मत्ती 23
23
शास्त्री अतै फरीसी थऊँ सावधान
(मरकुस 12:38-39; लूका 11:43-46; 20:45-46)
1ता यीशुऐ भिड़ा सोगी अतै अपणै चेलै सितै बल्लू, 2“शास्त्री अतै फरीसी जो मूसा री व्यवस्था री व्याख्या करनै रा अधिकार हा; 3ठेरै तांयें सो जैडा कुछ तूसु सोगी बलन ता सो करा अतै मना, पर तियां मणु साईयें कम मत करदै; क्ओकि सो बलदै ता हिन पर करदै ना हिन। 4सो ऐसै भारी बोझ जो जैतिओ चुकणा मुसकल हा, तैतिओ सो मणु रै कन्धै पुर लदी दिन्दै हिन; पर अप्पू तैतिओ उँगळी सोगी सरकाणा भी ना चाहन्दै। सो कैई तरह रै नियमा जो बणान्दै हिन, जैतिओ निभाणा मणु तांयें मुसकिल हा; पर अप्पू सो तियां नियमा रा पालन करनै री कोशिश भी ना करदै।”
5“सो अपणै सब कम मणु जो दसणै तांयें करदै हिन; सो अपणै तबीजा जो चौड़ा करदै हिन अतै कपड़ै रै कोणै री झालरा जो ज्यादा करदै हिन। 6धामा मन्ज उची उची जगह अतै करखी यहूदी रै सभागार मन्ज भी उची उची जगह बैहदैं हिन, 7बजारा मन्ज नमस्कार, अतै मणु थऊँ आदर पाणा अतै रब्बी (गुरू) कहलवाणा तिईआं जो खरा लगदा।”
8“पर तुहै अपणै आपा जो रब्बी (गुरू) मत कहलान्दैं, क्ओकि तून्दा अक्क ही गुरू हा, अतै तुहै सब भाई-बैहण अक्क समान हिन। 9धरती मन्ज कसी जो अपणा पिता मत बलदै, क्ओकि तून्दा अक्क ही पिता हा, जैडा स्वर्गा मन्ज हा। 10अतै स्वामी भी मत कहलान्दैं, क्ओकि तून्दा अक्क ही स्वामी हा, मतलब मसीहा। 11जैडा तूसु मन्ज बड़ा हा, सो तून्दा सेवक बणा। 12जैडा कोई अपणै आपा जो बड़ा समझदा, सो हल्का भूणा अतै जैडा कोई अपणै आपा जो हल्का समझदा, सो बड़ा करया गाणा।”
शास्त्री अतै फरीसी जो तंयारै पाखण्ड़ तांयै झिड़कणा
(मरकुस 12:40; लूका 11:39-42,44,52; 20:47)
13“हे पखंड़ी शास्त्री अतै फरीसीयों, तूसु पुर हाय! तुहै मणु तांयें स्वर्गा रै राज्य रै दारा बन्द करदै हिन, ना ता तुहै अप्पू प्रवेश करदै अतै जैडा कोई प्रवेश करना चाहन्दा तैसिओ भी रोकदै हिन। 14#23:14 आयत 14 कुछ हस्तलेख मन्ज ना लिखुरी हा।[हे पखंड़ी शास्त्री अतै फरीसीयों, तूसु पुर हाय! विधवा रै घरा बार जो हड़प करी गान्दै हिन, अतै दसणै तांयें बड़ी देरा तक प्रार्थना करदै हिन ठेरैतांये तुसिओ ज्यादा दण्ड मुळना।”]
15“हे पखंड़ी शास्त्री अतै फरीसीयों, तूसु पुर हाय! तुहै अक्की जिणै जो अपणै मत मन्ज लैईणै तांयें पूरै जल अतै थल मन्ज दूर-दूर तक फिरदै हिन, अतै जैहणै मर्जी मन्ज चली इन्दा ता तैसिओ अप्पू थऊँ भी दूगणा पखंड़ी बणाई दिन्दै हिन कि सो भी तूसु सोगी नरका जो गच्छा।”
16“हे अंधे अगुवो, तूसु पुर हाय! जैडा कोई बलदै हिन कि अगर कोई मन्दरा री सौगन्द खा ता कुछ ना, पर अगर कोई मन्दरा रै सोनै री सौगन्द खा ता तैस सोगी बनी गाणा। 17ओ मूर्खा अतै अंध्ओ, कुण बड़ा हा; सोना या सो मन्दर जैत मन्ज सोना पवित्र भुन्दा हा? 18फिरी बलदै हिन अगर कोई वेदि री सौगन्द खा ता कुछ ना, पर जैड़ी भेंट चढ़ाऊरी, अगर कोई तठेरी सौगन्द खाला ता सो बनी गाणा। 19ओ अंध्ओ कुण बड़ा हा; भेंट या वेदि जैत मन्ज भेंट पवित्र भुन्दी हा? 20ठेरैतांये जैडा वेदि री सौगन्द खान्दा, सो तसेरी अतै जैडा कुछ तैत मन्ज हा तठेरी भी सौगन्द खान्दा हा। 21जैडा मन्दरा री सौगन्द खान्दा, सो तसेरी अतै तैत मन्ज रैहणै बाळै री भी सौगन्द खान्दा। 22जैडा स्वर्गा री सौगन्द खान्दा, सो प्रमात्मैं रै सिंहासना री भी अतै तैत मन्ज बैहणै बाळै री भी सौगन्द खान्दा।”
