Anxuttaasiti 4
4
Phexhrosiyara Yohanisiyaray yaa'axiti buro
1Phexhrosiyara Yohanisiyaray axituse zeeriya u yesune kahinitaara Wonto Hayla Zawa kakkicha afana maagaaray yeydiwo Sodoqaxitaaray hanke usuko u uddho. 2Phexhrosiyara Yohanisiyaray axituse ohisine Yesuusana benta haybo denxose u erusso gisha iitana u huullo. 3Usoni ayti sahay qandi yecho gisha e wontoro aallo tufe zawa u gelso.
4Yeysi u matakoni kato siidasitaafa lagiti Wonto u aadesso. Ye aadessa asanxiti taaboy ichichi kuma aallo e maaddho.
5-6Gutani u afana maagitaara, gate cimitaaray Muse woga eruseesitaara, kahinituse afana ade Haannani, Qayaafani, Yohaniseni, Iskindireni, kahinituse afana ade iginitini be uddina Yerusaleeme u bhikkilutto. 7Phexhrosiyara Yohanisiyara be buro essi <<Aba osanani oo'oyne oone sunxunani ha esa hi mato?>> hidi hissine u oycco.
8Phexhroseni yenniya Ayaana Geeshi essa kundine ususe zeerisine <<Hinuno afana maagito, cimito! 9Hanzo ha dooma maaqicha axuse hantutta modhe hanta gisha <Ha esi abanani e loollo?> hidi numba modhussi hi oyccako 10hinuni suxhine Wontoy haybowafa denso Nazrataxi Yesuusi Kristosa sunxuna ha esi dendi hi buro e eedhonike hinunaaraydi Isra'eelaxitaaraydi uddi ha esa modhussi eruwayte! 11<Hinuni shuchuna keexhichashiti haassi hi dattecho shuchi hade boorey keexe aykenike zawa ayke shuchuko e maaddho> hidi hiyuttasi Yesuusako.
12Looloy fedana oonenani baasso. Loolese esuna ni danda'esi ha saha wosula aallo axuse ingutta sunxi feday baasso>> yeydi e hido.
13Phexhrosiyara Yohanisiyaray naassi zeerdosa be beedoniyaka erunxe keenguwa axita u maaqichosha gaxxhi fettona u micco. Yesuusaara wolko u yechoshani u gaxxho. 14Ye loolla adeni usaara ee'iya yesune beedi ususe beynesa u dheeddo.
15Gate aheesiti beekafa wude u kesoronike mati wolla sekke hanke u kundo. 16Kungisineni <<Ha geriti gara am nu hanto? Yerusaleeme yeseesituse uddi eruttese hantay u badena micusheshi hantuttosi addeydi e yese gisha <Maaddho baasso> hidi hiyese danda'uwanxhiko. 17Ye e gisha axi giddaa aatti e lageeme ha makkina sekke ooneseni Yesuusa sunxuna u zeeruwannikeko kasshi ni ohhe>> hidi hissine wolla u kundo.
18Uso xheydi Yesuusa gisha fettona u zeeruwanikiyara u erusuwanikiyara u kassho. 19Maaqe baaka Phexhrosiyara Yohanisiyaray sekke mati <<Wontoy e worgesi esuse siyekofa hinuse nu siyorosuwani? Mee, am hinuse e bishe? 20Nunimay nu beedosaara nu siidosaara zeerdo badi dhabese danda'uwanxhiko>> yeydi u hido.
21Maaddha zeerena axiti Wonto galaticho gisha gate aheesitini axita jhasshi Phexhrosiyara Yohanisiyara u gara esuna be yaa'e zeere dheeddi sekke kasshi u datto. 22Ye micushe hantana loolla ade beray oyddi tammi bera garesako e maaqicha.
Aadexeesiti Wonto shidho
23Phexhrosiyara Yohanisiyaray dafutti be baditi gara yoodi Wonto zawa kahinituse afana maagitaara gate cimitaaray u gara zeerdosa uddi u oto. 24Usini be siido woggaa bidzi muxhurona be kato keddaysi Wonto shi'isine <<Uddiyade kaato nu Wonto, neni afani sahani bagadeni ussaa yesesani uddi meddhasuko. 25Ayaana Geeshi badena nuuse ade maaqe ne maraxe Dawitena zeerisine
<Ayhuda maaquwa ha saha gara yese axiti huulana ame u eexho? Laga axitini maruwa zeerita ame u masso?
26Saha kaataxheni toorase biya naddhi afana aheesiti bhikkilutti Laaxi garaara ne Mesihe garaara wolla u dendo>
hidi hidechashi Wontoy nenko.
27Aadewo Herodisiyara Phenxhenaxi Philaxhosiyaray Ayhuda maaquwasitaara Isra'eelaxitaara ha katamaaka wolko bhikkilutti ne tissho Mesihe maaqe hayla ne maraxi Yesuusa gara u dendo. 28U bhikkiluttosi burowo ne osanaara ne massechonikiyara <Maaquwaye> hidi hissine ne otechoshi aaloronikeko.
29Hatteni Laaxo, u kashesha beewwa! Ne hantaxiti naassi ne kato ohoronike mahuwa. 30Hayla ne yele Yesuusa sunxuna hargaxiti looloronikiyara micushe hantaara du'use zeeriyaray maaqoronike ne osa anxuwa!>> yeydi u shidho. 31Wonto u shidhosi geede bhikkilutti u yecho godoy sekke hanke e en'o. U uddiyakani Ayaana Geeshi kundo. Wonto katoni jhashe baa naassi u oto.
Aadesechashiti bidzeto yeso
32Aadesi yechashitini bidzi muxhurona bidzi maxona u yecha, u keengicho abakoy uddi kooxewo e maaqichosha baaka yesesaafa bidzi axi <<Ha esi taasuko>> yeydi hinesi badiko yecha.
33Anxuttaasitini orje osana Laaxi Yesuusi Kristosa denxo gisha u ohicha. U uddi gara Wonto suusini orjena e yecha. 34Saha oo'oyne zawa keengeesiti ooneni zal'i ye miijhe u oocho gisha bidzi jheetaxini u gidda badiko yecha. 35Be miijheni oodi anxuttaasituko u ingicha, u bidzi bidzise e worguse aallo miijhe u ingicha.
36Be yeluttenani Qophrose dhaanaxe maaqicha e ommay Lewe maaqe bidzi Yoosefe sunge adey e yecha. Anxuttaasitini esa Barnabase hidi u xheygicha. E birchey <<Osuse axe>> hidi hiyoko. 37Sahani zal'i miijhe oodi anxuttaasituko e indo.
