Kururu Owu-apọkọ 2
2
KỊNỊNYANAḄỌ Ḅe Fomu-ḅara Jeruselemu Ḅụụ Ḅụ
1Ndẹẹ KỊNỊNYANAḄỌ ḅe ori ịganị ḅụ
kpọma-ḅẹlẹmarị Jeruselemu mẹ kẹ kpiti-so ḅụ kuroma ḅara!
Ori Izirẹlị ḅẹ ḅịyarị ebube mẹ
kẹ So-ḅio wakị kiri-ḅio kuroma tẹẹ;
ori ịganị ene mẹ ḅụ,
ọ̀ kẹ ḅụọ gbanamarị ịkasiye mẹ sọ ọ̀ kẹ ḅiokoroma-a.
2KỊNỊNYANAḄỌ ḅe ọkụrụkụrụ nyana-a ḅara kẹ,
Jekọbụ angarị anga mamgba fama tẹ;
ọ̀ kụrọ ịganị ḅụ ò Juda ḅẹ ẹrẹḅọtụḅọ ma,
kụrọtẹ ḅọị anga mẹ kan-sara tẹ;
kụn nyana-a ḅara ḅụ ori ama-da kụrọ mẹ na,
anị ḅẹ ḅẹrẹtọn-apụ na kẹ kiri-ḅio kuroma tẹ.
3Ḅalafama ịganị ḅụ,
ori Izirẹlị nyana kụrọ mamgba pẹlẹ-siin tẹ;
kịnị-na-fịya-a ḅọ ḅe tọrụ-ogbo ḅụ,
ori ịna ḅụụ ori ama-ḅara nụnụ-ọkị tẹ;
ò vuru-vuruma kọrịarị fịnị kọrị ḅara kọrị tẹ Jekọbụ ḅio ḅụ,
tẹ kiri mamgba dọkịmam.
4Kịnị na fịya-a ḅọ kịka ḅara ḅụ, ori ori iboli anda wa da tẹẹ;
ọmụḅọ ḅara kẹ ori ama-ḅara kuroma tẹ;
wamịna atọrụngbọ ḍiki ḅioḅẹlẹ aị mamgba ọ̀ ḅaa fama tẹẹ,
kpọma-ḅẹlẹmarị Jeruselemu akpụrụ-warị mẹ ḅio ḅụ;
fịnị kọrị ḅara mie ọ̀ kẹ ori owi-ịganị ọsụma pakama ḅara.
5KỊNỊNYANAḄỌ ḅe ḅo gbala kịnị na fịya-a ḅọ sọ tẹ,
ori Izirẹlị fama tẹ;
ori anị ḅẹ amadapụ awarị mamgba kan-sara tẹ
anị ḅẹ kụrọtẹ ḅọị anga ma kan-sara sara mịẹ tẹ,
tẹ Juda ḅe ẹrẹḅọtụḅọ ma ḅio ḅụ,
ḍụẹịn-ḍuu na, owu na, kururu na serima tẹẹ.
6Ọ̀ ḍụọ kan-sara ḅara kẹ ọ̀ sịḅị-kikima-yọ kan-sara tẹ,
ori tọn kopini alalị fị anga mẹ kan-sara sara mị;
KỊNỊNYANAḄỌ ḅe mịẹ tẹ Zayọnị ḅụ
kopini alalị na Ịnyọsara-Ene na kunoma tẹ,
tẹ ọ̀ ḅalafama ịganị ḅụ,
amadaḅọ na, agbamịẹḅọ na ḍiki-sima tẹẹ.
7KỊNỊNYANAḄỌ ḅe ori agbamịẹ-anga ḍiki-sima,
tẹ ọ̀ fịafịa yọ mẹ sịkị tẹ;
arị amadapụ awarị ḅẹ onu ma,
ọ̀ ḅọrọma kịnị-na-fịya-a ḅọ ḅe ḅara-ḅio suu tẹ;
owu-ḅara-iḅi oloku KỊNỊNYANAḄỌ ḅe warị ḅio fiem,
gbala ene pẹlẹ tẹ fịarị kopini alalị ọkụ.
