Esta 8
8
Ṅwa'ni mebwô tum num ba Yuda
1Mfen Asuérus fà ndà Haman ngakeban ba Yuda màbwengub Esta num sen lé'njù là; Mardokai nèn mbwe mfen, nummbe Esta lo soṅ mfen mb'a be bo Mardokai là.
2Mfen sô kwa s'a kwé Haman nà mfà Mardokai. Esta bèn nte ze Mardokai num ndà Haman.
3Ndùlala Esta bèn ntsin mbwe mfen ntshob nu yi. A vù num nku mfen nkua'a, nde't'é ndù a biagte ntshùa tshùagntù Haman mèn Agag, ndù kà ntàmtenu mi jù num ba Yuda. 4Mfen shù kôg gol Esta, a lo nsi, ntsin tù mbwe mfen. 5Ntshob mfen ndù: A be ze yen nà bwô mfen, me tum mènfen mbwe i là, a be ze mfen yen mbe yen nà bwô là, a be ze yàm nu bwô num miag mi là, bo kite ṅwa'ni ndo' ntshèt tse Haman nshum Hammedata mèn Agag na' nkite ze tu neghù ndù bo biagte ba Yuda tse bo ntùm njoṅ ntaṅ ngô mfen fa là. 6Be me yen nge' nke ntsho kua' yàm nzwit mèn à ndùke? Be me yen bo nke mbiagte yàm nzwil à ndùke?
7Mfen Asuérus tshob màbwengub Esta bo Mardokai ze Yuda ndù: Yen mbe me fà ndà Haman Esta, mbe ndù bo yà taṅ i tù mb'a na' ntshag bu i num ba Yuda là. 8Ndùlal'a bwô ndù bin kite ṅwa'ni num ze mebwô ba Yuda, nkite mba bin kô là, nkit'à num lén sàm; bin lo' màkwa mfen nte bwe, nummbe bo num nte màkwa mfen num ṅwa'ni bo kit'à num lén se là. Mba zit ṅwa'ni lo bo kite nte màkwa mfen bwe là ghô ndùlala, mèn ke bèn mbate ju bwe.
9Bo tsiaṅ tse ghakite mfen be num yen ngelaṅ nà; a na' mb'a mum lé'njù ntshob tat ṅam mbàa mum ṅwù tat z'a b'a ṅwù Sivan là. Bo kite ṅwa'ni ba Yuda, fenfen boa ngomna mba fenfen ntaṅ ngô mfen ntshob sammbàa bon bàa nkù mi a to' India nèn nkum Etiopia là. Bo kit'à kua' mba Mardokai na' nda'te bo là. Bo kite mba zit taṅ ngô lo à num mat mb'a ke nkite yi là, nkite mba zit ngô lo ntùm mi ntshobe, nkite ba Yuda num yub mat nekite bo mub ntshobe. 10Bo kit'a num lén mfen Asuérus, ndo' màkwa fen nte num bwe. Bo tshag tshen ṅwa'ni là ben tse bo lo' nyàmdiaṅ mfen nèn yi là. 11Mfen tshob ba Yuda ntùm tshen ṅwa'ni là ndù bo ghù ntse'te ntshètte yôg sube, nsate, nzwite mbèn mbiagte njoṅ benntùn fa tse bo kamte yub là boa zwi tshob mba bon tshobe. Ngù ndùlala mba ntùm zit ngô lo, zit taṅ ngô lo num ben bo lo' ju ntshùag nsi num bo là. Mb'a bwô ndù bo biagte tshu tshobe, 12ngù ndùlala nda' num ta' lé'njù ntshù', ntùm njoṅ ntaṅ ngô mfen Asuérus fa. A na' mb'a mum lé'njù ntshob tat gham ntùm ṅwù ntshob bàa gham, z'a b'a ṅwù Adar là. 13Ṅwa'ni ntshù' mfen lo be ntùm tshen ṅwa'ni là, nke mbwô ndù bo sa yen nu là mba ntùm zit taṅ ngô lo, ndù ba Yuda nabte wut tshob num yagte mba' ghakeban tshob sen lé'njù là. 14Bo lo' tshen ṅwa'ni là, nko' num nyàmdiaṅe, nèn yi ndende mba mfen na' ntshob là. Bo sa ntshù' mfen mba Suse z'a be tètla' diba là.
15Mardokai tum ndà mfen, ndù a ghù nzwe fen num i, nenàfi bo fôgtab, ngù ta' kétmbùm gol, ta' kummbaṅ nzwe mediba bo nzwe meba. Tusô Suse nke ntsiaṅte, nke ntshag nze yub tù ntùm ṅwate. 16Nku'ni bo tsiaṅte, neṅwate bo ghamte bèn mbe netèt ba Yuda. 17Mba ntùm zit taṅ ngô lo, mba ntùm sit tusô lo dù' ze ṅwa'ni bo ntshù' mfen kum nà, tsiaṅte bo ghamte, jùa boa lé' mànjù be netèt ba Yuda. Benntùn yàm ntùm ngô tù' ba Yuda, nummbe bwôg lo ghom benntùn num nu ba Yuda.
La Sainte Bible en Bamiléké-Medùmba © Alliance Biblique du Cameroun, 1993. All rights reserved.