PATADA 2
2
Yowenya ane mampotumpu kaloʼe ndaya
2:1-22
1Sabemo waʼa pompaguruku, anaku, pai neʼe nukalingani waʼa mpatadaku ri siko. 2Pedongeka nunjaa uneki loʼe ndaya paipari-pari da nuparata ndaya. 3Monco anaku, pompari-mpari da naka mataja ponawa-nawamu pai perapimo parata ndaya. 4Pepalimo inceʼe daʼewa nupampepali wuyawa, dudukimo inceʼe daʼewa marawo aga-aga anu tesambuni. 5Ane ewanceʼe, nepa da nuincani nunjaa posokinya mampokaeka i Pue, pai nepa da nurata pangaincani kono Pue Ala. 6I Pue anu mangawai kaloʼe ndaya; ungka ri Sira parata ntau pangaincani loʼe pai parata ndaya. 7Ri tau anu mayoa raya pai bereʼe posarinya, ndawaika siʼa petulungi pai petatondo. 8I Pue mangkariani waʼa ntau anu mayoa powianya pai majagai tau seʼe anu mampomawo Sira.
9Ane nupokono malulu yaku, anaku, da nuincani nunjaa anu mayoa anu monco pai madago. Pai da nuincani woʼu ewambeʼi da katuwumu. 10Siko da mewali tau anu loʼe pai pangaincanimu setu da mampakawongko rayamu. 11Parata ndayamu pai kaloʼe mponawa-nawamu inceʼe da mantatondoi siko, 12pai da mantaʼamaka siko malulu engko ngkatuwu anu bareʼe madago, pai da mantilawangi waʼa ntau anu mompau kagota-gota. 13Tau seʼe bareʼe napokono malulu engko ngkatuwu anu madago, tau seʼe da malulu jaya anu wani buke pai salaa. 14Tau seʼe da mampokawongko waʼa mpowia anu majaʼa. 15Tau seʼe toponggoli-nggoli pai tuwu ri peliko-liko.
16Siko, anaku, da nukoto bareʼe mancabeka pekanarasi mbeʼa anu wongo anu da mangkelo siko pai waʼa mpau anu momi. 17Weʼa setu bareʼe todo ri langkainya pai mangkalinganimo janjinya ri Pue Ala. 18Ane njoʼu siko ri banuanya, kamonconya siko tepatotokamo ri kareʼe ngkapate. Njoʼu njairia siwiamo pai njoʼu ri kareʼe ntau mate. 19Tau anu madadu siʼa, bemo reʼe anu mewalili ri jaya anu da njoʼu ri katuwu. 20Inceʼe puʼunya anaku, lulumo pandiri ngkatuwu ntau madago, pai katuwumo silulu pai pepokono i mPue Ala. 21Maka tau anu tuwu silulu pai pepokono i mPue Ala inceʼemo tau anu mayoa rayanya, pai tau seʼemo anu da mampeari tana anu ndajanji i mPue. 22Paikanya tau anu majaʼa pai masalaa inceʼe da ndatendeka i mPue Ala ri sambaliku ntana setu, da ewa ewo anu ndawutusi ungka ri tana.
