Johanes I 5
5
Homo i boro Jesu ndangen, i ndoa ge.
1Homo ma homo i da gin boro i, Jesu aga Mesias adu, Jehova gin ilgi i, i ad Ndorlaben ge. Homo ma homo i da golnisden Damen, i golnisden su ndurn ad damen dagara lie. 2Ar golduisden Jehova ge, golduisden su mbunana ad Jehova dagara lie. Iou hinen i dege Ndorlaben i ha lengi i. 3Aga golnisden adu le ndro Jehova, be iou hirong nongen aden, nongen aden i de beruan bui. 4Homo ma homo i da gin meher le ndoui ad Jehova, ir ndounen longu ber gor boan. Be iou boro ndoui ad Jehova, dandu ndounen longu ber boan. 5Sie ir ndounen longu ber gor boan? I ge, i da gin boro i: Jesu i Ndur Jehova.
6Jesu Kristo ogo i gin meher le ndran, le ndrai, ma le Meluan Helian. Ndran i de vonei bui, ndran e ndrai, ma Meluan Helian i da boharni le aden, aga Meluan monen ndangen. 7Longu madilndre i boharni le aden: 8Aga Meluan, ndran e ndrai. Boharni le longu madilndre i bersi. 9Be iou ha somui boharni asu ndramed, boharni ad Jehova i monen ndangen hanu. Aga boharni ad Jehova, i boharni le ad Ndurn. 10Ar homo i boro ndoui ad Ndur Jehova, i da ge ndro i ndangen. Ar homo de danen boro Jehova bui, i hinen Ndorlaben le hom bahilou ge, i de gin somui le boharni ad Jehova le ad Ndurn bui. 11Aga boharni ad Ndorlaben: Jehova gin hengen me ndro du, iou de somad bui, iou mamaren ge sidesi, iou mamaren gle ndoui ad Ndurn. 12Ar Ndurn i da ge ndro homo, i mamaren ge, ar Ndur Jehova i da ndro homo bui, i na gmed. 13Nongen ogo io gin hondre le ndro mu, io ha lengi mu boro ngarn ad Ndur Jehova, muren danmu, mu do da mamaren sidegesi.
14Iou ha mugmug manden le ad Jehova, dandu, be iou ha soling le longu hendre e hendre dege i ha lengi i, i hengen le ndro du dege iou gin soling. 15Ar dandu, i ha hirong soling adu masi, dandu longu hendre lie, i gin ha somui le soling adu, be iou gin meher le bormarn. 16Ar homo ilndri ndern i bo longu momen, longu momen hendre le ginmad, de danen soling leri bui, homo i da hinen i i na gmed ndangen, ar iou gin ilndri ndern i gin bo longu momen, iou ha soling ndro Ndorlaben, soling aden danen sobani i, be i de gin hinen longu momen hendre le ginmad bui, Jehova i de sibui longu hendre momen ogo bugane. Longu hendre momen ogo i do da, homo i da hinen i, Ndorlaben de esbui longu momen ogo bui. Io mbuere homo i ha soling le ad homo, i da gin bo longu ogoro. 17Longu hendre e hendre i da heb monen bui aga longu momen lie. Hom ndramed i de somad bui, be Ndorlaben gin sibui longu momen aden gineao. 18Dandu, homo ma homo Jehova gin ilgi i, i de bo longu momen bui, homo i da meher le ndoui ad Jehova, i bogulue meluan, beld Satan de danen hosi i bui. 19Dandu, iou mbunana ad Jehova, su ber gor masi su da le nemen ad beld Satan. 20Dandu i, Ndur Jehova gin meher, i hengen me ndro du, dandu i ge, i da ndangen ge. Iou da baghege ndro i, i da monen ndangen, aga Ndur Jesu Kristo. I ogo i monen ndangen, aga Jehova ge, aga ndoui adu, iou do da mamaren leri sidegesi. 21Mu mbunana ordo, goloisden mu, hian orgulue meluamu, mbue dohor su beld.
موجودہ انتخاب:
Johanes I 5: LLENT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society 1956