Halloo 3
3
Asho Axaaxoona Dihoo
1Dingero Nuggishoo Doono Yeeri halliti cooxinaꞌo bulliyee beshe accechone. Ureyich “Iberoon Yeeri ‘Becheeti michi aafo bulliichee maayaahote’ itone?” iye.
2Ureyoo wochaꞌa dingeroyich ishichiyan: “Hini becheeti mixinaꞌo bulli aafoochee mamo hakkiyone. 3Tunebaani Yeeri ‘Ittoshi qitaachemmoyich, hini becheeti michi daggooch beeti, ikke michi aafoochee maayaahote; bi achoochoo shaggaahote’ itone” iyan.
4Dingeroo ureyich ishichiye: “Iberoon qitaachote. 5Yeeri bi ishichito, aroochee ittoshi maahooba, biin shaahemmo ittoshi tunoon, ittoshi aafo qecheetaa, gondoonaa deꞌoonon ariyemmo ittoshi tunoonoo bi arii beetoyichiye” iye.
6Ureyoo ebi michi aafo mamoyich shaawiibeeto, ciinoyich dakiibeeto, ariyoon imoyichoo gaaweto bi tunoon ciinnahan; ebi michi aafoochee daammaa maahan; wotta bi kenoyichoo immahan; aroo maahe. 7Gutteenaꞌochi aafo bekkech qecheehe; boonoshiyoo shokkaachoo boonoshi tunoon ariiheete. Ebich balaasee waamon kuxxii kochiꞌi deqqeheete.
8Showoo xumemmona, Nuggishoo Doono Yeeri becheeti michi daggooch shaꞌeebeeti, bi shaꞌee qaaroon waayeheete. Ebich Addaaminaa bi mecheena Nuggishoo Doono Yeeri aafoochee becheeti michi daggooch aasheheete. 9Tunebaani Nuggishoo Doono Yeeri Addaamin ceeggiꞌi, “Aabiichiye ne beeto?” iye.
10Addaamiyoo wochiꞌi, “Michi daggoochaa ne shaꞌee qaaroon waayaꞌa, shokkaachoo ta tunetoyich, shattoye; aashaanoo iyoye” iye.
11Doono Yeeriyoo “Shokkaachoo ne tunoon konine neech gettito? ‘Aroochee maayaahine’ ta iti michi aafoochee maatine?” iye.
12Addaamiyoo “Taanna tookki bi tunemmoyich taach ne immeti ure, aree ebi michi aafoochee kuxxaꞌa bi imenane ta maato” iye.
13Nuggishoo Doono Yeeriyoo ureen “Ebi ne tuniiti mooyo, amoone?” iye. Ureyoo wochaꞌa, “Dingero taan dawusheenane ta maato” iyan.#2 Qoro. 11:3
Doono Yeeri Nalliti Nalloo
14Arooba Nuggishoo Doono Yeeri dingeroyich ishichiye:
“Ebin ne tuniitoyich,
gijjeenaꞌonaa cooxinaꞌo bullinoyee bariree,
uppeto tunemmo neene;
ne beeyemmi yemeeno bullin
ne tefoona yuummemmo neene;
showoonoo maayemmo neene.
15Neennaa ureena daggooch,
ne yaroonaa bi yaroona daggoochoo
kaaroon geddemmo taane;
biyoo ne qelloon pharixxemmone;
newoo bi shoqqoon baniyemmo neene” iye.
16Ureyichoo ishichiye:
“Ne xifehooba xuuxoon,
bushoon ne shiyiyooboo maaxoon,
oogichi neech woddiyemmo taane;
tunetaa ne qaatoo ne keno waan tunemmone;
biyoo neyee damboo tunemmone” iye.
17Addaamichoo ishichiye:
“Ne mechee qaaroon waayaꞌa, ‘Aroochee maayaahine’ ta iti michi aafoochee ne maatoyich,
showoo ne naboona uppeto tunebe;
ne kasho beemmi wottoon,
aayiree aroochee maayemmo neene.
18Showoo angixonaa guccinonon colliyemmone;
showoo colliiton maayemmo neene.
19Showoochee halleeto neene;
ebich showooch wottemmo neene;
ne kecheti showooch ne wottemmi wottoon,
aayi caajjeree koshon maayemmo neene” iye.
20Kashechi asho bullich indee bi tunetoyich, Addaami bi mecheen, Hewaani ii shigiihe. 21Ebiyee gubb, Nuggishoo Doono Yeeri Addaaminaa bi mecheenoyich gooqqoochee tahoon shuuneꞌi tajjiye.
Addaaminaa Hewaanina Edenee Yookko
22Aroochee Nuggishoo Doono Yeeri ishichiye: “Ebiyoche, asho gondoonaa deꞌoonon ariyoona no daggoochee ikkoommon tunetone. Andoo bi kishoon yaggiree kashee michi aafoochee daami bi maayemmoyich, maaree bulli yemeenoon kashecho tuneree bi beeyemmoyich daggeyaache” iye. 23Ebich asho showoochee bi danetoyich, are showoon bi gochemmoyich, Nuggishoo Doono Yeeri biin Edeni bechee daggoochee kichiye. 24Ashoonoo kichii yookkiye; kashee mixo waan daammiibeeti gommon quyemmi kiruubeenaꞌonaa qaaqqee booddoon taheti, haabuubo guuddiibeeti goraadoonon, Eden beeti mixinaꞌoochaa aabi-keyo waan kotiihe.
موجودہ انتخاب:
Halloo 3: KBRC
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
SIM International, 2020.