At Khet 3
3
1E HU bonginy ta je ûnyi hia, me ûen hobi kâu ta je huliwa hia hnyi hmeledrany: 2e hu ûen hna hnöku ota, me ûen mok; ûen he ka tā, me ûen oc hmetu hna tā; 3ûen hlingâ, me ûen ometo; ûen hagutâ, me ûen otilâ; 4ûen tenge, me ûen hluma: ûen hnyamok, me ûen bibiâ; 5ûen khûâ degecâ je veto, me ûen ûkhöûnâ je veto; ûen ûdeluö, me ûen ca he ka delûâ; 6ûen hlo, me ûen okolo; ûen tuö, me ûen degec; 7ûen kia, me ûen tibet; ûen laba hnyibû, me ûen fuc; 8ûen betenge, me ûen hûkotiâ; ûen vat, me ûen ûsoköu. 9Ieû troban ka at ame huliwa hnyi ta je ûnyi e ame ânyâ? 10O ge wâ but huliwa ae hmak wale a ham Khong ka tavat he ka huliwan. 11E ame hia but ânyâ ta je ûnyi hia he ka hmanenang hnyi je ûen ae ûcû: ke khaca, e ame ip ûnykûme ka hmeledrany eû hnyi hnyekudra, ke so bi, at ame ca wâ huliwa ame ânyâ Khong ûnyi hnyi hwân, ke ne o but hnyi obiny. 12E khanö nya ae ba soidra, hon he ka senyin, me ânyâ so, ödra ka tiga möt. 13Ke haba khaca, ae ka han me ic tavat, me senyin so hnyi anyidra huliwa, wale bwihlany anyin Khong. 14E khanö nya a haba hna ânyâ hnen Khong ame he ka e nyiele balua: adre me ca he ka bi hanen ka hnyin, ke adre me ca he ka ohia ûnyi hnyin: ke Khong ame ânyâ e me me ot at hnyi hnyimakan. 15Haba ûnyi kâû adrem ka e bi walang ang; ke haba ûnyi ame he ka o, me ûnyi kâû adrem: ke Khong ame elâm ûnyi ae hia.
16Ke oge me wâ hmetu hmelen seûno, ae hnyi umen owisa, a e bi ling hwakecin ae kong; ke e bi hnyi hnen hwakecin ae wisa, wale bi e hwakecin ae kong. 17Haingök hnyi hnyekuk, ka habe, Hamen Khong he ka owisa ka at ae wisa me at ae kong: anyin ae hu ûen ta je ûnyi hia me ta je huliwa hia. 18Haingök hnyi hnyekuk, ka habe, Wale can tavat, me me he Khong ka cubic ödra, me he ka omanenâ kodra a ödra ûcû me ta je meno. 19Anyin a haba ûnyi ame o ka at, me ame o minya ka meno; kʼ ame o ködru ûnyi a khaca; haba mok anyin ke at, me helâ me mok anyin ke at; eke, e tha ûcû homenödru; ke ca beönua bi at hon meno: anyin a thatûnyi hia. 20Kʼ ame he ödru lo hia ka hnyi dok a khaca; ûhedru hia eû hnyi kânâ, kʼ ödru me he ka wia hmetu hia me me kânâ. 21Ie at ae khana hanon at ame ölö goranyai, me hanon meno ame utut kâû hnyikânâi? 22Anyin a wale oge me wâ but ae ba soiny at ae nua hon he ka senyinâ anyin ta je huliwa; anyin a wale jekhon: anyin a ie at ame he ka hom hmetu e, me me wâ ta je ûnyi hwaban?
maintained by the British and Foreign Bible Society