Ta je Vejec 25
25
1WALANG minya je vejec anyi Solomona, waleji hnen je atö Hezekia tuhan Juda hna uny.
2Hmanenanginy Khong he ka oiyongâ ke ûnyi:
Ke hmanenanginy je than he ka elelâm ke ûnyi,
3E gorany drany, ke dit hmeledrany,
Ke haba hnyekon je than, me ca hnâu thang.
4Hom degecâ but kânâiny sileva,
Me me manen dut kaia hobi kâu at ame le:
5Hom degecâ but at ae kong unyin than,
Me me hwege anyin theron hnyi wisa.
6Ca he ka jöjön hnyi hnyimakan than,
Ke ca tot bi hnyi hnen tavat ae beönua:
7Anyin ae so he ka ha köu, ka habe, Aiö u kâ âng;
Ke kong bi he ka ohnyikönö u hnyi hnyimakan than,
U je wâ e hnen li emâkâm.
8Ca ie he logot he ka ivino
Wâ e nye ca khanö u ûnyi he ka ânyâ hnyi obiny,
E ka hia but ohmehmö u hnen at ame laba hakekenyi u.
9Ka ivino thö hobi köu bi me at ame laba hakekenyi u,
Ke ca omanenâ ûnyi ae iyong ge ke at:
10Wâ e nye haikongu u hnen at ame long,
Ke ca wia hmetu bi gam hna haikongu u.
11Je ohköiö gol hnyi je tang sileva
Hofuc adre me ha hnyi ûen ae ûcû.
12Otru gol, me omjeû gol ae so,
Helâe at metâ ame nâ at ame long ge hnyikonyen,
13Haba ûthumetu ae hnathu,
Me helâ me imegecin kiona hnyi ûen menu, ka at a kunâ e,
Anyin a e ame omenyikâ hnyekon latuhan.
14Je ûlâ, me ang, ke ba we,
At ame ka haisoâ e bi ge anyin je betenge, kʼ ame thoi bi.
15Adre me ohmehmela than ge hok hnyok,
Kʼ ame ohmetro jö ge esongot ae menyik,
16Hawa, u je wâ hani? an dö ûnyi ae ûcû köu;
Wâ e nye sekom me hmita hmetu.
17E so cam ame owakhaletâ uto uma umen waem;
Wâ e nye höcö thö gam, me hûkötiö u.
18Hama, me hele vat, me fana ae so ho makan
At ame ohnathoâ thoi ge ke at.
19Nyu ae hmetru, ke ca a khikhin,
He ka geju ka at ae ca hnathu hnyi ûen vec.
20Haba at ame hai je khumöng ka hnyok ae hloûhloû,
Me helâ me at ame uny dö ûkhaû hnyi bong megic, ke helâ me soda adre me hû ge vinega.
21A ne mekihnânem iwahnaihmiony möu, bethe hûn ju;
Kʼ ame ne beic, habelen ju ge köiö:
22Anyin a u me he ka ûkhöûnâ je walep ae möt hon ban,
Kʼ ame he Iehova ka bi hwaban köu.
23Haba ang ûnyi hnyi hwadro, me ame hom we:
Ke ame okûâ hnyimak ae hmonyin hnen bohmen ame ûhaiö.
24E so he ka laba hnyi bahebetiny ban uma,
Ke kong bi he ka tha uma hnyi uma ae gan me momo ame û.
25Helâ me köiö ae katebu ka at ame beic,
Helâe uthumetu ae so ûnyi hnyi hnyei ae sâkâû.
26Pupua adre uto, ke köiö adre oikikiâ
Helâe at ae wisa kʼ ame he hwahwali hnyi hnyimakan at ae monu.
27E ca so he ka han gânâ hani:
Ke ca hmanenang ka tavat he ka ve elâm anyidrin hmanenang bi.
28Haba at ame ca muso hnyekon bi,
Wale helâ me taun adre me hagutâ hnyikânâi he ba hak vetoiny.
maintained by the British and Foreign Bible Society