KA ʻEUANELIO I KĀKAU ʻIA AI E IOANE 12
12
MOKUNA XII.
1 No kā Maria poni ʻana i nā wāwae o Iesū. 10 Manaʻo ihola nā kāhuna nui e pepehi iā Lazaro. 12 Hoʻoleʻa nā kānaka iā Iesū i kona komo ʻana i Ierusalema. 29 Hōʻike mai i ke ʻano o kona make ʻana.
1¶ ʻAono lā ma mua o ka Mōliaola, hele maila ʻo Iesū i Betania, kahi o Lazaro ka mea i make, āna i hoʻāla aʻe mai ka make mai.
2No ia mea, hoʻomākaukau ihola lākou i ʻahaʻaina nāna i laila; a ʻo Mareta kai lawelawe; a ʻo Lazaro kekahi o nā hoa ʻai e noho pū ana me ia.
3A laila lawe maila ʻo Maria i kekahi paona mea poni he ʻaila ʻala kumu kūʻai nui, a poni ihola i nā wāwae o Iesū, a holoi ihola i kona mau wāwae me kona lauoho; a piha ka hale i ke ʻala o ka mea poni.
4No ia hoʻi, ʻōlelo maila kekahi o nā haumāna āna, ʻo Iuda ʻIsekariota, ke keiki a Simona, ka mea e kumakaia aku iā ia,
5“No ke aha lā i kūʻai ʻole ʻia aku ai kēia mea poni i nā hapawalu ʻekolu haneri, a e hāʻawi ʻia na ka poʻe ʻilihune?”
6ʻO kēia kāna i ʻōlelo mai ai, ʻaʻole no kona manaʻo i ka poʻe ʻilihune; akā; no ka mea, he ʻaihue ia, a iā ia ke ʻeke kālā, a ua lawe wale ʻo ia i nā mea i hahao ʻia i loko.
7ʻĪ maila ʻo Iesū, “E waiho mālie iā ia; ua mālama mai ia i kēia mea no koʻu lā e kanu ʻia ai.
8“No ka mea, e mau ana ka poʻe ʻilihune me ʻoukou; akā, ʻaʻole e mau ana au me ʻoukou.”
9¶ A ʻike aʻela hoʻi kekahi poʻe nui o nā Iudaio, aia nō ia i laila; ʻaʻole no Iesū wale nō lākou i hele mai ai; akā, i ʻike hoʻi lākou iā Lazaro, ka mea āna i hoʻāla aʻe mai ka make mai.
10Kūkākūkā ihola nō nā kāhuna nui e pepehi iā Lazaro kekahi;
11no ka mea, nui nā Iudaio i hele aku nona, a manaʻoʻiʻo iā Iesū.
12¶ Ia lā aʻe, hele nui maila nā kānaka i ka ʻahaʻaina, i ko lākou lohe e hele ana ʻo Iesū i Ierusalema;
13lawe aʻela lākou i nā lālā pāma, a hele akula e hālāwai, a hoʻokani akula, “Hōsana! «Nani wale ke Aliʻi o kā ʻIseraʻela e hele mai ana ma ka inoa o ka Haku».”
14A loaʻa iā Iesū ke keiki hoki, noho ihola ia ma luna ona; e like me ka mea i palapala ʻia,
15“«Mai makaʻu ʻoe, e ke kaikamahine a Ziona, aia hoʻi, ke hele mai nei kou Aliʻi e noho ana ma luna o ka hoki keiki».”
16ʻAʻole i ʻike kāna mau haumāna i ke ʻano o kēia mea i kinohou; akā, i ka wā i hoʻonani ʻia ai ʻo Iesū, a laila hoʻomanaʻo ihola lākou, ua palapala ʻia ia mau mea nona, a ua hana ʻia kēia mau mea nona.
17No laila hōʻike akula nā kānaka, ka poʻe me ia i ka wā i kāhea aku ai ʻo ia iā Lazaro mai ka hale kupapaʻu mai, a hoʻāla hoʻi iā ia mai ka make mai.