8KỊNỊNYANAḄỌ ḅe tọn tẹẹ mịnẹ
ọ̀ kpọma-ḅẹlẹmarị Jeruselemu onu mẹ kan-sara ḅa;
ò ye-tọn ḍigi kẹ anị tọn siinm;
anị kan-sara ḅụ ori ọ̀ ḅara ọlọ-sịẹma-a;
ọ̀ mịẹ tẹ onu na anị palị kụrọma lịka na kururum,
ịn ḅarị koro-a ḅara sime gbolomam.
9Árị ogigo-aḅọkọ jine kiri-ḅio sọ tẹẹ;
arịḅẹ ẹngbẹsẹ-ikulele ma, ò ye kẹ lama tẹ arị anyịma tẹẹ;
árị amadaḅọ na, amadaḅọ owiapụ-awọmẹ ma na,
opu asịẹ ma ogbo ḅio emi;
oloko mẹ ḅarị ofori,
anịsakị arị ịkịankoroapụ sọ ḅarị KỊNỊNYANAḄỌ ḅe
ḅụ ḅo ịkịan ẹrị-a.
10Zayọnị ḅẹ ẹrẹḅọtụḅọ ma omongiapụ ma,
ẹkwẹn-a ḅara kẹ kiri-ḅio lẹgị-simem;
ịn fọọn kẹ ịna asịḅị sara tẹ
akpa sụa tẹẹ.
Jeruselemu ḅẹ fịrịmẹnjị-ereme ma,
ịna asịḅị-tuu mu kiri lama tẹẹ.
11Owu ḅụ ị̀ atọrụngbọ agụnkwọ ḅịya tẹ foin tẹẹ;
ị̀ ḅala sịḅịḅio pikiri tẹ owuarị inweni-ogbo ḅio emi
ḅioḅu ḅụ ì ḅioḅẹngbọ ḅịkị koro tẹ,
ị̀ atomi ma ẹrẹḅọtụḅọ ma gulugulu mẹ ẹrẹsị,
gbala ḍọkọḍọkọ-awọmẹ na, ndo-ndoarị awọmẹ na
naịn-naịn-ḅọrarị opu ama mẹ ḅẹ etela-ogbo ḅụ.
12Ini owu-owu ịna iyingiapụ pịrịarị
“Fịye na minji na tọ-anga emi?”
Ye la wararị owiapụ opu ama mẹ ḅe etela-ogbo ḅụ
ịnyọ fa tẹ koro-sime ḅara,
ini ịna iyingiapụ ekpe ọgọnọ sime tẹ
ịna ịnyọ biinm.
13Àrị í gotẹ tiye ẹkwẹn tẹ
tiye kẹ ị́nịna pii-pii ḅẹẹ ḅẹ,
yei kpọma-ḅẹlẹmarị Jeruselemu?
À tiye kẹ inetẹ í kịkama ḅẹ,
mịẹ tẹ àrị í dedema ḅẹ ḅara,
yei Zayọnị ḅẹ ḅụụ-gboloa ẹrẹḅọtụḅọ?
Kẹ gotẹ ọkọ ḅẹẹarị, opu tọrụ mẹ finjima la ḅara,
mie ị́ ḅụụ si-aị ma ḍụḅa la ḅara;
tụḅọ inetẹ ị́ kẹ í sime-sime ḅara wẹrị ḅẹ?
14Ị́ ịkịankoroapụ iruo ịkịan na, oḅori kẹ ị́ sịn ịkịan na,
koro-koro ị́ pịrị tẹẹ;
ini amụ ị́ mịẹ-irima mẹ mịẹ pakama-a
kẹ sime ị́ pịrị aị pịkịma-ḅo,
kụma iruo aị na, kịnị irima aị na
mie ini ẹrị-ẹrị ị́ pịrị yee.
