यूहन्ना 21

येशू सातथो चेलनके थेन देखा पर्लक

1ओकरपाछे तिबेरियास समुन्दरके आँरितिर जेकर दोसुर नाउँ गालील समुन्दर हो। वहाँ येशू अपनहे चेलनके आघे देखा परैलाँ। और यी असिके हुइलस: 2सिमोन पत्रुस, दिदुमस कना थोमा, गालील प्रदेशके काना नगरके नथानेल, जब्दियक दुईथो छावन और हुँकार चेलनमेसे आकुर दुई जाने एक्के संग जमा हुइल रहिँत। 3सिमोन पत्रुस ओइन्हे कहल, “मै ते फेनदोस्रे मच्छी मारे जाइतुँ।” ओइने उहिहे कलाँ, “हम्रे फेन तोहाँरिक संग अइबी।” तब ओइने वहाँसे निकरके लाउमे चहुँरलाँ, पर उ रात ओइने एक्को मच्छी मारे नै सेक्लाँ। 4दोसुर दिन बेहान हुई लागल रहे, येशू आँरितिर ठरह्यागिलाँ। तभुन फेन चेलनके उ येशूए हुइताँ कहिके नै चिहिन्लाँ। 5येशू ओइन्हे कलाँ, “हे मोरिक संघरियन! तुहुरे कतराचे मच्छी मर्लो?” ओइने हुँकिन्हे जवाफ देलाँ, “एक्को नै।” 6येशू ओइन्हे कलाँ, “जाल लाउक दाहिन ओहोँर फेँकाऊ, तब् भेटैबो।” तब् ओइने जाल फेँकैलाँ ते ओइन्हे अतरा धेउर मच्छी मिल्लिन कि ओइने जालहे ताने नै सेक्लाँ। 7जिहिहे येशू प्रेम करिँत् वहे चेला पत्रुसहे कहल, “ऊ ते प्रभु हुइँत।” जब सिमोन पत्रुस यी सुनल कि ऊ प्रभु हुइँत, तब ऊ अपन उ लुग्गा घाललेहल, जोन लुग्गा ऊ मच्छी मारेबेर खोलके धारल रहे। ऊ येशूहे भेँटा करक लग पानीमे कुड्गल। 8पर दोसुर चेलनके लाउमे बैठके मच्छीलेके भरल जालहे पानीमे सहजिलसे तन्ति अइलाँ। काकरेकी ओइने आँरितिरसे धेउर दूर ते नै रहिँत, पर लगभग सौ मिटर जतरासम दूर रहिँत। 9जब ओइने आँरितिर उतरलाँ, तब् ओइने आगिक अंगठामे मच्छी दारल और लग्गेहेँ रोटी फेन धारल देख्लाँ। 10येशू ओइन्हे कलाँ, “जोन मच्छी तुहुरे अब्बे पकरलो, ओम्नेमेसे थोरचे यहाँ नानो।” 11तब् सिमोन पत्रुस लाउमे चहुँरके एक सौ त्रिपनथो बर-बर मच्छिनसे भरल जाल धिक्वामे तानके नानल। पर अतरा धेउर मच्छी रहलमे फेन जाल नै फाटल। 12येशू ओइन्हे बलाके कलाँ, “आऊ, खाना खाऊ।” चेलनमेसे हुँकिन्हे अप्नि के हुइती कहिके पुँछ्ना हिम्मत केक्रो फेन नै हुइलिन। काकरेकी ओइन्हे पता रहिन कि यी प्रभु हुइँत। 13येशू रोटी उठाके ओइन्हे देलाँ, और ओस्तेहेँके मच्छी फेन देलाँ। 14मुअलमेसे जित्ती होके सेकके येशू अपन चेलनके थेन अपनहे देखैलक यी तेसरचो रहिन।

