै बाद पाछो जींवंतो हो'ग्यो। आज्यो, बिं जिग्यां नै देखो, जठै बिनै सुणायेड़ो हो। 7अर जाओ। बिंगै चेला नै बताओ, बिनै मरेड़ा मू जींवंतो कर दियो। अर अब बो थारूं पेली गलील नै जाण लागरयो है। थे बिनै बठै ई देखोगी। झिको मैं थानै केयो है, बिनै याद राखियो।” 8बे लुगाईयां जद ई कबर नै छोड़गे खुसी ऊं भरगी। अर आ बात यीसू गै चेला नै सुणाण भाज पड़ी। 9एकदम यीसू बानै मिल्यो अर बोल्यो, “थानै सांती मिलती रेवै,” अर बां बिंगै पगां पड़गे बिंगी आराधना करी। 10जद यीसू बानै केयो, “डरो ना, मेरै संगीया कनै जाओ अर बानै गलील कानी चालण गो के दैयो। बठै ई मनै बे देखैगा।”

11अजे बे लुगाईया रा में ही कै, पेरेदारां भाजगे सारी घटना मुखिया याजकां नै जा'गे बताई। 12जद बुढा यहुदी नेतावां सागै रळगे एक योजना बणाई। बां सिपाईयां नै भोत सारो धन देगे केयो, 13“कै थे लोगां नै केईयो जद म्हे सूत्या हा तो यीसू गा चेला कबर पर आया अर बिंगी ल्हास नै चोर गे लेग्या। 14जे थारी ऐ बातां राजा तांई पूगैगी तो म्हे आपी संभाळ लेस्यां। थारै पर आंच कोनी आवैगी। 15जद बां पीसा लेगे बिंयाई करयो, जिंया बां केयो।” अर आ बात अजे तांई यहुदियां में इंयाई फेलेड़ी है।

यीसू गी आखरी आग्या

(मरकुस 16:14-18; लूका 24:36-49; यूहना 20:19-23)

16फेर बे ग्यारा चेला गलील गै बिं पहाड़ पर गेया जठै यीसू बानै बुलाया हा। 17बां यीसू नै देखगे बिंगी आराधना करी। पण केईयां गै मन में अजे तांई बेम हो। 18फेर यीसू बांगै कनै जा'गे केयो, “धरती अर सुरग गो सारो अधिकार मनै सूंपेड़ो है। 19ईंखातर जाओ। अर सारै देस गै लोगां नै मेरा चेला बणाओ। ओ काम थे पिता पुत्र अर पवितर आत्मा गै नाम ऊं बतिस्मो देगे करियो। 20झिका आदेस मैं थानै दिया, बां पर लोगां नै चालणो सिखाओ। अर याद राखियो, जगत गै अंत तांई मैं थारै सागै रेऊंगा।”

موجودہ انتخاب:

मत्ती 28: BGQ

سرخی

شئیر

موازنہ

کاپی