Johanes I 2
2
1Mu mbunana ordo goloisden mu, io hondre longu ogoro le ndro mu, debosan mu bo longu momen. Ar homo i bo longu momen, e lele, homo i da ndro du, i ogo i ndemani Damen ber lang, i ibdi gahaloseli me ndro du: Aga Jesu Kristo i da monen gane. 2I gin hengen mandrn le surien longu adu momen, adu ge bui, longu momen ber gor masigane. 3Aga gelman adu, dandu Jehova: Be iou hinen nongen aden ge. 4Ar homo i bai: Io dono Ndorlaben, i de hinen nongen aden bui, i hom ndremda bahilou ge, nongen monen ber lang i da ndro i bui. 5Ar homo i delengan le nongen aden, golnisden ad Jehova gina le bergoln monen ge. Dandu le longu ogo iou aden ge. 6Ar homo i vong, i da baghege ndro i, hian i dogi le sal aden, dege Kristo gin dogi ri.
7Mu ndere hian, io de hondre le ndro mu heb nongen houen bui, aga nongen i da ndro mu eluen. Aga nongen ber goru, aga nongen ad Ndorlaben, mu gin ha somui ri. 8Aga nongen houen lie, io da gin hondre le ndro mu, aga nongen ad Kristo, i da ge ndro mu ndangen. Ndrogmoan i gvob ma sul ber lang ndangen i hinganen le ndro mu malabo. 9Ar homo i bai, sul ber lang i hinganen le ndro i, ndrnen i mah ad ndern, i da dogi ge le ndrogmoan. 10Ar homo golnisden ndern i ha dogi sidesi le sul ber lang, i de glos bui. 11Ar homo ndrnen i mah ad ndern, ndrogmoan i da ndro i, i ha dogi le ndrogmoan ge, i de danen sal bui, i de danen bui i dogi oho, ndrogmoan gin nhui begmarn, i de danen ilndri bui.
12Mu mbunana ordo, goloisden mu, io hondre le ndro mu, io dono, i gin sibui longu ademu momen gineao le ngarn aden helian. 13Io hondre le ndro mu damen, danmu i ge, i ber nandugian. Io hondre le ndro mu, mu ulhou, mu gin bo iil le ndro beld Satan, gin ndounen i. Io gin hondre le ndro mu, mu mbunana ordo, danmu Damen adu ber lang. 14Io gin hondre le ndro mu hian, danmu i, i da ber nandugian. Io gin hondre le ndro mu ulhou, mu ndoa ge, nongen ad Jehova i da le bergolmu sidesi, mu gin ndounen beld Satan. 15Mbue voamiso gor boan de longu ber boan. Ar homo i voaniso gor boan, golnisden ad Damen ber lang i da ndro i bui. 16Longu masi i da le boan, sengen adu de begmarn i hanguruen leri, longu masi molhege, aga i ber boan, ad Damdu bui. 17Gor boan ma longu masi i dari na glos, i ge, i da delengan le nongen ad Jehova, i de glos bui, i mamaren sidesi.
Mbue somui le asu Provet bahilou.
18Mu mbunana hian, e lele, rang gin meher, mu da gin hirong ri goru: Homo na gmeher, i da bo iil le ndro Kristo. Malabo su mabosanged gin meher su da bo iil le ndro Kristo. Le longu ogoro dandu, rang ad Ndorlaben gin meher baghege. 19Goru su da le molengadu, su adu ndangen bugane. Be su adu, be su lao ad Ndorlaben Jesu Kristo ndangen, de dansu bieni du bui. Malabo dandu i, su adu ndangen bugane. 20Ndorlaben Helian gin hengen le ndro mu, danmu longu masigane hian monen ge. 21Be io da hondre le ndro mu, io de hanguruen bui, de danmu longu ber lang bugane. Buio, danmu i, danmu longu hendre ogo: Heb bahilou i da le nongen ber lang bugane. 22Sie i da bahilou? I ge, i da vong: Jesu aga Mesias adu bui. I ogo i bo iil le ndro Kristo, i da hangaini Damen ma Ndurn lie. 23Homo ma homo i da hangaini Ndurn, Damen ber lang i da ndro i bui. Ar homo i boharni longu le Ndurn, Damen i da ndro i lie. 24Longu mu da gin hirong i goru, hian i da ge ndro mu sidesi. Be longu ber goru i da ndro mu, Ndurn ma Damen i da ge ndro mu lie. 25Jesu, i ge, i gin bai, i beg hengen me ndro du: Iou da mamaren sidegesi. 26Nongen ogo io gin hondre le ndro mu, io hanguruen su, su da beg rui mu gle sal ademu monen glendi. 27Aga io dono, Ndorlaben i da gin hengen le ndro mu, danmu longu masi ber lang, i ghengen le ndro mu, i da ge ndro mu sidesi, i ge, gin henunuen mu, homo de danen henunuen mu hebsa bui. Ndorlaben i ge, i gin henunuen mu le long masigane, i gin henunuen mu monen ge, heb bahilou bui. Hian, ha somui le nongen aden, mu da ge ndro i sidesi.
28Mu mbunana ordo, goloisden mu, hian, mu da ge ndro i malabo, bersi be i mbsig me ndro du, iou ha mugmug ge, be i gmeher lie ndro du, bombuldu i de mesi bui, iou de vob le bormarn helian bugane. 29Ar danmu Jehova i monen gane, danmu longu hendre ogoro lie: Homo ma homo i da bo hian monen ge, i ndurn ad Jehova, i ge, gin ilgi i.
موجودہ انتخاب:
Johanes I 2: LLENT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society 1956