यहुन्ना 21

तिबिरियास झीलिरै किनारै चैला पन प्रकट भूंणा

1ऐन्हां गला किना बाद यीशु फिरी तिबिरियास झीलि किनि चैला केरै सांमणै दुबारा फिरी प्रकट भुआ। ऐ इहीं-चारै भूं। 2शमौन पतरस, थोमा जेसैरू नाँ दिदुमुस बि थियु, नतनएल जै गलील प्रदेशेरै काना नगरैरा वासी थ्या, जब्दीरै दो पुत्र जां यीशुरै दो होरै चैलै किट्ठै थ्यै। 3शमौन पतरसै तैस सिंउ बौलु, “आंउ मछलिया पकड़नानि गांहथा।” तैन्हैं तैस सेईतै बौलु, “असै बि ताउ सेईतै चलतै।” सै चलि पियै जां किश्ती मझ सवार भुवै, पण तैस राती तेन्हांनि किछ ना मैउ।

4भियाग भूंतिये थी कि यीशु किनारै पन खड़ा भुआ; पण चैलै सै ना परियांणा कि सै यीशु आ। 5तां यीशु तैन्हांं सिंउ बौलु, “हे मिंडै प्यारो! क्या तुहां किनि किछ खांणुनि आ।” तैन्हैं तेसनी उत्तर दित्ता, “किछ बि ना।” 6तां यीशु तैन्हांं सिंउ बौलु, “किश्तीरै सुमलै पासै जाल सुटा, ता तुहांनि मेईंणी।” तां तैन्हैं जाल सुटा जां तैस जाला मझ योउती मछली फसी गेई कि तेन्हैरै बोलै जाल ना छिकिया।

7तां तेनी चैलै जैस सिंउ यीशु प्रेम करींथ्या, तेनी पतरसा सिंउ बौलु, “ऐ ता प्रभु यीशु आ!” जेख्णी शमौन पतरसै ऐ शुणु कि ऐ प्रभु आ ता तेनी अपड़ै लिकड़ै ला ल्यै, जै तेनी कम कातै टैंमा उतारी छडोरै थ्यै; जां तेनी झीलि मझ छा दी दित्ता। 8होरै चैलै मछलियै ला भरौरा जाल छिकतै किश्ती पन यै, सै किनारै किना जादा दूर ना थ्यै, बस कौ 100 मीटर दूर थ्यै। 9तां तैन्हैं किनारै पन उतरी करि तैन्हैं कोयलेरी आगी पन रखोरी मछली जां रोटी तकाई। 10यीशु तेन्हांनि बौलु, “जै मछली तुहैं ऐम्हीं पकड़ोरी अत्ति तैन्हांं मझां किछ लै ऐईछा।”

11शमौन पतरसै किश्ती पन चढ़ी करि जाल किनारै पन छिकि अंणा। तेत मझ अक शाउ त्रियूंजा बडी-बडी मछली थी तां बि जाल ना फटा। 12यीशु तेन्हांनि बौलु, “ऐईछा, रोटी-पांणी करि ल्या।” चैला मझ कोसनि बि यीशु किना ऐ पुछणैरी हिम्मत ना भुई कि तु केणु आ, केईनी कि तैन्हांं पता थ्या कि सै प्रभु आ। 13तां तैन्हैं रोटी जां मछली लै करि यीशुनि दित्ती। 14ऐहीं-चारै मरि करि दुबारे जींतियुंणा किना बाद त्रीं बारी यीशु चैलानि दर्शन दित्तै।

