- योना 3
3
हुकम कौ मानबो
1तब यहोवा परमेसुर कौ जौ बचन दूसरी बेरां योना के लिगां पोंचो, 2“उठकें ऊ बड़े नगर नीनवे हों जा और जौन बात मैं तोहों बताहों, ऊकौ ऊमें परचार कर।” 3तब योना यहोवा परमेसुर के बचन के अनसार नीनवे हों गओ। नीनवे एक भौत बड़ो नगर हतो, ऊमें घूमबे के लाने तीन दिना लगत हते। 4योना ने नगर में पोंचकें एक दिना कौ सफर पूरो करो और जौ परचार करत गओ, “अब सें चालीस दिना बीतबे पै नीनवे कौ नास हो जैहै।” 5तब नीनवे के मान्सन ने यहोवा परमेसुर के बचन की बात पै बिसवास करो; और उपासे रैबे कौ परचार करो और बड़े सें लेकें छोटे लौ सबई ने टाट ओढ़ो।
6जब जौ समाचार नीनवे के राजा के कान में पोंचो तो ऊने सिंहासन पै सें उठकें, राजसी उन्ना उतारकें टाट ओढ़ लओ और राख पै बैठ गओ। 7और ऊने परधानों संगै पूरे नीनवे में ढ़िंढोरा पिटवाओ: “का मान्स, का गईया-बैलवा, का गाड़र-छिरियां, और सबरे पसु, कोऊ भी कछु नें खाबै; और कछु नें पियें। 8मान्स और पसु दोई टाट ओढ़ें, और बे यहोवा परमेसुर की दुहाई चिल्या-चिल्याकें देबें; और अपने कुकर्म सें पलटें; और ऊ उपद्रे, जौन बे करत आंय, पछताबो करें। 9हो सकत आय, यहोवा परमेसुर दया करे और अपनी इच्छा बदल देबें और उनको भड़को भओ खुन्स सान्त हो जाबै, और हमोंरें नास होबे सें बच जाबैं।”
10जब यहोवा परमेसुर ने उनके कामन हों तको, कि बे कुमार्ग सें फिर रए आंय, तब ऊने अपनी इच्छा बदल दई और उनोंरन की जो हानि करबे की ठानी हती, ऊहों नें करो।
موجودہ انتخاب:
- योना 3: BHB
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
New Testament books: © 2018 Central India Christian Mission.
Old Testament books: © 2018 Central India Christian Mission and Pioneer Bible Translators