ʻO KA ʻEPISETOLE A PAULO KA LUNAʻŌLELO I KO ROMA 14
14
MOKUNA XIV.
1 He ʻōlelo aʻo i nā hoahānau, i kūʻē ʻole ai lākou i kekahi i kekahi, no nā mea ʻuʻuku.
1¶ E launa aku ʻoukou i ka mea nāwaliwali i ka manaʻoʻiʻo ʻana, ʻaʻole hoʻi no ka hoʻokolokolo ʻana i kona mau manaʻo.
2Ua manaʻo kekahi e pono ke ʻai ia i nā mea a pau; akā, ʻo ka mea nāwaliwali, ua ʻai nō ia i nā lāʻau iki ʻai.
3Mai hoʻowahāwahā aku ka mea e ʻai ana, i ka mea i ʻai ʻole; ʻaʻole hoʻi ka mea e ʻai ʻole ana, e hoʻāhewa i ka mea i ʻai; no ka mea, ua maliu mai ke Akua iā ia.
4ʻO wai ʻoe ka mea e hoʻāhewa ana i kā haʻi kauā? Aia nō i kona haku ponoʻī kona kūpaʻa ʻana, a ʻo kona hāʻule ʻana; a e hoʻokūpaʻa ʻia nō ia; no ka mea, e hiki nō i ke Akua ke hoʻokūpaʻa iā ia.
5Ua manaʻo kekahi, ua ʻoi aku kekahi lā ma mua o kekahi lā, manaʻo nō hoʻi kekahi, ua like nā lā a pau; he pono ke hoʻomaopopo leʻa kēlā mea kēia mea i kona manaʻo iho.
6ʻO ka mea e mālama i ka lā, e mālama nō ia no ka Haku; a ʻo ka mea i mālama ʻole i ka lā, no ka Haku nō kona mālama ʻole ʻana. A ʻo ka mea i ʻai, ua ʻai nō ia no ka Haku; no ka mea, ua hoʻomaikaʻi aku ʻo ia i ke Akua; a ʻo ka mea i ʻai ʻole, no ka Haku kona ʻai ʻole ʻana, a hoʻomaikaʻi aku nō ia i ke Akua.
7No ka mea, ʻaʻohe mea o kākou e ola ana nona iho; ʻaʻole hoʻi mea e make nona iho.
8No ka mea, inā e ola ana kākou, no ka Haku ko kākou ola nei; a inā e make ana kākou, no ka Haku ko kākou make ʻana. No laila, i ko kākou ola ʻana, a me ko kākou make ʻana, no ka Haku kākou.
9No ka mea, eia ka mea i make ai ʻo Kristo, a i ala hou ai, a ola, i noho Haku ia no ka poʻe make a me ka poʻe ola.
10A ʻo ʻoe, no ke aha lā e hoʻāhewa nei ʻoe i kou hoahānau? A ʻo ʻoe hoʻi, no ke aha lā e hoʻowahāwahā nei ʻoe i kou hoahānau? No ka mea, e kū nō kākou a pau i mua o ka noho luna kānāwai o Kristo.
11No ka mea, ua palapala ʻia,
“«Me aʻu e ola nei, wahi a ka Haku, e pau nā kuli i ke kukuli iaʻu,
E pau hoʻi nā elelo i ka hōʻike i ke Akua».”
12No laila hoʻi, e hōʻike aku nō kēlā mea kēia mea o kākou a pau nona iho i ke Akua.
13¶ No ia hoʻi, mai noho kākou a hoʻāhewa hou aku i kekahi i kekahi; akā, e manaʻo ʻoukou me nēia, ʻaʻole e waiho i ka mea e hina ai, ʻaʻole hoʻi i ka mea e hihia ai i mua o ka hoahānau.
14Ua ʻike au, a ua hoʻomaopopo ʻia au e ka Haku, e Iesū, ʻaʻohe mea i haumia wale iho; akā, inā manaʻo kekahi ua haumia kekahi mea, he haumia nō ia nona.
15Inā ua ʻehaʻeha kou hoahānau, no ka ʻai, ʻaʻole ma ke aloha kou hele ʻana; mai hoʻopōʻino aku ʻoe me kāu ʻai, i ka mea nona i make ai ʻo Kristo.
16No ia mea, e ao ʻoukou o ʻōlelo ʻino ʻia ko ʻoukou pono.
17No ka mea, ʻaʻole ka ʻai a me ka mea inu ke aupuni o ke Akua; akā, ʻo ka pono, a me ke kuʻikahi, a me ka ʻoliʻoli i ka ʻUhane Hemolele.
18No ka mea, ʻo ka mea i mālama iā Kristo ma ia mau mea, ua ʻoluʻolu ke Akua iā ia, a ua pono hoʻi ia i kānaka.
19No ia hoʻi, e hahai kākou i nā mea e kuʻikahi ai, a me nā mea e hoʻokūpaʻa ai kekahi i kekahi.
20Mai hoʻohiolo ʻoe i ka hana a ke Akua no ka ʻai. He maʻemaʻe nā mea ʻai a pau. Akā, he mea ia e ʻino ai ke kanaka ke ʻai ʻo ia me ka hoʻohihia aku.
21He mea pono e ʻai ʻole i ka ʻiʻo, a e inu ʻole i ka waina, ʻaʻole hoʻi e hana i ka mea e hina ai kou hoahānau, a e hihia ai, a e nāwaliwali ai.
22He manaʻoʻiʻo nō kou. E mālama ʻoe ia i loko ou iho i mua o ke Akua. Pōmaikaʻi ke kanaka i hoʻāhewa ʻole iā ia iho ma ka mea āna i ʻae aku ai.
23ʻO ka mea kānalua, e hoʻāhewa ʻia ʻo ia ke ʻai ia; no ka mea, ʻaʻole ma ka manaʻoʻiʻo ʻia. A ʻo nā mea a pau ʻaʻole ma ka manaʻoʻiʻo, he hewa ia.
موجودہ انتخاب:
ʻO KA ʻEPISETOLE A PAULO KA LUNAʻŌLELO I KO ROMA 14: KBH
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.