Luke 16
16
Onkiele kabaga wo ŋa ambalaga
1Jezu avura ta alwoni a nde ngana ndi: «Obagi omo kiigi ŋa onkyele biibi. Baari ayi naana nde, onkiele wua abiiza we biibi. 2Obagi ocwoli nde ŋaa nde pizi nde ndi: Mi maayuga jaa leebi ma nkuumu a we, ŋaa maya sa mi otali wo biibi baakiele we, okorogo we akamakiele biibi e mi ŋi. 3Onkyele wua yiga acimaŋa ndi: Ŋaa mfumu a mi awu yiga acieze mi ma janja ŋaa mi yiga bunu esa? Mi ti mpari eli mi janja anguunu kali. Kali, mi ŋa okuru, mi ekaje laa ampara ŋi. 4Mi mi mana yaa lemigi lesa mi, mabuni se ami cyeze mi ma janja, baari baabuna yamba mi ka anjo a bo. 5Ŋaa nde cwoli baari ba adifa biibi mpila mfumu a nde, nde ŋa wo ncomi ndi: We kpe difa ŋa mfumu a mi? 6Nde kaali ndi: Kabiimi kayaga mi, ekwumu ba angungulu kwumu ba maari. Ŋaa onkyeli ŋa nde ndi: Mono okanda, ka ma ncye ŋa asisari, teende ekwumu etaani. 7Nde vuri cwoli wo omo nde ndi: Ŋaa we, we kpe difa ŋa mfumu a mi? Wua akaala ndi: Kabiimi ka yaga mi, ekuumu baasaki ba mburu alwumu kuumu. Onkyele ŋa nde ndi: Mono okanda teende ekuumu mpwomo. 8Mfumu yugi lemigi leesi onkiele woobi wua. Ŋaa nde yuuzi onkyele woobi wua ma oyeri ba bagi nde. Kabila baari baabiza ya Njyami avuli ambalaga ka mpaniŋi a bo ŋa bo, okorogo bo avuli baayayi Njyami ambalaga.» 9Jezu amana ndi: «Ee! Mi elyele be ni, leyaga kabaga ka be kayila ncye kaka li keebi ma kayamaŋa abuga a baari, ma kabaga le andigi. Ma ntini eli kabaga kia kamiga mpila be, ŋaa Njyami ayamba be nca njo nde obu-obu. 10Mbuuru oli tele ma amaami ma kiege, nde se tele ma amaami maanini. Mbuuru eli nde ŋa kura ma maami ma akyege, nde se ŋa kura ma maami maanini. 11Ŋaa aka be ka tele ma kabaga kayila ncye kaka li keebi, Njyami ki buna mpa be kakiele kabaga ka jaajaa ŋi. 12Ŋaa aka be kiigi ka tele ma biibi baakiele be ba mbuuru okima ŋi, Njyami kibuna mpa be biibi e nde ba kaswuza ma be ŋi. 13Osali omo kibuna kasala ma amfumu bwele ŋi, nde abele omo, ŋaa nde jii woomo, sikali nde avula kayiga bila omo, ŋaa nde beli woomo. Be kibuna ka tele ma Njyami, ŋaa be levuri ki ayiga ba ampara ŋi.»
Njyami yayi etuma e baari aso
14Ntini ye afarizi ye ayugi bwa, bo yiga baasebe Jezu, kabila bo ŋa njala ampara. 15Jezu ŋa bo ndi: «Ka miizi a baari, be lemvyere ni be tele, ŋaa Njyami yayi etuma e be. Kabila kalogo kamono baari ndi ko keenini, ka miizi a Njyami koove kali.
16«Ngiri a Moyize bila maami aso ma dugi antuma-Njyami, asa baana ma ntini ma antuma tii eyi e Jan Batise, ampi Ncya yeemve ye omfumu o Njyami. Baari ayugi, ŋaa mbuuru ŋa mbuuru asa mpari ma kanyunuŋa nca omfumu ba. 17Maami a yulu bila ncye ma buna kayira ŋaa se mpiri mon ye ngiri kibuna yira ŋi.
18«Mbuuru a balaga wo abira okari a nde, ŋaa nde kabala okima, nde mi sa ncwuma ka miizi a Njyami. Ŋaa wo abala okaazi eli olumi ma bira nde, mi sa ncuuma ka miizi a Njyami.»
Ngana ngaa Kabaga bila Ofuga
19Amana Jezu ti ngana ndi: «Kiigi ŋa balaga lemo eli ŋa kabaga, nde kiigi ka laaza amfa aso ma ntali bila ma owali, Ecugu eso ba omuon o nde, nde kasa akiza. 20Ŋaa kiigi ŋa balaga lemo eli kiigi ofuga, nkuumu Lazare, amono ayaka ma tolo ka onyua njo ngaa kabaga wua. Ŋaa nde kiigi njuru emaabya ma ampura. 21Nde amono asaga ja amfufuzu ma biila ma maawa yila mbisa ngaa kabaga wua. Kayila ŋaa amva amono baavura lye nde ampura. 22Mono ofuga akpaa, antuma a yulu abiri nde mpila Abarayame#16.22 Lekese Luke 13.28 . Mono ngaa kabaga wua se akpaa, ŋa ajiigi nde. 23Kanca kasi ka baari baa akpakpa, nde yiga nca mpasi yomini yeenini. Nde kata miizi ka yulu, nde taali Abarayame kalala, ŋa Lazare li kapaana nde. 24Nde ti nya ndi: “Taara mi Abarayame kolokolo we, mono nkerigi a mi, ŋaa tuma Lazare mabuni nde katuba olyemi a nde nca anja, ma kakwozo mi mpye anja, mi kunu emono mpasi yeenini nca mbaa yi.” 25Abarayame akaala ŋa nde ndi: Mwana mi, we kini abaraga, we ka baaka kayila ncye we ma ovuma, ŋaa Lazare kiigi ma mpasi. Ŋaa yiga Lazare se mi cyege nca mpasi yiga ma ovuma. Ŋaa we se yiga ma mpasi. 26Kayila ŋaa, ŋa billa leenini kampaniŋi a bizi a be, mabuni baali ka kunu kibuna ya mpila be kwa ŋi, baali ka kwa kibuna ya kunu ŋi. 27Ŋaa ngaa kabaga wua avura lyele ŋa nde ndi: Kolokolo we Taara, aka bwa lyele Lazare kaje njo taara mi. 28Kabila mi ŋa andumu ataani, nde kaje yieze bo, mabuni ncanke bo ayi baga mi nca biri empasi yeenini yi. 29Abarayame akaala ŋa nde ndi: Bo ni ŋa angiri ma nyina Moyize bila mbari ye teende antuma-Njyami a ncye, bo ayuga mon, ŋaa bo anyiima mon. 30Ngaa kabaga wua avura kaala ndi: Kali taara a mi Abarayame, ka bwa otu ŋi, nkalave mbuuru wo kpakpa kavuraga yila ncye mpila bo, se bo akaala etuma e bo. 31Ŋaa Abraame ŋa nde ndi: Bo abiza yuga angiri a Moyize bila mbari ye teende antuma-Njyami ayila ncye, se mbuuru okima kayuga kanca baari ba kpakpa, bo ba kabuna ka kaala etuma e bo ŋi.»
موجودہ انتخاب:
Luke 16: teg
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