18No ia mea, nui nā kānaka i hālāwai me ia no ko lākou lohe ʻana i kēia hana mana āna i hana ai.
19A laila ʻōlelo aʻela nā Parisaio iā lākou iho, “E nānā ʻoukou, ʻaʻohe lanakila iki ʻoukou; aia hoʻi, ua hele ko ke ao nei ma hope ona.”
20¶ He poʻe Helene kekahi o lākou i hele mai e hoʻomana ma ka ʻahaʻaina.
21No laila hele mai lākou i o Pilipo lā, ka mea no Betesaida i Galilaia, ʻōlelo maila lākou iā ia, ʻī maila, “E ka haku, ke makemake nei mākou e ʻike iā Iesū.”
22Hele mai ʻo Pilipo, a haʻi aʻe iā ʻAnederea; a ʻo ʻAnederea a me Pilipo i haʻi hou aku iā Iesū.
23ʻŌlelo maila ʻo Iesū iā lākou, ʻī maila, “Ua hiki mai ka hora e hoʻonani ʻia ai ke Keiki a ke Kanaka.
24“ʻOiaʻiʻo, he ʻoiaʻiʻo kaʻu e ʻōlelo aku nei iā ʻoukou, inā e make ʻole kekahi huapalaoa i hāʻule ma ka lepo, inā ua waiho hoʻokahi wale nō ia; akā, inā e make ia, e hua nui mai nō ia.
25“ʻO ka mea makemake nui i kona ola, e lilo aku nō ia; akā, ʻo ka mea hoʻowahāwahā i kona ola ma kēia ao, e ola mau loa aku nō ia.
26“Inā e hoʻokauā mai kekahi naʻu, e hahai mai ia iaʻu; a ma koʻu wahi e noho ai, ma laila pū nō hoʻi kaʻu kauā; inā e hoʻokauā mai kekahi naʻu, e hoʻomaikaʻi ka Makua iā ia.
27¶ “ʻĀnō ua kaumaha kuʻu naʻau, a he aha kaʻu e ʻōlelo aku? ‘E ka Makua, e hoʻopakele iaʻu i kēia hora?’ Akā, no kēia mea i hiki mai nei au i kēia hora.
28“E ka Makua, e hoʻonani ʻoe i kou inoa.” A laila paʻē maila ka leo mai ka lani mai, “Ua hoʻonani iho nō au, a e hoʻonani hou iho nō hoʻi au.”
29ʻĪ aʻela ka poʻe kānaka e kū ana, a e lohe ana, “He hekili ia.” ʻŌlelo aʻela kekahi poʻe, “Ua ʻōlelo mai kekahi ʻānela iā ia.”
30ʻŌlelo maila ʻo Iesū, ʻī maila, “ʻAʻole noʻu i paʻē mai ai kēia leo; akā, no ʻoukou nō.
31“ʻĀnō e hoʻohewa ʻia ai ko kēia ao; ʻānō e kipaku ʻia aku ai ke aliʻi o ko ke ao nei.
32“Inā e kaulia au i luna, mai ka honua aku, e kauō auaneʻi au i nā kānaka a pau i oʻu nei.”
33ʻŌlelo maila ʻo ia i kēia, e hoʻomaopopo ana i ke ʻano o ka make e make ai ʻo ia.
34ʻŌlelo akula nā kānaka iā ia, “Ua lohe mākou ma ke Kānāwai, e mau loa ana ka Mesia; a pehea lā kāu e ʻōlelo, ‘E kaulia i luna ke Keiki a ke Kanaka e pono ai?’ ʻO wai lā ia Keiki a ke Kanaka?”
35ʻĪ maila ʻo Iesū iā lākou, “Me ʻoukou ka mālamalama i ka manawa pōkole loa. E hele ʻoukou ʻoiai ka mālamalama iā ʻoukou, o hiki mai ka pouli i o ʻoukou nei; a ʻo ka mea e hele ana i ka pouli, ʻaʻole ia e ʻike i kona wahi e hele ai.
