یَشعیاہ 26
26
سِتائش کا نغمہ
1اُس وقت یہُودیؔہ کے مُلک میں یہ نغمہ گایا جائے گا:
ہمارا ایک محکم شہر ہے؛
خُدا نَجات کو
اُس کی فصیلیں اَور بُرج بنا دیتے ہیں۔
2پھاٹک کھول دو
تاکہ راستباز قوم جو اَپنے ایمان پر قائِم ہے،
وہ داخل ہو جائے۔
3جِس دِل کا اِعتماد آپ پر ہے
اُسے آپ ہر طرح محفوظ رکھیں گے،
کیونکہ اُن کا توکّل آپ پر ہے۔
4یَاہوِہ پر ہمیشہ بھروسا رکھو،
کیونکہ یَاہوِہ خُدا اَبدی چٹّان ہیں۔
5وہ اُونچے مقاموں پر رہنے والوں کو پست کر دیتے ہیں،
اَور اُونچے شہر کو نیچے لے آتے ہیں؛
وہ اُسے زمین کے برابر کرکے
خاک میں مِلا دیتے ہیں۔
6وہ پاؤں تلے روندا جاتا ہے
مظلوموں کے پاؤں تلے،
اَور مسکینوں کے قدموں کے نیچے۔
7راستباز کی راہ ہموار ہے؛
آپ جو خُود حق ہیں، صادق کی راہ ہموار کرتے ہیں۔
8ہاں اَے یَاہوِہ، آپ کے آئین کی راہ پر چلتے ہُوئے،
ہم آپ کے منتظر رہے ہیں؛
آپ کے نام اَور آپ کی یاد کے لیٔے
ہمارے دِلوں میں اشتیاق ہے۔
9رات کے وقت میری جان آپ کے لیٔے بیقرار ہو جاتی ہے؛
اَور صُبح کو میری رُوح آپ کی مُشتاق ہوتی ہے،
کیونکہ جَب آپ کا اِنصاف دُنیا پر ظاہر ہوتاہے،
تَب دُنیا کے باشِندے راستبازی سیکھتے ہیں۔
10ہر چند بدکاروں پر فضل ہو،
وہ راستبازی نہیں سیکھتے؛
راستی کے مُلک میں بھی وہ بُرائی کرتے رہتے ہیں
اَور یَاہوِہ کی عظمت کا لحاظ نہیں کرتے۔
11اَے یَاہوِہ، آپ کا ہاتھ بُلند ہے،
پر وہ اُسے نہیں دیکھتے۔
اُنہیں تَوفیق دیں تاکہ وہ اُس غیرت کو دیکھیں جو آپ کو اَپنے لوگوں کے لیٔے ہے اَور پشیمان ہوں؛
اَور اَپنے دُشمنوں کو اُس آگ میں بھسم ہو جانے دیں جو اُن کے لیٔے رکھی گئی ہے۔
12اَے یَاہوِہ، آپ ہمارے لیٔے اَمن قائِم کریں؛
ہمارے سَب کام آپ ہی نے ہمارے لیٔے اَنجام دئیے ہیں۔
13اَے یَاہوِہ، ہمارے خُدا، آپ کے سِوا دُوسرے حاکموں نے بھی ہم پر حُکومت کی ہے،
لیکن ہم صِرف آپ کے ہی نام کو عزّت دیتے ہیں۔
14وہ مَر گیٔے اَور اَب زندہ باقی نہیں؛
مُردہ رُوحیں پھر زندہ نہ ہوں گی۔
آپ نے اُنہیں سزا دی اَور اُنہیں نابود کر دیا؛
یہاں تک کہ آپ نے اُن کی یاد تک مٹا دی۔
15آپ نے قوم کو بڑھایا، اَے یَاہوِہ؛
آپ نے قوم کو بڑھایا۔
آپ نے اَپنی عظمت و جلال ظاہر کی؛
آپ نے مُلک کی تمام حُدوُد کو وسعت دی ہے۔
16اَے یَاہوِہ، وہ مُصیبت میں آپ کے طالب ہُوئے؛
جَب آپ نے اُنہیں تادیب کی،
وہ بمشکل دعا کر پایٔے۔
17جِس طرح ایک حاملہ عورت زچگی کے وقت
درد سے کراہتی چھٹپٹاتی اَور چِلّاتی ہے،
ٹھیک اُسی طرح اَے یَاہوِہ، ہم آپ کی حُضُوری میں تھے۔
18ہم حاملہ تھے اَور درد سے چھٹپٹا رہے تھے،
لیکن ہم نے صِرف ہَوا کو پیدا کیا۔
ہم زمین پر نَجات نہ لا پایٔے؛
نہ ہی دُنیا کے لوگوں کو پیدا کر سکے۔
19اَے یَاہوِہ، لیکن آپ کے مُردے جئیں گے؛
اُن کی لاشیں اُٹھ کھڑی ہوں گی۔
تُم جو خاک میں جا بسے ہو،
جاگو اَور خُوشی کے نعرے لگاؤ۔
آپ کی اوس صُبح کی اوس کی مانند ہے؛
زمین اَپنے مُردوں کو پھر سے پیدا کرےگی۔
20اَے میرے لوگو، جاؤ، اَپنی خوابگاہوں میں داخل ہوکر
اَپنے پیچھے دروازے بند کر لو؛
تھوڑی دیر کے لیٔے جَب تک کہ قہر ٹل نہ جائے
اَپنے آپ کو چُھپائے رکھو۔
21کیونکہ دیکھو، یَاہوِہ اَپنی قِیام گاہ سے باہر آ رہے ہیں
تاکہ دُنیا کے لوگوں کو اُن کے گُناہوں کی سزا دے۔
زمین اَپنے اُوپر بہایا ہُوا خُون ظاہر کر دے گی،
اَور اَپنے مقتولوں کو اَور زِیادہ نہ چُھپائے گی۔
موجودہ انتخاب:
یَشعیاہ 26: UCV
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
اُردو ہم عصر ترجُمہ™، کِتاب مُقدّس
حق اِشاعت © 1999، 2005، 2022، 2024 Biblica, Inc.
کی اِجازت سے اِستعمال کیا جاتا ہے۔
دُنیا بھر میں تمام حق محفوظ۔
Holy Bible, Urdu Contemporary Version™
Copyright © 1999, 2005, 2022, 2024 by Biblica, Inc.
Used with permission.
All rights reserved worldwide.