मत्ती 10
10
यीशुएरे 12 चेले
(मरक. 3:13-19;लूक. 6:12-16)
1फिरी यीशुए अपने 12 चेले एप्पू कां कुजाए, ते तैन भूतां केरो सैयो कढनेरो ते हर बिमारी ते तकलीफ दूर केरनेरो अधिकार दित्तो।
212 प्रेरितां केरां नव्वां इना आन, शमौन ज़ैस जो पतरस ज़ोतन ते तैसेरो ढ्ला अन्द्रियास, जेब्देरू मट्ठू याकूब ते कने तैसेरो ढ्ला यूहन्ना, 3फिलिप्पुस, बरतुल्मै, थोमा, ते मत्ती चुंगी घिन्ने बालो, हलफईरू मट्ठू याकूब, ते तद्दै। 4शमौन कनानी, ते यहूदा इस्करियोती ज़ैनी तै ट्लुवेवरो भी थियो।
12 चेलां केरू सेवारू कम
(मरक. 6:7-13;लूक. 9:1-6;10:4-12)
5एन 12 यीशुए एन ज़ोइतां भेज़े, “गैर कौमां केरे पासे न गेइयथ, ते कने सामरी लोकां केरे केन्ची नगरे मां न गेइयथ। 6बल्के इस्राएलेरे घरानेरी हेरोरि भैड्डन कां गेइयथ। 7ते च़लते-च़लते, एन शुनाते गेइयथ कि सुर्गेरू राज़ नेड़े एवरूए। 8बिमारन बज़्झ़ेइयथ, मुड़दन ज़ींते केरथ, कोढ़ी केरू कोढ़ साफ केरथ, ते भूतां केरो सैयो केढथ, तुसन एन सब किछ मुफ्त मैल्होरूए ते मुफ्त देइयथ। 9ते साथी सोन्नू, चाँदी ते पेइंसे न रेखथ। 10ते न बत्तरे लेई झोलो नेइयथ ते न दूई-दूई लिगड़ां, ते न बूट ते न सोटी, किजोकि मज़दूर अपनि मज़दूरारो हकदार भोते।”
11“ज़ैखन तुस केन्ची नगरे या ड्लाव्वें मां गाथ त तुस एरे मैन्हेरो पतो केरथ, कि कौन भरोसेरे काबल? तैट्ठां ज़ांतगर गानेरो वक्त न एज्जे त तांतगर तैड़ी तैस्से कां रेइयथ। 12ते घरे मां अन्तर गांते बार तैन जो शान्ति देइयथ।” 13“अगर तैन घर तुश्शे काबल भोल्हु त शान्ति पुज़ेली, ते अगर तैन घर तुश्शे काबल न भोल्हु त तुश्शी शान्ति तुसन पुड़ वापस एज्जेली। 14ज़ै तुसन कबूल न केरे ते तुश्शी गल न मन्ने त तैस घरे या नगरे मरां बेइरोवं गांते बार अपने पव्वां केरि धूड़ तैड़ी झ़ैड़थ।” 15“अवं तुसन सेइं सच़ ज़ोताईं कि न्यायेरे दिहाड़े तैस नगरेरो हाल सदोम ते अमोरा नगरां केरे हाले करां भी जादे बुरो भोल्हो।”
एजनेबाली मुसीबत
(मरक. 13:9-13;लूक. 21:12-17)
16“हेरा, अवं तुसन भैड्डां केरे ज़ेरे गिद्दन मां भेज़ने लेवरोईं, एल्हेरेलेइ तुस सप्पां केरे ज़ेरे हुशार ते कबूतरां केरे ज़ेरे सादे बेनथ। 17मैन्हन करां हुशार रेइयथ तैना तुसन ट्लेइतां सभान मां पेश केरेले ते प्राथना घरन मां तुसन कोड़ां केरि मार दुवाले। 18ते तुसन मेरी वजाई सेइं गवर्नरन ते कने राज़न कां हाज़र केरेले, ताके तुस तैन मां ते गैर कौमन मां मेरे गवाह बनथ। 19पन ज़ैखन तैना ट्लुवेइतां हावाले केरेले, त तुस फिक्र न केरथ, कि अस कुन ज़ोमेले ते केन्च़रे ज़ोमेले, किजोकि ज़ैन किछ ज़ोनू भोल्हु तैखने अवं तुसन ज़ोइलो। 20किजोकि ज़ोने बाले तुस नईं, बल्के पवित्र आत्मा भोल्हो ज़ै तुश्शे सुर्गेरे बाजी परमेशरेरे तरफां आए।”
21“ढ्ला, ढ्लाए ते बाजी मट्ठे मारनेरे लेई सौंफेले, ते मट्ठां अपने अम्मा बाजी केरे खलाफ भोइतां तैन माराले। 22मेरे नंव्वेरो वजाई सेइं सब लोक तुसन सेइं बैर केरेले, पन ज़ै आखरी तगर बरदाशत केरेलो तैस्से मुक्ति मैल्हेली। 23ज़ैखन लोक तुसन एक्की नगरे मां सताले, त होरि नगर मांजो नेश्शी गेइयथ, अवं तुसन सेइं सच़ ज़ोताईं कि एस करां पेइले तुस इस्राएलेरे सैरी नगरन मां तुश्शू सफर पूरू न भोल्हु, त अवं मैन्हेरू मट्ठू एज्जी गालू।”
24“चेलो अपने गुरू करां बड्डो न भोए, ते न नौकर अपने मालिके करां। 25चेलेरे लेई त एन्ने बड़ुए कि तै अपने गुरेरो ज़ेरो भोए, ते नौकरेरे लेई एन्ने बड़ुए कि तै अपने मालिकेरे बराबर भोए, अगर तैनेईं मालिके जो शैतान ज़ोवं, त तैसेरे घरेबालन जो केत्रू ज़ोनूए!”
