Ɨ̀fàʼì 15
15
Bə̂d tom Kristo nyaʼa yim ɨfetɨ ə Jèrusalèm
1Bə̂d mɔʼɔ nyaʼa swiʼi rɨ ə Jùdeyà wò ə Antiɔ̀k. Mbɨ nyaʼa pè kɔ chwi ɨnû əmbɨ ə bə̂d Kristo mbe rəŋgu ghàə̀ ni, “Chəi mbə̀ bɨrɨ jwɨ rəŋgəʼ əwù ze nɨ chəi mbɨ ne əwən ɨchî nɨ zɨə yeʼ ɨŋga tɨkə rɨ Mose.” 2Pɔ̂l mbɨ Banabàs nyaʼa berɨ tàŋ kǎ kǎ mbɨ ə bə̂d mbe ɨmbə̀ʼ ənû ze. Əne mbɨ nyaʼa chɔʼ ə Pɔ̂l mbɨ Banabàs mbɨ ə bə̂d Kristo cherə, tom mɨ̀mə̌d ni mbɨ kɔʼ wò ə Jèrusalèm wò nweenɨ ənû ze mbɨ ə bə̂d tom fɔrɨ mbɨ ə bə̂d mbe nɨ nyaʼə chà ɨfetɨ bə̂d Kristo.
3Ənɨ ɨfetɨ bə̂d Kristo nyaʼa tom mɨ̀mə̌d əne, mbɨ nyaʼa wò chè ə Fonesià fɔrɨ ə Sàmàriyà yènə̀ ghà ɨnû ɨmbə̀ʼ ɨchî nɨ bə̂d mbe nɨ kaʼi mɨ̀Jû fə ben ə Kristo. Əze ə nyaʼa ghɨ̀ ni ɨghaʼi swi ɨŋga fîŋ bə̂d Kristo mɨjìm. 4Ənɨ mbɨ nyaʼa wo pè ə Jèrusalèm, ɨfetɨ bə̂d Kristo, bə̂d tom Kristo mbɨ ə bə̂d mbe nɨ nyaʼə chà ɨfetɨ bə̂d Kristo nyaʼa nɨŋ mɨ̀mə̌d kwàʼ ɨchî chɔ̀m. Pɔ̂l mbɨ Banabàs nyaʼa ghà ɨnû jìm mbe nɨ Ŋwìə̀ nyaʼa che ənjìm mɨ̀mə̌d ghɨ̀. 5Àyɨə bə̂d mɔʼɔ mbe nɨ nyaʼa ben ə Kristo, nɨ nyaʼa rɨŋga ɨfɔtɨ mɨ̀Farisiî, nyaʼa təm rətiə ghà ni, “Zɨə kùʼ ni mbɨ ne bə̂d mbe nɨ kaʼi mɨ̀Jû bə̀ ghà əmbɨ mɨ̀mə̌d ni mbɨ nuŋ tɨkə rɨ Mose.”
6Bə̂d tom Kristo mbe mbɨ ə bə̂d mbe nɨ nyaʼə chà ɨfetