मत्ती 19
19
फारख्तेरे बारे मां यीशुएरी शिक्षा
(मरक. 10:1-12)
1ज़ैखन यीशुए एन गल्लां ज़ोई छ़ेडी, त तै गलीले मरां गेइतां यरदन दरियारे पार यहूदिया इलाके मां च़लो अव। 2बड़े लोक यीशु पत्ती च़ले जे, ते यीशुए तैना तैड़ी बज़्झ़ाए।
3तैखन फरीसी लोकेईं यीशु कां एइतां तैस अज़मानेरे लेई पुछ़ू, “कुन मैन्हु अपनि कुआन्श केन्ची भी वजाई सेइं फारख्ती देनी जाइज़े?” 4तैनी जुवाब दित्तो, “कुन तुसेईं नईं पढ़ेरू कि ज़ैने तैना बनां तैनी शुरू करां मड़द ते कुआन्श बनेवरां थियां। 5‘एल्हेरेलेइ मड़द अपने हाज बव्वे करां कनारे बिशतां अपनि कुआन्शी सेइं साथी रालो, ते तैना दूईये अक जान भोल्हां।’ 6एल्हेरेलेइ हुनी तैना परमेशरेरी नज़री मां दूई नईं, पन अक्के आन। एल्हेरेलेइ ज़ैना परमेशरे ज़ोड़ोरेन, तैन्न कोई मैन्हु अलग न केरे!”
7तैनेईं तैस पुछ़ू, “फिरी मूसे ऐह हुक्म किजो दित्तो कि फारख्ती लिखतां छ़ेडी देथ?” 8तैनी तैन सेइं ज़ोवं, “मूसे तुश्शे सखत दिलेरी वजाई सेइं अपनि कुआन्शन छ़डनेरो हुक्म दित्तोरो थियो, पन शुरू करां एन न थियूं। 9अवं तुसन सेइं सच़ ज़ोताईं, कि ज़ै कोई अपनि कुआन्शी बदमैशरे अलावा कोन्ची होरि गल्ली पुड़ फारख्ती दे, ते तै केन्ची होरि सेइं ड्लाह बनाते, त तै (एप्पू) बदमाशी केरते। ते ज़ै तैस शैरोरी कुआन्शी सेइं ड्लाह बनाते, त तै भी बदमाशी केरते।”
10चेलेईं यीशु सेइं ज़ोवं, “अगर मड़द ते कुआन्शारे रिश्तेरो ई हाले त ड्लाह न लोड़े बनेवरो।” 11यीशुए तैन सेइं ज़ोवं, “ऐह गल सब कबूल न केरि बटन, सिर्फ तैना ज़ैन परमेशर ई काबलीत दित्तोरीए। 12किछ त ज़र्मनेरे नपुंसक भोतन ते किछन लोक बनातन, ते किछ एरे भी आन, कि ज़ैन सुर्गेरे राज़्ज़ेरे लेई ड्लाह न बनान, ते ज़ैना इना गल्लां सेमझ़ी सकतन तैना समझ़न।”
बच्चन बरकत देनी
(मरक. 10:13-16;लूक. 18:15-17)
13तैखन लोकेईं बच्चे यीशु कां आने, कि तैन पुड़ हथ रेखतां प्राथना केरे, पन चेलेईं तैना लोक झ़िड़के। 14यीशुए ज़ोवं, “बच्चे मीं कां एजने देथ, तैन न ठाका, किजोकि सुर्गेरू राज़ एरां केरूए।” 15ते तै बच्चन पुड़ हथ रेखतां तैट्ठां अग्रोवं च़लो जेव।
अमीर जुवान ते हमेशारी ज़िन्दगी
(मरक. 10:17-31;लूक. 18:18-30)
16हेरा, अक मैन्हु यीशु कां अव ते पुछ़ने लगो, “हे गुरू अवं कुन भलू कम केरि, कि हमेशारी ज़िन्दगी हासिल केरि?” 17यीशुए तैस सेइं ज़ोवं, “तू मीं भलैइये बारे मां किजो पुछ़तस? परमेशरेरे अलावा होरो कोई भी रोड़ो नईं, पन अगर तू हमेशारी ज़िन्दगी हासिल केरनि चातस त हुक्म मन्न।” 18तैनी ज़ोवं, “कोन हुक्मन पुड़?” यीशुए ज़ोवं, “खून नईं केरनो, बदमाशी नईं केरनि, च़ोरी नईं केरनि, झूठी गवाही नईं देनी, 19अपने हाज बव्वां केरि सेवा केर, अपने पड़ोसी सेइं अपने बराबर प्यार केर।” 20तैनी जुवाने जुवाब दित्तो, “एना सब हुक्म अवं बचपनेरो मन्तो एवरोईं। हुनी मीं मां को कमीए?” 21यीशुए तैस सेइं ज़ोवं, “अगर तू सिद्ध भोनू चातस, त गा ज़ैन किछ तीं कां आहे तैन बेच़तां गरीब मैन्हन दे, तैखन तीं सुर्गे मां खज़ानो मैल्हेलो। ते एइतां मीं पत्ती च़ल।” 22पन तैनी जुवाने ऐह गल शुनी, त बड़ो उदास भोइतां च़लो जेव, किजोकि तै बड़ो अमीर थियो।
23तैखन यीशुए अपने चेलन सेइं ज़ोवं, “अवं तुसन सेइं सच़ ज़ोताईं कि अमीर मैन्हेरू सुर्गेरे राज़्ज़े मां दाखल भोनू मुश्किले। 24फिरी अवं तुसन सेइं ज़ोताईं, परमेशरेरे राज़्ज़े मां अमीर मैन्हेरू दाखल भोने करां ऊँटेरू सांधनेरे पाऐ मरां निसनू सुख्तू आए!” 25एन शुन्तां चेलेईं हैरान भोइतां ज़ोवं, “फिरी केसेरी मुक्ति भोइ बटतीए।” 26यीशुए तैन केरे पासे तेकतां ज़ोवं, “मैन्हन करां त एन न भोइ सके पन परमेशरे करां सब किछ भोइ बटते।” 27एस पुड़ पतरस ज़ोने लगो, “हेर अस सब किछ शैरतां तीं पत्ती च़लोरेम ते असन कुन मैल्हनो?” 28यीशुए तैन सेइं ज़ोवं, “अवं तुसन सेइं सच़ ज़ोताईं, कि नंव्वे दुनियाई मां ज़ैखन अवं मैन्हेरू मट्ठू अपने महिमारे तखते पुड़ बिशेलू, त तुस भी मीं पत्ती च़लनेबाले 12 तखतन पुड़ बिशतां इस्राएलेरे 12 गोत्रां केरो न्याय केरेले। 29ते ज़ैनी केन्चे अपना घरां ते ढ्ला या बेइन या हाज या बव या बच्चे या ऊडारां छ़ड्डोरेन, तैस 100 गुणा फल मैल्हेलो, ते हमेशारी ज़िन्दगरी विरासत मैल्हेली। 30पन बड़े मैन्हु ज़ैना हुन्ना पेइले आन, तैना बादे मां पत्रोवं भोनेन। त ज़ैना हुन्ना पत्रोवं आन, तैना बादे मां पेइले भोनेन।”
موجودہ انتخاب:
मत्ती 19: BHDNT
سرخی
شئیر
موازنہ
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