15Inima tẹ etela mẹ ḅụ mẹ ḅụ mẹnjị-ḅọrọ apụ mamgba,
ịna aḅara farị-farị ị́ dam;
ini í kombo-kombo tẹ ịna asịḅị jike
Jeruselemu ḅẹ ẹrẹḅọtụḅọ ma pịrịm;
“Mie opu sịẹ mẹ tẹ ini iḅi kọnma-a ama
kẹ siin sime opu ama mẹ,
tomikiri mamgba ḅẹ ḅioḅẹlẹ mẹ anị-a?”
16Ị́ na fịya-a apụ mamgba,
ịna ḅịḅị ḅẹ sọ-sọ ye, sọ ye kẹ í worim,
ini í kombom, ini ịna aka farịm,
ini olokum: “Wa á guluguluma tẹẹ!”
Mie wa koru sime ene mẹ,
wamịna ḍumo-tọrụ ḅụ wa anị ẹrị tẹẹ.
17KỊNỊNYANAḄỌ ḅe ọ̀ mịẹ ḅẹ tọn ye mẹ mịẹ tẹẹ,
ori ẹrẹma ye mẹ ọ̀ mịẹ tẹ;
ọ̀ wẹrịtẹ ala tẹ sakị ḅụ tọn kuroma ḅara,
ori ọkụrụkụrụ nyana-a ḅara kẹ kan-sara tẹ;
ọ̀ mịẹ tẹ kịnị-na-fịya-a ḅọ ḅe í gotẹ ḍerekum,
tẹ ị́ ọmụḅọ ḅe kụrọ saakị-gelemam.
18Oloku-oloku owu KỊNỊNYANAḄỌ ḅe pịrịị,
yei kpọma-ḅẹlẹmarị Jeruselemu!
Yee owu-minji ofion-minji ḅọrọ-ḅọrọ ḅara kẹ ị́ tọrụkuḅu ḅụ sara,
eneḅaka na ḍin na ḅụ!
Ịnyọsara kẹ ị́ ḅụụ pịrị ma,
pịkị gbene-sime sọ kẹ ị́ atọrụngbọ pịrị ma!
19Saakịị, owu pakamaa ḍin ḅụ,
ḍin koru mẹ suku-saakịarị ḅiri ḅụ!
Minji ọsụma ḅara kẹ í ḅioḅẹngbọ ọsụma KỊNỊNYANAḄỌ ḅe pịrịị!
Ị́ aḅara saakị-gelema ọ̀ daa
ị́ awọmẹ ma aḍumo gotẹ,
inima tẹ ḅuru pọkọ-tarị ḅụ naịn-ḅọrọarị apụ ma,
etela goyegoye sịḅị ḅụ.
20Yei KỊNỊNYANAḄỌ, ḍikii, tẹ ẹrịị!
Ị́ ḅọrọ mịẹ ḅara mẹ kẹ tụḅọ na mịẹarị?
Ereme ini iyi awọmẹ pẹị na-iḅi,
ini ḍikiarị awọmẹ ma?
Agbamịẹḅọ na, ịkịankoroḅọ na ḅaa na-iḅi
KỊNỊNYANAḄỌ ḅe fịafịa yọ ḅụ?
21Etela ma ḅẹ fọọn ma ḅio
asambịrịmaḅọ mẹ na, omongitẹ ḅọ mẹ na ḅọlọlọ simem
ị̀ iriawọ ma na, ị̀ asawọ ma na,
okologie mẹ ḅụ ḅịkị tẹ;
ị́ ịganị ene mẹ ḅụ ị́ ịn ḅaa tẹ,
ọkụrụkụrụ nyana-a ḅaa ḅara.
22Ị́ wẹrịtẹ alalị ene ḅụ kịnị sịn kobiri ḅara,
mie pakịrị-pakịrị ḅụ í tẹmẹ-naịn-naịn sịn ì gbori ḅara
tẹ KỊNỊNYANAḄỌ ḅe ịganị ene mẹ ḅụ,
gbọrụḅọ-sọ mangị-soa, anịanịa ḍumo-sime;
inima tẹ à bala tẹ ḍikiḍiki pakama-ḅo apụ ma,
ị̀ na fịya-a ḅọ ịn ḅaa famam.
(C) The Bible Society of Nigeria