Genese 37
37
Iosepa i apoheari ila
1Iakobo areve oa hahi leipe la ita le aeape, Kanana la ita. 2Iakobo ve lalava haela ve hari ma: Iosepa va hitolo 17 ila la hoa areve apoheari i hareho ila mamoe kiva leivahaeroape; areve hoahuakore hoa are i areve oa ve uavila Biliha i Silipa ila ve akoremari ila loa loa veavelaripe; Iosepa kai ereve mai hahaiae ve hari ereve oa maeape; 3Iseraela Iosepa ikivere eapapo leipe, areve akoremari aeva perehekai, ehovea are va areve oalou iele hoa epape hoa ve akore; are areve maea pura heaikiapo mai heahapiki ila kokorape. 4Areve apoheari eavape areve oa arero ikivere eapapo leipe, erero kai perehekai, ere arero ikiheaha leivahaeape; ere arero oharo veveke maeakive ikivere au leila.
5Kahara, Iosepa ivahi eavape, kai are areve apoheari la ivahi maeaeape la hoa, ere aeka ikiheaha eapapo leivahaeape. 6Are erero maeaeape: “Arave ma ivahi ve oharo iapaila: 7Elaviila wheat hahauka oru leia hahape, iapai, arave hauka ehoe havahu urai pavape, eve hahauka arero helari hupakai arave la hauka oropa ve ekakaopape.” 8Areve huhohoaha arero maeape: “O iele, a va elave amua haela leikilai ha? A va elave oropa haela leikilai ha?” Laelave ere arero aeka hihiri leivahaeape, ehovea areve ivahi i oharo ila. 9Kahara, are ivahi aea eavape, kai apoheari kileavahaeape maria: “Iapaila, ara aeka ivahi laeavila; eavaila, hare, papare i kou eleven ila arave oropa ve ekaopape.” 10Aka are la oharo areve oa i apoheari ila maeaeape la hoa, areve oa arero erereape kai maria maeape: “A va laeavila ma ivahi ve iele le ha? O iele, ara i ave lou i apoheari ila ave oropa ve mea ve ekakaopakilai ha?” 11Areve apoheari arero ikiheaha leivahaeape, aka areve oa ma oharo areve iki ureve kiva leipe.
Iosepa kakavae lei Aigupito paraeape
12Areve huhohoaha Sekema maeamaea leia mamoe eapai laeavaeroape. 13Iseraela Iosepa maeape: “Ave huhohoaha mamoe Sekema leia mamoe eapai laea va ka ha? Ekela, ara aro ereve leia paraeakilai, heroe.” Are kavale maeape: “Ara ma.” 14Are arero maeape: “A va hoai ovohae eavakive, ere i mamoe ila oaria veveke apearo la, kai iki araro oharo hovea kimaeakive.” Laelave are arero Heberona la hahapa ve paraeai aiai Sekema leia. 15Haela ae arero kaipure naoae veavila eavi arero velavela leipe, “A va le la haropave ha?” 16Are maeape: “Ara arave huhohoaha la haropave; a hela araro kimaeaki, ere mamoe kiva lahoa leivahaeailula la?” 17La haela maeape: “Ere ma ita le hakurepai, ara ereve oharo maria iapape, ‘Elaviila Dotana leia hoahukakilai’.” Laelave Iosepa huhohoaha ve airekai aupe, kai erero Dotana leia koaravahaeape. 18Ere arero arai ve eavape la hoa ere elarelare oharo hukavape, ehovea arero huru harive. 19Ere elarelare oharo maria hukavape, “Ivahi eavavila haela me ekeve. 20Ekeila, elaviila huru ha maia ve karu aea koakilai; aireaki elaviila maria arilai, ‘Animala merava arero le la hape’, aireaki areve la ivahi iele leari leikilai.” 21Aka Reubena ereve la oharo iapape la hoa, are arero ereve mai ve hareavi mariape: “Areve ovokake kahareavalue.” 22Reubena kai mariape: “Apu hakaitapa v'arekaea; huakara maia ve karu aea paraeai harepakive, heroe, aka arero lei haiae lei v'arekaea.” Are va ikivere arero aireaki lei ovokake lei areve oa havahu lai aukive. 23Iosepa huhohoaha ve leia ekepe la hoa, ere areve la maea pura hauavi, mai heahapiki ila la pura mekakure; 24ere arero kaivi karu aea le paraeape: la karu va haroka, ehovea ma karia.
25Kahara, ere eapai larive avape; ere ovohae iupe Gileada ve ekevahaeaki Isamaela kakavae haela uku eavavahaeape; ere va kamela akea ve oraiavape eharu va avare, muo veveke muramura i muro ila; ere la eharu va Aigupito ve leia hahi aupe. 26Iuda apoheari maeaeape: “Elaviila akoreheari huru ha apu la avarapakilava, le veveke koarakilai ha? 27Elaviila arero ma Isamaela haela kakavae leikilai; elaviila arero mai haiae lei va ka, ehovea are elaviilave akoreheari, elaviilave aivau hovea.” Areve apoheari areve oharo iapape. 28Midiana haela la oki ekevahaeape; ere Iosepa karu ve leia hareavi arero Isamaela haela ilaea leipe, kavale silver have koru 20 ve; ere Iosepa Aigupito lai aupe.
29Aireaki Reubena iki karu leia ovohae eavape, Iosepa karu leia karia, la hoa are elare pura haipararapai, 30apoheari maria maeaeape: “Akore karia! Ara learia leikilai ha? Ara lahoa aukilai ha?” 31Ere Iosepa ve pura kaivi nanikosi haroapo ha, areve la pura nanikosi ve apu loroape; 32ere mai heahapiki ila la pura, ereve oa ve leia avai mariape: “Ela va ma eharu koarape, eavaki, ave akore ve pura ka, a ka?” 33Are arero ore leipe kai maeape: “Arave akore ve pura ma; animala merava arero hape la; Iosepa ve maea au la hurirape la.” 34La hoa Iakobo elare pura haipararapai elare hopa pura hi hearai, hare oaria areve akore v'ila ikihuru eapapo leipe. 35Areve akoremari i marita ila arero hakakaeakive ikivere leipe, aka are ereve oharo au iapaila; are maeape: “Ara va ikihuru lei lei arava api kai akore ve leia hoaukilai.” Lahovea areve oa are v'ila hi eapapo ape. 36Kahara, Midiana haela Iosepa Aigupito leia ilaea leipe; ilaea leipe haela va Potipara, Parao ve hevehe haela ve kapena.
موجودہ انتخاب:
Genese 37: ORO
سرخی
شئیر
موازنہ
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Published by the British and Foreign Bible Society 1963-1972