निर्गमन 6
6
1फेर यहोवा नै मूसा तै कह्या, “इब तू देक्खैगा के मै फिरौन कै गैल के करुँगा; जिसतै वो मजबूर होकै उननै अपणे देश तै लिकाड़ देवैगा।”
परमेसवर का छुटकारै का वादा
2परमेसवर नै मूसा तै कह्या, “मै यहोवा सूं; 3मै सर्वशक्तिमान#6:3 सर्वशक्तिमान एल-शदाई परमेसवर कै नाम तै अब्राहम, इसहाक, अर याकूब नै दर्शन दिया करदा, पर यहोवा कै नाम तै मै उनपै जाहिर कोनी होया। 4अर मन्नै उनकै गैल अपणा करार मजबूत करया सै, यानिके कनान देश जिस म्ह वे परदेशी होकै रहवै थे, उस ताहीं उननै दे दियुँगा। 5इस्राएली जिननै मिस्री माणस गुलाम्मी म्ह राक्खै सैं उनके दुख का कराहणा सुणकै मन्नै अपणा करार याद करया सै। 6इस कारण तू इस्राएल के माणसां तै कह, ‘मै यहोवा सूं, अर मै थारे ताहीं मिस्रियाँ कै उस बोझ कै तळै तै लिकडूँगा, अर उनकी गुलाम्मी तै थमनै छुड़ाऊँगा, अर अपणी बांह बढ़ाकै अर भारी सजा देकै थमनै छुड़ा ल्यूँगा, 7अर मै थमनै अपणी प्रजा बणाण कै खात्तर अपणा ल्यूँगा अर मै थारा परमेसवर ठहरूँगा; अर थम जाण ल्योगे के मै थारा परमेसवर यहोवा सूं जो थमनै मिस्रियाँ के उस बोझ कै तळै तै लिकाड़ ले आया। 8अर मै थमनै उस देश म्ह ल्याऊँगा, जिस देश कै देण की कसम मन्नै अब्राहम, इसहाक, अर याकूब तै खाई थी उस्से म्ह मै थमनै पहुँचाकै उसनै थारा हक म्ह कर दियुँगा। मै तो यहोवा सूं।’” 9ये बात मूसा नै इस्राएलियाँ तै सुणाई; पर उननै मन की बेचैनी अर गुलाम्मी की कठोरता कै कारण उसकी ना सुणी।
10फेर यहोवा नै मूसा तै कह्या, 11“तू जाकै मिस्र देश के राजा फिरौन तै कह के इस्राएलियाँ नै अपणे देश म्ह तै लिकड़ जाण दे।” 12अर मूसा नै यहोवा तै कह्या, “देख, इस्राएलियाँ नै मेरी न्ही सुणी; फेर फिरौन मेरै भद्दे बोल्लण आळे की किस तरियां सुणैगा?” 13फेर यहोवा नै मूसा अर हारुन तै कह्या, इस्राएलियाँ अर मिस्र देश के राजा फिरौन कै खात्तर हुकम इस मकसद तै दिया के वे इस्राएलियाँ नै मिस्र देश तै लिकाड़ ले जावै।
मूसा अर हारुन की पीढ़ी
14उनकै पितरां के खानदान्ना के खास माणस ये सैं: इस्राएल के जेठ्ठे बेट्टे रूबेन के बेट्टे: हनोक, पल्लू, हेस्रोन अर कर्मी थे; इन्हे तै रूबेन के कुल लिकड़े। 15अर शिमोन के बेट्टे: यमूएल, यामीन, ओहद, याकीन, अर सोहर थे, अर एक कनानी बिरबान्नी का छोरा शाऊल भी था; इन्हे तै शिमोन के कुल लिकड़े। 16लेवी के बेट्टे जिनतै उनकी पीढ़ी इस तरियां चाल्ली, उनके नाम ये सैं: यानिके गेर्शोन, कहात अर मरारी, अर लेवी एक सौ सैंतीस साल ताहीं जिन्दा रह्या। 17गेर्शोन के बेट्टे जिनतै उनका कुल चाल्या: लिब्नी अर शिमी थे। 18कहात के बेट्टे: अम्राम, यिसहार, हेब्रोन अर उज्जीएल थे, अर कहात एक सौ सैंतीस साल ताहीं जिन्दा रह्या। 19मरारी के बेट्टे: महली अर मूशी थे। लेवियाँ के कुल जिनतै उनकी पीढ़ी चाल्ली येए सैं। 20अम्राम नै अपणी बुआ योकेबेद ताहीं ब्याह लिया अर उसतै हारुन अर मूसा पैदा होए, अर अम्राम एक सौ सैंतीस साल तक जिन्दा रह्या। 21यिसहार के बेट्टे: कोरह, नेपेग अर जिक्री थे। 22उज्जीएल के बेट्टे: मीशाएल, एलसाफान अर सित्री थे। 23हारुन नै अम्मीनादाब की बेट्टी, अर नहशोन की भाण एलीशेबा तै ब्याह करया; अर उसतै नादाब, अबीहू, एलीआजर अर ईतामार पैदा होए। 24कोरह के बेट्टे: अस्सीर, एलकाना अर अबीआसाप थे; अर इन्हे तै कोरहियाँ कै कुल लिकड़े।
25हारुन के बेट्टे एलीआजर नै पूतीएल की एक बेट्टी तै ब्याह करया; अर उसतै पीनहास पैदा होया। जिनतै उनका कुल चाल्या। लेवियाँ कै पितरां कै कुण्बे के खास माणस येए सैं। 26हारुन अर मूसा वेए सैं जिन ताहीं यहोवा नै यो हुकम दिया: “इस्राएलियाँ नै झुण्ड-झुण्ड करकै उनके टोळ कै मुताबिक मिस्र देश तै लिकाड़ ले आओ।” 27ये वोए मूसा अर हारुन सैं, जिननै मिस्र देश कै राजा फिरौन तै कह्या के हम इस्राएलियाँ नै मिस्र देश तै लिकाड़ ले जावांगे।
यहोवा का मूसा ताहीं फेर बुलाया जाणा
28जिब यहोवा नै मिस्र देश म्ह मूसा तै या बात कही, 29“मै तो यहोवा सूं; इस करकै जो कुछ मै थारे तै कहूँगा वो सारी मिस्र देश के राजा फिरौन तै कहियो।” 30पर मूसा नै यहोवा तै जवाब दिया, “मै तो बोल्लण म्ह भद्दा सूं; अर फिरौन किस तरियां मेरी सुणैगा?”
موجودہ انتخاب:
निर्गमन 6: BGC
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Haryanvi Bible (हरियाणवी), by Beyond Translation is licensed under Creative Commons Attribution-ShareAlike 4.0 License.