Luke 13
13
Lekaala etuma e be
1Ma ntini yomankulu yia baari ake ayi baraga Jezu bo ŋa nde ndi: «Pilate okunji a bungu ma atuma kabuma baari ba kangundu ka Ngalile, baakiigi sa ambwoŋi kanca Njo Njyami. Ŋaa togi le bo levuniŋi bila le anyama ba ambwoŋi.» 2Ŋaa Jezu alyele ŋa bo ndi: «Ŋaa be le cimiŋa ni, baari a Ngalile ba amani ma kabuma baa, avuli amaami maabi ma baari baamo ba Ngalile ba siili? 3Kali, mi eyieze be ni be lebira kaala eku e be, bwa be le kpaa mva ka kpi bo. 4Be lekini lebaraga baari ba kwumu ŋa mpuomo, ba bumi njo yeela ye Silowe yeevi yila bo. Be le cimiŋa ni bo ŋaa kiigi bo avuli baari bwozi a Jeruzaleme ma amaami maabi? 5Kali, mi eyieze be ni, be lebira kaala etuma e be, bwa be aso le kpaa mva ka kpi bo.»
Oti kabiza mpa mburu acagi
6Ŋaa amana Jezu vuri ti bo se ngana yi ndi: «Balaga lemo lekuni ofingye kanca nguunu a nde ye vinye. Cugu leto nde yi ma katolo mburu ofingye, ŋaa nde ki baga ŋi. 7Ŋaa nde alyele ŋa ojanji anguunu a nde ndi: Ma mono! Yiga esibi etari beeya kese mi mburu kayila ofingye wu, ŋaa mi eka baga ŋi, nde ma kala biri yi kalakali caga nde! 8Ŋaa ojanji ŋa nde ndi: Kolokolo we mfumu a mi, sa nyina nde kasibi ki, mi kini esata nde obagi ka mbere, ŋaa mi lege mbori. 9Maasa asimi kalakala nde akula, ŋa nde kabiza kula yiga we abuna caga.»
Jezu mi cura kapundu keebi
10Cugu le baawuuma, Jezu kayiziga kanca okuga omo. 11Ŋaa nca ŋaa, kiigi ŋa okaazi eli kapundu keebi kamon kama ampa nde kaleme, yiga esibi kwumu ŋa mpuomo. Nde kiigi yiga ŋa onkoro, ŋaa nde kiigi yiga ki buna kaka tele ŋi. 12Ŋaa Jezu kamono okaazi wua, nde cwoli nde, ŋaa nde ŋa okaazi wua ndi: «Kaleme ka we ka mi cyege.» 13Jezu legi jiala kayila nde, ŋaa kancinci ŋaa okaazi wua vuri vurigi tele, ŋaa nde yiga ampa Njyami leve. 14Ŋaa ma ntini yia, mfumu okuga wua biri nkeri kabila Jezu mi salaga obieri ma cugu le ba awuuma. Ŋaa nde yiga alyele ŋa okuga ndi: «Ecugu baasa ma kajanja esyami, leya asalaga be ma ecugu bia, ŋaa kama cugu le ba awuuma ŋi.» 15Ŋaa Mfumu akaala ŋa nde ndi: «Kura le be lya, ma cugu le ba awuuma be ni le pisa angoombi sikali anyama akima, ma kaje mpa bo anja? 16Ŋaa okaazi wu se mwana Abarayame, eli Sata ma kura nde yiga esibi kwumu ŋa mpwomo, abiza nde ngayi yia kacyeze ma lo leeli cugu le ba awuuma?» 17Ŋaa Jezu akaala bwa, anga mbele nde amoni okuru boonini, ŋaa okuga oso yiga aswere ma maami maasa Jezu maave.
Ngana ye lemburu lekyege bila ye anganga
18Jezu avura lyele ndi: «Omfumu o Njyami ema owuana, Ŋaa mi bo meema eyezege? 19Bo oma awuana lemburu lekyege, le mbuuru a balaga omo le kayaga, le kakuna nca letobo. Lo lemene, yiga le kirigi oti. Ŋaa anyoyi a yulu ayi cua kayila antaga.»
20Nde avura lyele ndi: «Mi omfumu o Njyami ma ema eyezege. 21Bo oma wuana nganga ye okaazi ka kayaga ma kavusa bila mfumfuzu ye bele, eselegi kumi.»
Lesa mpari ma kanyunuŋa ma kadubugu ke kiege
22Jezu kiigi je nca engundu ŋa ampugu, ma kayiziga mbari a Njyami ŋaa ma kaje kacu ka Jeruzaleme. 23Ŋaa mbuuru omo apiza ŋa nde ndi: «Mfumu, Njyami baari ba kavuzuga nceti a otu?» 24Ŋaa Jezu akaala ŋa nde ndi: «Lesa mpari ma kanyunuŋa ma kadubugu ke kiege, ma kanyunuŋa nca omfumu o Njyami. Ee mi elyele be ni kuna le baari baasaga kanyunuŋa, ŋaa bo ba akabuna ŋi.»
25«Ŋaa ntini ye saraga nga njo, ma kabiinda aka be lekini ka njii, be leya, be leberege njo ma kalyele ni, Mfumu naana bizi njo. Nde akaala ŋa be ndi mi kiyaa be ŋi. 26Ŋaa be leje kalyele nde ni: Bizi leji, lenyui bila we, we yizigi nca a mpugu a bizi.» 27Ŋaa mfumu a njo aje ka kaala ndi: Mi ki ya be ŋi. Lecyege mpaana mi, be ba lesa maami maabi. 28Yia biri ye alila be, ye aja be myi, ŋaa be le mono Abarayame bila Izake, ŋa Jakobe, ŋa antuma-Njyami a ncye aso, kanca omfumu o Njyami ŋa ka ba acuna be kajii. 29Baari ba waa e biri eso e yila ncye, bo baasa cinda leenini nca mpugu a Njyami. 30Ŋaa yiga baari ba baaka kabiza yiga levuzu, ŋaa baa abaaka levuzu yiga mbiza.
Jezu alila ma baari a Jeruzaleme
31Ntini yia afarizi ake ayi mono Jezu, bo ŋa nde ndi: «Ciege ŋa, je kacu ka kima, kabila Erode wo mfumu kasi asaga buma we.» 32Jezu akaala ŋa bo ndi: «Leje lyele ŋa nga perepere wo Erode wua ni: Ŋaa lubu ŋa mbari mi ecura epundu beebi, mi esalaga abyeri, ŋaa cugu le otari mi mana. 33Bwa yemiŋi, mi eva ma njila lubu, mbari bila cugu le otari, kabila ntuma Njyami ave kakpaa ka kasi ka Jeruzaleme, ki kangula kasi ka kima ŋi.»
34Amana Jezu ndi: «Ee! asi Jeruzaleme, asi Jeruzaleme! Be ba lebuma antuma-Njyami, ŋa be ba lebuma antuma-Njyami, ba buma be ma akele, nja kpe ye sagi vusa mi baana a we kampana mi, mva ka awuga ncuzu baana a nde kancina ayiaba! Ŋaa be le ki jya ŋi. 35Yia biri eli Njyami anyina be bila njo be. Ee! Mi elyele be, be leka ma mono mi ŋi, tii ntini eli be lelyele ni: Njyami mpa mbuuru wo aya ma nkuumu a we puga.»
موجودہ انتخاب:
Luke 13: teg
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
