อาโฮวซียา 13

ลอง เฌาพรา ดัม หมาบ ดี กาแดะ ซืด

1ดอ มึอน ดอ กาลาง ดูอี แคง ครึร อาเอพารีม โฆรห ดูอี อีซาเรลัะ ดอน ครึร บอ กาโพรม ดี โยว บอ อืบ มยูก ครึร ตี. วาย อัน ตี เฆ ดูอี อาเอพารีม วี โบง กาลึบ, วี กรึบ เฌา บาลัะ, แตห เฆ ชึม.

2ดอ ตี นี เฆ วี ออน ดี โบง กาลึบ เซเซ. เฆ บอ วี ดึห รึอน, วี โบง อารึบ ราง บอ ต็อห อึณ มูห เฌาพรา. เฆ มูห แคะ อารึบ ราง ปี โบง ดูอี. แฮะ ฮอต, เฆ บอ วี ต็อห, “ตัห, แตห เอ หลู ดี อารึบ ราง นี. แตห เอ บอ อูห บอ ปูต อารึบ ราง อี มูห ราง มามัก.”

3โกบ อึณ ปาย ตี ดูอี เฆ ตี เฆ ดี บอ หราย ปี อึณอูะ ดอ ซีณวัห เจว. เฆ ปี อึม ดีงาน อี โจห หราย ดอ มูห ซีณวัห เจว. เฆ ดี ปี บอ เดียบ โหงว อี แฮะ บึณ กาฮึง ดอ ตัห บูด คูน. เฆ ปี บอ ดัก เงา อี แฮะ เลห ตัห แคง กาโนม เงา ตึอน.

4โอว อี มูห เฌาพรา วี ต็อห, “โอว อี มูห เฌาพรา ปี กรึบ เบ, โอว แฮะ คยอด เลห เบ แคง มืง แอฆึบ. แดง โอว นี เบ มืร ตู มึห เฌาพรา ปอ อู กาดัง. อึณ มึห มี โอว อู กาดัง อี มูห เฌาพรา อี ดี คยอด เบ.

5โอว แฮะ ฮอต ยอด แมน ลึมลา เบ ดอ กอย เบ แคง แปร กาฮ็อห ดอ แฮะ ซอดาด กาเซา, ตู มึห อึม.

6มาแล, ดอ แฮะ ฮอต เบ ปึอน ดี โฮม แพ โฮม ลึง, เบ วี แบน น็อห ปีคึก บอ ปีว โอว.

7โคว, โอว ดี วี โบง ปี มาครังซี ดี เบ. อึณ ปี บอ มาดีวาย อี บัร ดี ก็อะ อี โดบ อึณเตณ.

8โอว ดี ก็อะ กายาต เบ ปี มาเฆรห โดว มา ดอ แฮะ โบยห ฆอน อัน. โอว ดี กาบัก กายาต เบ บอ ก็อะ โฮม เบ ปี มาครังซี อี แฮะ กาปราณ กาเซา.

9อึย เบ ดูอี อีซาเรลัะ, โอว ปี บอ นับ ดี จอย เบ, โอว ยี ดี ปยาต แวน เบ.

10ดอ อัน ตี คูนดีคัม เบ บอ กอย ดี เหมา? เหมา อึณ ปาย ปี ตู หมาณ เบ, แตห อัน จอย เบ? บอ เฆ ดา กาณา อี อึบ เบ, เฆ กอย นา เหมา? เบ แฮะ ฮอต แดะ เฆ. ดอ ตี นี แตห เฆ ตัห จอย เบ.

11ดอ แฮะ รู โอว, โอว แฮะ ดัว เบ มึห คูนดีคัม แบน กาดัง แบน กาดัง. ดอ แฮะ แว วี รู โอว, โอว บลัวะ แวน เฆ.

12อี ตู หมึอม ปี โบง เฆ ดูอี อีซาเรลัะ แฮะ ฮอต แดม อูน. บับ ฌาราง อี แฮะ แดม อูน ลอง อัน ตี แฮะ ฮอต อูน ซีคยา ซีคยา.

13โอว แฮะ ซี แตห เฆ ดูอี อีซาเรลัะ มึห อาซาก กามาย. เฆ ยี ปี ฆอน งัะ อี แฮะ กาตัด ดี ฆึอด, เฆ ยี ตู ซี ฆึอด เลห แคง วัต มา เฆ. เฆ ดืร กาเซา บอ ตู มึห อางยาน.

14โอว มืร ดืน ตู คยอด ดูอี ฌึร ตี แตห เฆ เลห แคง มืง มารานัะ. โอว มืร ดืน ตู ดึห เลห เฆ ดี โบว อี แตห อี ยัม. อึย แม โบว อี แตห อี ยัม, แตห แม บยัะ อาเพ อาเร แม แบน โมยว แบน โมยว. อึย แม เฌา มารานัะ, แตห แม แตห ดูอี ลึร ชึม. โคว, โอว ตู มึห น็อห ซี กาเว ดูอี เฆ ตี.

15เฆ ดูอี แคง ครึร อาเอพารีม แฮะ ออง ปี ดี โบง เฆ ดอน โมยว, แตห เฆ กืน หลึอม บีนอง เฆ แคง มืง อีซาเรลัะ. เฌาพรา ยี ดี วี จัร คูน กาฮัวะ อี ตัห นา แปร กาฮ็อห, ตัห บูด โดง กอย เฆ, แตห อึณ แตห มืง เฆ กาฮ็อห. บอ อึม คึม เฆ อึม โตห ดี ฮีด โตต ดอน โปละ. โกรวกราม อี ง็อห ตาง อี เฮา ดี ดึห ฮาว โตต ดอน โมยว.

16เฆ ดูอี แคง มืง ซามารี โลว คัม หมาบ เฆ โกบ แฮะ โบง กาบัห เฆ ดี โอว. เฆ ดูอี เรา ดูอี กาง แคง มืง เฆ ตี, เฆ ดี บอ ยัม ดอ กาโฆห ดา ซึก ดูอี อาโมยว เฮา ดี เฆ. ฆอน งัะ เฆ ดี บอ กาดูห อี มัห อี ซัต ยัม. เฆ ยา ตู อัห, เฆ ดี บอ กาดูห อี ปล็อห วัต เฆ.”

موجودہ انتخاب:

อาโฮวซียา 13: pce

سرخی

کاپی

موازنہ

شئیر