36“E manaʻoʻiʻo ʻoukou i ka mālamalama, ʻoiai ka mālamalama me ʻoukou, i lilo ʻoukou i poʻe keiki no ka mālamalama.” ʻŌlelo maila ʻo Iesū ia mau mea, a hele akula, a hoʻonalo iā ia iho mai o lākou aku.
37He nui loa nā hana mana āna i hana ai i mua o lākou, ʻaʻole naʻe lākou i manaʻoʻiʻo iā ia.
38I hoʻokō ʻia ka ʻōlelo a ʻIsaia ke kāula āna i ʻōlelo ai, “«E ka Haku, ʻo wai lā i manaʻoʻiʻo mai i kā mākou ʻōlelo? Iā wai lā hoʻi i hōʻike ʻia ka lima o Iēhova»?”
39ʻAʻole nō hoʻi e hiki iā lākou ke manaʻoʻiʻo; no ka mea, ua ʻōlelo hou mai ʻo ʻIsaia,
40“«Ua hoʻomakapō ʻo ia i ko lākou mau maka, ua hoʻopaʻakikī i ko lākou naʻau, o ʻike ko lākou mau maka, o manaʻo hoʻi ko lākou naʻau, o hoʻohuli ʻia mai lākou, a e hoʻōla aku au iā lākou».”
41ʻO kēia mau mea kā ʻIsaia i ʻōlelo ai, i ka wā i ʻike ai ia i kona nani, a i ʻōlelo mai ai nona.
42Akā hoʻi, manaʻoʻiʻo akula iā ia kekahi poʻe aliʻi, he nui; ʻaʻole naʻe lākou i hōʻoiaʻiʻo aku no nā Parisaio, o hoʻokuke ʻia lākou i waho o ka hale hālāwai.
43No ka mea, makemake lākou i ka hoʻomaikaʻi ʻia e kānaka, ʻaʻole i ka hoʻomaikaʻi ʻia e ke Akua.
44¶ Kāhea aʻela ʻo Iesū, ʻī aʻela, “ʻO ka mea manaʻoʻiʻo mai iaʻu, ʻaʻole ia e manaʻoʻiʻo mai iaʻu; akā, i ka Mea nāna au i hoʻouna mai.
45“A ʻo ka mea e ʻike mai iaʻu, ʻo ia ke ʻike i ka Mea nāna au i hoʻouna mai.
46“I hele mai nei au i ke ao nei i mālamalama, i ʻole ai e noho i ka pouli nā mea e manaʻoʻiʻo mai iaʻu.
47“Inā e lohe kekahi i kaʻu ʻōlelo, ʻaʻole hoʻi e manaʻoʻiʻo, ʻaʻole au e hoʻāhewa aku iā ia; no ka mea, ʻaʻole au i hele mai e hoʻāhewa i ko ke ao nei; akā, e hoʻōla i ko ke ao nei.
48“ʻO ka mea e hoʻowahāwahā mai iaʻu, a mālama ʻole hoʻi i kaʻu mau ʻōlelo, he mea nō kāna, nāna ia e hoʻāhewa aku; ʻo ka ʻōlelo aʻu i ʻōlelo ai, ʻo ia ka mea nāna ia e hoʻāhewa aku i ka lā ma hope.
49“No ka mea, ʻaʻole naʻu kuʻu ʻōlelo ʻana aku; akā, na ka Makua nāna au i hoʻouna mai, ʻo ia kai kauoha mai iaʻu i ka mea aʻu e ʻōlelo aku ai, a me ka mea aʻu e aʻo aku ai.
50“A ua ʻike hoʻi au, ʻo kāna kauoha ʻo ia ke ola mau loa. ʻO nā mea hoʻi aʻu e ʻōlelo nei, ke ʻōlelo nei au e like me ka Makua i kauoha mai ai iaʻu.”
موجودہ انتخاب:
KA ʻEUANELIO I KĀKAU ʻIA AI E IOANE 12: KBH
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Ka Baibala Hemolele © Partners Development Foundation, 2018.