पत्रुसहे येशूक अन्तिम आदेश

15जब ओइने खाके सेक्लाँ, तब् येशू सिमोन पत्रुसहे कलाँ, “हे यूहन्नक छावा सिमोन, यी दोसुर चेलनके जतरा महिन्हे प्रेम करथाँ, का तुँ महिन्हे उहिसे धेउर प्रेम करथो?” ऊ येशूहे जवाफ देहल, “हाँ प्रभु, अप्नि ते जन्थी, मै अप्निहे माया करथुँ।” येशू उहिहे कलाँ, “मोरिक पाछे लगुइयनहे रेखदेख करो, जेने पठ्वनके हस बताँ।” 16येशू उहिहे फेनदोस्रे कलाँ, “यूहन्नक छावा सिमोन, का तुँ महिन्हे प्रेम करथो?” ऊ येशूहे कहल, “हाँ प्रभु, अप्नि जन्थी कि मै अप्निहे माया करथुँ।” तब येशू उहिहे कलाँ, “मोरिक पाछे लगुइयनहे रेखदेख करो, जेने भेँरीनके हस बताँ।” 17येशू उहिहे तेसरचो कलाँ, “हे यूहन्नक छावा सिमोन, का तुँ महिन्हे प्रेम करथो?” पत्रुस दुखि होगिल, काकरेकी येशू तेसरचो उहिहे यी पुँछ्लाँ कि “का तुँ महिन्हे प्रेम करथो?” ऊ येशूहे कहल, “प्रभु, अप्नि ते सक्कु बात जन्थी। मै अप्निहे माया करथुँ कहिके अप्निहे पता बा।” येशू उहिहे कलाँ, “मोरिक पाछे लगुइयनहे रेखदेख करो, जेने भेँरीनके हस बताँ। 18जात्तिके, मै तुहिन्हे कहतुँ, जब तुँ जवान रहो, तब तुँ अप्निहीँ अपन करहिँऊ बहानके जहाँ मन लागे वहैँ चलजाऊ। पर जब तुँ बुह्राजिबो, तब् तुँ अपन हाँथ पसारदेबो, और ओइने तुहिन्हे बहानके वहैँ लैजिहीँ, जहाँ तुँ जाई नै चहबो।” 19येशू असिके यी बात बताइक लग कलाँ कि पत्रुस कसिके मुई, और परमेश्वरके महिमा करी। अतरा कहिके येशू उहिहे कलाँ, “मोरिक चेला बनल पलिरहो।”

येशू और हुँकार दुलार चेला

20पत्रुस पाछे घुमके हेरल ते उ चेलाहे पाछेपाछे आइत देखल, जिहिहे येशू प्रेम करिँत। और जे खाना खाइबेर येशूक पंजरे बैठ्लक ओहोँरसे आकुर लग्गे होके येशूहे असिक कहिके पुँछल रहे, “हे प्रभु, अप्निहे पक्रा देहुइया के हो?” 21उहिहे देख्के पत्रुस येशूहे कहल, “हे प्रभु, यकर संग का हुइहिस?” 22येशू पत्रुसहे कलाँ, “यदि मै यी चाहम कि मोरिक फिर्ता नै आइतसम ऊ जित्तिए रही कलेसे तोहाँर का हुइता? तुँ मोरिक चेला बनल पलिरहो।” 23तबेकमारे चेलनके थेन यी बात फैलगिलिन कि उ दोसुर चेला नै मुई। पर येशू उहिहे यी बात नै कले रहिँत कि ऊ नै मुई। पर येशू असिक कहल रहिँत कि यदि मै यी चाहम कि मोरिक फिर्ता नै आइतसम ऊ जित्तिए रही कलेसे तोहाँर का हुइता? 24यी वहे चेला हो, जे यी बातके बारेमे गवाही देहत, और यी बात लिखल बा। और हम्रे जन्थी कि ओकर गवाही सच्चा बतिस। 25येशू आकुर फेन बहुत्ते काम करलाँ। यदि उ सक्कु लिखजाइत कलेसे सारा संसार फेन अतरा भारी नै हुई कि उ लिखगिलक किताब अँटाई सेकिँत।

موجودہ انتخاب:

यूहन्ना 21: DVGNT

سرخی

کاپی

موازنہ

شئیر

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.

देउखरिया थारु کے بارے میں مزید معلومات حاصل کریں