यीशु जां पतरस

15रोटी-पांणी कांना किना बाद यीशु शमौन पतरसा सिंउ बौलु, “हे शमौन! यूहन्नेरै पुत्र! क्या तु सच मझ ऐन्हां किना मूं सिंउ जादा प्रेम काता?” तेनी तेसनी उत्तर दित्ता, “जी हाँ, प्रभु! तुहां पता कि आंउ तुहां सिंउ प्रेम काता।” यीशु पतरसा सिंउ बौलु, मिंडै मेम्‍ना केरी रखवाली कर। 16यीशु दुबारे तैस सिंउ बौलु, “हे शमौन! यूहन्नेरै पुत्र!” तु मूं सेईतै प्रेम रखता। तां तेनी बौलु, “हाँ प्रभु! तु ता सभ-किछ जांणता। तुहां ता पता कि आंउ तुहां सिंउ प्रेम काता।” यीशु फिरी बौलु, “मिंडिया भ्रैडा चार।” 17तेनी त्रीं बारी फिरी बौलु, “हे शमौन! यूहन्नेरै पुत्र!” तु मूं सेईतै प्रेम रखता। पतरस उदास भुआ कि त्रीं बारी ऐनि केईनी पुच्छु कि, “क्या तु मूं सेईतै प्रेम रखता।” तां तेनी बौलु, “हाँ प्रभु! तु ता सभ-किछ जांणता। तुहां ता पता कि आंउ तुहां सिंउ प्रेम काता।” यीशु फिरी बौलु, “मिंडिया भ्रैडा चार।” 18आंउ तुहां सिंउ सच-सच बोलता कि, जेख्णी तु जुवान थ्या ता तुवे ऐपुवै अपड़ि कमर बंन्ही करि जेदि चहींथ्यै तेदि घुमींथ्यै-फिरींथ्यै। पण जेख्णी तुहां बुढी गांहणु ता तुहां होरै किनि हत्थ फैलांणै, ता होरै मैहणु तुवाड़ी कमर बंन्ही करि तुवे तैठिनी लै गांहणै, जैठिनि गांहणैरा तुवाड़ा मंन ना भूंणा। 19ऐन्हैं गल्लै ला यीशु ऐ इशारा केया कि पतरसेरी मोउत किहीं भूंणी जां तेसैरी मोउती ला परमेश्वरेरी माहिमा भूंणी। यीशु लाष्टी पतरसा सिंउ बौलु, “मिंडा चैला बंणी बेश।”

यीशु जां तेसैरा प्यारा चैला

20पतरसै पीछै मुड़ि करि सै चैला जै यीशु सेईतै प्रेम रखींथ्या, सैक्या पीछै-पीछै ऐईंता तका, जां जेनि रोटी खांतै तैसेरी छाती धेरै ढुकि करि पुछथियु कि, “हे प्रभु! सै केणु आ, जैस तु पकड़वांणा।” 21तैस तका करि पतरसै यीशु सेईतै बौलु, “हे प्रभु! ऐसेरा कितु हाल भूंणा।” 22यीशु तेसनी बौलु, “अगर आंउ चाहूं कि सै बि मिंडै वापस ऐईंणा तेईनी जींता रिय्हा ता ऐनि ला कितु भूंणु? मिंडी आज्ञाय केरा पालन काता रैह।” 23ऐ गल भाईया जां भीणियां मझ फैली गैई कि सै हौरा चैला ना मरना। पण यीशु ऐ ना थियु बोलोरू कि, “तैस ना मरनु।” पण ऐ थियु बोलोरू कि “अगर आंउ चाहूं ता मूं ऐईंणा तेईनी जींता रिहा ता कितु भूंणु?”

उपसंहार

24ऐ सै चैला आ जेनि सभ-किछ तकाउरू आ, तेनी गवाहि दितोरी आ ताकि तुवे बि यीशु पन विश्वास करिया जां तेसैरी गवाहि सच्ची आ। जां तैस पता कि सै सच बोलता। 25होरै बि बड़ै कम अत्तै, जै यीशु क्यौरै अत्तै, अगर सै सारै अक-अक करि लिखणै भुईया, ता जै किताबि लिखियुंणी थी सै पूरै संसारा मझ बि ना थी लगणी।

موجودہ انتخاب:

यहुन्ना 21: CDJNT

سرخی

کاپی

موازنہ

شئیر

کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in

Churahi New Testament (चुराही नवाँ नियम), 2020 by The Love Fellowship is licensed under a Creative Commons Attribution-ShareAlike 4.0 International License.

चुराही नवाँ नियम کے بارے میں مزید معلومات حاصل کریں