ایُّوب 10
10
1”میں اَپنی زندگی سے بیزار ہو چُکا ہُوں؛
لہٰذا میں دِل کھول کر شکوہ کروں گا۔
اَور تلخ رُوح کی بھڑاس نکال دُوں گا۔
2میں خُدا سے کہُوں گا کہ مُجھے قُصُوروار نہ ٹھہرا،
بَلکہ مُجھے بتا، کہ میرے خِلاف اِلزامات کیا ہیں۔
3کیا مُجھ پر ظُلم کرنے سے تُمہیں خُوشی ہوتی ہے،
اَور اَپنے ہاتھوں کی صنعت کی حقارت کرنا اَچھّا لگتا ہے،
تُو بدکار اِنسانوں کے منصُوبوں پر مُسکراتا ہے؟
4کیا تیری آنکھیں گوشت کی بنی ہُوئی ہیں؟
کیا تُو بشر کی مانند دیکھتا ہے؟
5کیا تیرے زندگی کے دِن فانی اِنسان کے دِنوں کی طرح ہیں،
اَور تیرے سال آدمی کے سالوں کی طرح،
6کیا تُو میری بُرائیاں ڈھونڈے،
اَور میری خطاؤں کی تفتیش کرے؟
7آپ کو علم ہے کہ میں مُجرم نہیں ہُوں،
اَور کویٔی شخص مُجھے آپ کے ہاتھ سے نہیں بچا سَکتا۔
8”آپ کے ہی ہاتھوں نے مُجھے اِس شکل میں ڈھالا اَور بنایا،
کیا آپ اَب مُجھے بدل کر برباد کر دیں گے؟
9یاد کرو کہ آپ نے مُجھے چکنی مٹّی کی طرح گوندھا۔
تو کیا اَب آپ مُجھے پھر خاک میں مِلائیں گے؟
10کیا آپ نے مُجھے دُودھ کی طرح نہیں اُنڈیلا
اَور پنیر کی طرح نہیں جمایا؟
11پھر گوشت اَور پوست سے ملبوس کرکے
مُجھے ہڈّیوں اَور رگوں سے جوڑ نہیں دیا؟
12آپ نے مُجھے زندگی دی اَور مُجھ پر رحم کیا،
اَور اَپنے فضل سے میری رُوح کی حِفاظت کی۔
13”لیکن یہ بات آپ نے اَپنے دِل میں چُھپائے رکھی،
اَور مَیں جانتا ہُوں کہ یہی آپ کا منشا تھا کہ
14اگر مَیں گُناہ کروں تو آپ دیکھ لیں گے
اَور مُجھے میری بدکاری کی سزا ضروُر دیں گے۔
15اگر مَیں گُنہگار ہُوں، تو مُجھ پر افسوس!
میں تو بے قُصُور ہوتے ہُوئے بھی اَپنا سَر نہیں اُٹھا سَکتا،
کیونکہ مَیں شرم سے لبریز ہُوں،
اَور تکلیف میں ڈوبا ہُوا ہُوں۔
16اگر مَیں اَپنا سَر اُٹھاؤں، تو آپ مُجھے شیر کی طرح دبوچ لیں گے،
اَور اَپنی دہشت اَنگیز قدر ت کا مظاہرہ کریں گے۔
17آپ میرے خِلاف نئے نئے گواہ لے آتے ہیں
اَور اَپنا قہر مُجھ پر بڑھاتے ہیں؛
آپ کے لشکر موجوں کی طرح مُجھ پر چڑھے آتے ہیں۔
18”پھر آپ نے مُجھے میری ماں کے رحم سے نکالا ہی کیوں؟
اِس سے قبل کہ کویٔی آنکھ مُجھے دیکھتی کہ کاش میں مَر گیا ہوتا۔
19کاش کہ میں پیدا ہی نہ ہُوا ہوتا،
یا رحم سے سیدھا قبر میں پہُنچا دیا جاتا!
20کیا میری زندگی چند روزہ نہیں؟
مُجھے چھوڑ دیں تاکہ میں چند لمحے خُوشی میں گزار سکوں۔
21اِس سے قبل کہ میں چلا جاؤں، جہاں سے کویٔی واپس نہیں آتا،
ظلمت اَور موت کے سایہ کی جگہ،
22وہ مقام جہاں راتیں بڑی تاریک،
سائے بڑے گہرے اَور ہر چیز بے ترتیب ہوتی ہے،
جہاں رَوشنی بھی تاریکی کی مانند ہے۔“
موجودہ انتخاب:
ایُّوب 10: UCV
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
اُردو ہم عصر ترجُمہ™، کِتاب مُقدّس
حق اِشاعت © 1999، 2005، 2022، 2024 Biblica, Inc.
کی اِجازت سے اِستعمال کیا جاتا ہے۔
دُنیا بھر میں تمام حق محفوظ۔
Holy Bible, Urdu Contemporary Version™
Copyright © 1999, 2005, 2022, 2024 by Biblica, Inc.
Used with permission.
All rights reserved worldwide.