23“हे पखंड़ी शास्त्री अतै फरीसीयों, तूसु पुर हाय! तुहै पुदिनै, हौंफ, अतै जीरै सांईयै स्वाद बाळी चिजा रा ता दशवांश दिन्दै हिन, पर तुहै व्यवस्था री खास गल्ला जो जियां कि न्याय, दया, अतै बफादारी जो छड़ी दितुरा; तुसिओ ता इन्या जो करदै रैहणा चहिन्दा थू। ईयां गल्ला जो ना छड़णा चहिन्दा थू। 24हे अंधे अगुवो, तुहै मच्छरा जो ता छाणी दिन्दै हिन, पर ऊँटा जो निगळी पान्दै हिन।”
25“हे पखंड़ी शास्त्री अतै फरीसीयों, तूसु पुर हाय! तुहै कटोरै अतै थाळी जो ऊपरा ऊपरा थऊँ ता मांजदै हिन पर अन्दरा थऊँ काळै अतै वेसवरै हिन। 26हे अंधे फरीसीयों, पहलै कटोरै अतै थाळी जो अन्दरा थऊँ भी मांजा कि सो बाहरा थऊँ भी छैळ भूच्ची गान।”
27“हे पखंड़ी शास्त्री अतै फरीसीयों, तूसु पुर हाय! तुहै तियां कब्रा साईयें हिन जियां पुर चूना फेरूरा अतै जैड़ी ऊपरा थऊँ ता छैळ हुजदी हिन, पर अन्दर मुरदै री हड्डी अतै सब तरह री गन्दगी सोगी भरूरी हिन। 28ऐस तरीकै तुहै भी मणु जो धर्मी ता हुजदै हिन, पर अन्दर कपट अतै अधर्म सोगी भरूरै हिन।”
शास्त्री अतै फरीसी पुर दण्ड री भविष्यवाणी
(लूका 11:47-51)
29“हे पखंड़ी शास्त्री अतै फरीसीयों, तूसु पुर हाय! तुहै भविष्यवक्ता री कब्रा जो सँवारदै हिन अतै धर्मी री कब्रा बणान्दै हिन, 30अतै बलदै हिन, ‘अगर अहै बापदादे रै टैमैं भुन्दै ता भविष्यवक्ता री हत्या मन्ज तंयारै सोगी ना भुन्दै।’ 31ईयां ता तुहै अपणै आप ही गवाही दिच्छु करदै हिन तुहै भविष्यवक्ता रै हत्यारै री सन्तान हिन। 32ता गच्छा अतै तियां पापा जो पुरा करा जैड़ा तून्दै बापदादे करना शुरू करूरै थियै।”
33“तुहै जहरीलै अतै खतरनाक कीड़ै सांईयै दगाबाज अतै दुष्ट हिन, तूसु नरका रै दण्ड थऊँ किआं बचणा? 34ठेरैतांये हेरा, अऊँ तूसु बळै भविष्यवक्ता अतै बुद्धिमान अतै शास्त्री जो भैजदा हा; अतै तूसु तियां मन्ज कुछ जो मारी दिणा अतै क्रूस पुर चढ़ाई दिणा, अतै कुछ जो यहूदी रै सभागार मन्ज कोड़ै मरवाणै, अतै अक्की नगर थऊँ दूये नगरा जो नहाणै हिन। 35जिआं धर्मी हाबील थऊँ लेई करी बिरिक्याह रै पुत्र जकरिया तक, जियां जो तुहै मन्दरा अतै वेदि रै मन्जै मारी दितुरा थू, जैतणै धर्मी मणु रा खून धरती पुर बहाऊरा, सो तून्दै ही मुण्डा पुर पैणा हा। 36अऊँ तूसु सोगी सच बलदा, ईयां सबी गुनाह री सजा ऐस पीढ़ी रै मणु पर ईच्ची पैणी हा।”
यरूशलेम तांयें विलाप
(लूका 13:34,35)
37“हे यरूशलेम रै मणुओ! तुहै भविष्यवक्ता जो मारी दिन्दै, अतै जैड़ै तिजो बलै भैजै, तियां जो तैंई पत्थर मारै। कैतनी बरी मैंई चाऊ कि जियां कुकड़ी अपणै बच्चै जो अपणै पंखा थलै बचान्दीआ, तिईआं ही अऊँ भी तेरै बच्चै जो कठेरू पर तुहै मिन्जो ईयां ना कमाणा दिता। 38हेरा, तून्दा शहर तूसु तांयें उूजाड़ भूच्ची गोआ। 39क्ओकि अऊँ तूसु सोगी बलदा कि अबै थऊँ जैहणै तक तूसु ना बलणा, ‘धन्य हिन सो, जैड़ै प्रभु रै अधिकारा सोगी इन्दै हिन’ तैहणै तक तूसु मिन्जो फिरी कदी ना हेरना।”
موجودہ انتخاب:
मत्ती 23: GBKNT
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
This work is licensed under Creative Commons Attribution-ShareAlike 4.0 License.
