POTETALA WA'A NCURO 24
24
I Paulu napogiluka nto Yahudi ri Peliki
24:1-9
1Pusa alima ndeme loʼumo i Anania Tadu mPanyomba Bangke pai waʼa ntau tuʼa ri Kesaria, nakeni ntau seʼe sambaʼa pabisara i Teritulu toʼonya. Madadu i Petoro Peliki mampogiluka i Paulu. 2Ndapeboomo i Teritulu ri suara. Mompaumo siʼa mampetisala i Paulu natoʼo,
“Tua Petoro Anu Kutubunaka! Ua poparentami anu madago painaka uonomo daera mami seʼi. Pai ua kaloʼemi tongawa reʼemo kateoretaka ngkatuwu ri daera mami. 3Ua kakominya moparenta madagomo kalenenya tana pai ue mami pura-pura setu kasabe ri wongko ndaya pai kaparata unde pai pontarima kase. 4Da naka neʼe mantaji ngkabongo tempo, kuperapi da mabuya rayami mampedongeka pogilu mami seʼe. 5Kami marata tau seʼi mampareʼe kakaliwongo anu majaʼa ri mbeʼi-mbeʼi kanjoʼunya da reʼe kaguaga ri oyo nto Yahudi, siʼa mewali tadulako gerombola nto Nasare. 6Siʼa mampebutuka da mampaka karika Banua i mPue, kadagonya ronga kasoko siʼa. [Kamonconya tinako ndaya mami da ndabotusi siʼa malulu songka agama mami. 7Paikanya i tadulako ncurodado Lisia marampa siʼa ungka ri pale mami. 8Nepa napokau waʼa ntau anu mampogiluka siʼa da mancuara komi.] Ane ndiparesamo tau seʼi nepa da ndidonge ngkaliomi waʼa ngkamonconya nunjaa anu katulurika siʼa.” 9Waʼa nto Yahudi anu njau njairia woʼu mantuluri i Paulu pai mampomonco pura-pura anu natoʼo i nTeritulu.
I Paulu mompau ri suara i mPeliki
24:10-23
10Napokaumo i mpetoro i Paulu da naka mompau siʼa. Mompaumo i Paulu natoʼo, “Kuincani komi Tua petoro anu mewalimo topobotusi motaʼu-taʼumo kasaenya. Inceʼe painaka mawongko rayaku da mompau ri suarami. 11Madago ndiparesa ngkaliomi, kayakunya seʼi bareʼepa meruu ri sampuyu pai radua ndeme anu liu maʼi ri Yerusale da manyomba. 12Pai bereʼe naparata nto Yahudi yaku mopaiso pai tau bara mampareʼe kaguaga ri Banua i mPue bara ri waʼa banua mpekakai ri mbeʼi-mbeʼi ri raya ngkota. 13Bareʼe nakoto ntau seʼe mantuju tanda ngkamonco waʼa mpetuluri ntau seʼe ri yaku anu naparata ri komi. 14Lawi kupangakuka ri suarami, yaku manyomba ri Pue Ala ntau piamo mami malulu ewa anu napaguru i Yesu anu napetisala ntau seʼe. Paikanya ntongo kuaya pura-pura anu ndaʼuki ri sura i Musa pai Sura waʼa nabi. 15Siwia pai tau seʼe yaku woʼu mampomata-mata i Pue Ala da mampatuwu muni tau anu mate – madago tau anu madago bara tau majaʼa! 16Inceʼe puʼunya painaka kupari-pari kojo da naka magali rayaku ri Pue Ala pai ri tolino.
17 #
Pwn. 21:17-28
Reʼe bara tesangkuja ntaʼu yaku bareʼe reʼe ri Yerusale, nepa kumewalili woʼu mangkeni doi mpetulungi ri bancaku pai mampanyombaka panyombaku ri Pue Ala. 18Ri sindara yaku ntongo mawianaka inceʼe, narata ntau seʼe yaku ri Banua i mPue, ri karoonya yaku mampakagali koro. Bereʼe tau sondo anu sangkani-ngkani pai yaku, pai bereʼe kakaliwongonya ri tempo setu. 19Podo reʼe bara tesangkuja to Yahudi anu ungka ri poropenci Asia. Tau seʼe anu kamonconya da rata ireʼi mampetumbu ri komi ane reʼe kabaratanya kono yaku. 20Paikanya mbolimo waʼa ntau seʼe ngkalionya da mantoʼo nunjaa-njaa anu narata ntau seʼe ri yaku, ri sindara yaku ndapapombesuara pai Majalisi Agama. 21#Pwn. 23:6 Podo sangaya pauku anu da narata ntau seʼe anu kupasowa ri suara ntau seʼe, inceʼemo pauku anu mantoʼo: Yaku da ndibotusi sandeme seʼi ua kumancuru paayaku tau mate da ndapatuwu muni.”
22I Peliki anu lawi mariamo paincaninya kono pompaguru i Yesu, mampapusa gombo mpobotusi setu natoʼo, “Kara-kara seʼi da kubotusi ane jelamo i tadulako ncurodado Lisia.” 23Napokau tadulako ncurodado anu majaga i Paulu da naka najagai mpaliu i Paulu, paikanya da nawai sakodi kangaʼanya pai neʼe napetangani waʼa yununya anu da mawaika siʼa nunjaa-njaa anu da napake.
I Paulu ri suara i mPeliki pai Durusila
24:24-27
24Pusa bara tesangkuja ndeme ratamo i Peliki sangkani-ngkani pai tau sambaʼa i Durusila toʼonya, siʼa sambaʼa to Yahudi. Napokau i mPeliki tau da mantima i Paulu. Da napampedongeka i mPeliki pompau i mPaulu kono peaya ndayanya ri Yesu Kerisitu. 25Paikanya butu natotoraka i mPaulu kono kayoa ndaya pai pantaʼamaka sawoyo ndaya pai kono popahuku anu da ndarata ri eo kiama, meratamo eka ndaya i mPeliki pai napantoʼoka i Paulu, “Palaimo riunya, ane reʼe woʼu kasoaku nepa kupeboo woʼu siko.” 26Kamonconya i Peliki mantangara ndaya da napawai i mPaulu doi ri siʼa. Inceʼe puʼunya painaka papongkani-ngkani tau napokau da mantima i Paulu da mompau pai siʼa.
27Ganamo radua ntaʼu jelamo i Perikiu Pesitu mancawani i Peliki mewali petoro. Ua da raya i mPeliki da mampakawongko raya nto Yahudi, inceʼe painaka napapaliukamo i Paulu ri raya ntarunggu.