केस करां डर्रू लोडे?
(लूक. 12:2-7)
26“तुस तैन करां न डेरथ, किजोकि कोई चीज़ छ़पोरी नईं, ज़ै खोल्ली न गाली, ते कोई भेद छ़पोरो न रालो, बल्के सारो भेद बांदो भोल्हो। 27ज़ैन किछ अवं तुसन सेइं आंधरे मां ज़ोताईं, तुस तैन दीसां ज़ोइयथ, ते ज़ैन किछ तुश्शे कन्ने पत्र बल्हे सेइं शुनावं गाते, तुस लाए पुड़ गेइतां तैसेरो प्रचार केरथ। 28तुस तैन करां न डेरथ ज़ैना जानी त मारतन, पन आत्मा न मैरी बटन, परमेशरे करां डरा, ज़ै आत्माई ते जानी दूईने नरके मां नाश केरि बटते। 29कुन एक्की सिक्केरी दूई च़ुड़ोली न बिकन? फिरी भी तुश्शो बाजेरे मेर्ज़रे बगैर तैन मरां अक भी धेरती पुड़ न झ़ेड़ी बटन। 30परमेशर तुश्शे हर गल्लरी फिक्र केरते इड़ी तगर तुश्शे दोग्गेरे बाल भी गन्नोरेन। 31एल्हेरेलेइ डरा न, तुश्शी कदर बेड़ि च़ुड़ोलन करां भी बड़ी जादे।”
यीशु कबूल केरनो या न कबूल केरनो
(लूक. 12:8-9)
32“ज़ैना लोक, मैन्हु केरे सामने मेरो इकरार केरतन कि तैना मेरे चेलेन, त अवं भी अपने सुर्गेरो बाजी केरे सामने तैन केरो इकरार केरेलो, कि तैना मेरे चेलेन। 33पन ज़ैना लोक, मैन्हु केरे सामने इन ज़ोने करां डरेले, कि तैना मेरे चेलेन, त अवं भी तैन केरो अपने सुर्गेरो बाजेरे सामने इन्कार केरेलो, कि एना मेरे चेले नईं।”
यीशुएरे एजनेरे निशान
(लूक. 12:51-53;14:26-27)
34“इन न सेमझ़थ कि अवं धेरती पुड़ एल्हेरेलेइ एवरोईं लोक मेल मिलापे सेइं रान, पन मेरू एजनू लोकन एप्पू मांमेइं लड़नेरी वजा भोइ, मेल मलाप नईं। 35अवं एल्हेरेलेइ एवरोईं कि मट्ठे बाजी करां ते कुइये अम्मा करां ते नुश्शी शिखी करां अलग केरि। 36मैन्हेरे दुश्मन त तैसेरे अपने घरेरे लोक भोनेन।”
37ज़ै कोई अम्मा या बाजी मीं करां जादे ट्लारे समझ़ते, तै मेरो चेलो बन्नेरे काबल नईं ते ज़ै कोई मट्ठे या कुइये मीं करां जादे समझ़ते, तै भी मेरो चेलो बन्नेरे काबल नईं। 38ज़ै कोई मेरो चेलो भोनेरी वजाई सेइं दुख झ़ैल्लनेरे लेई त कने मरनेरे लेई तियार नईं, त तै भी मेरो चेलो बन्नेरे काबल नईं। 39ज़ै कोई मरने करां बच़नेरे लेई मेरो इन्कार केरेलो, त तैन हमेशारी ज़िन्दगी न मैल्हेली। पन ज़ै मीं पुड़ विश्वास केरनेरे वजाई सेइं अपने जान देनेरे लेई भी तियार भोल्हो, त तैस हमेशारी ज़िन्दगी मैल्हेली।
फल मैल्हनो
(मरक. 9:41)
40“ज़ैना तुसन कबूल केरतन, तैना मीं कबूल केरतन, ज़ैना मीं कबूल केरतन, तैना सिर्फ मीं नईं, पन तैना परमेशरे भी कबूल केरतन, ज़ैनी अवं इड़ी भेज़ोरोईं।” 41“ज़ै नेबन, नबी सेमझ़तां कबूल केरेलो, परमेशर तैस नेबी केरे बराबर इनाम देलो, ते ज़ै धेर्मी मैन्हु धर्मी सेमझ़तां कबूल केरते, परमेशर तैस धेर्मी बराबर इनाम देलो। 42ज़ै कोई इन निकड़न मरां एक्की मेरो चेलो बुझ़तां सिर्फ अक कटोरो ठंढू पानी पियालो, अवं तुसन सेइं सच़ ज़ोताईं तैस पक्कू इनाम मैल्हनू आए।”
موجودہ انتخاب:
मत्ती 10: BHDNT
سرخی
شئیر
موازنہ
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Bhadrawahi Bible (भड्लाई बाइबिल), 2020 by Beyond Translation is licensed under a Creative Commons Attribution-ShareAlike 4.0 International License.
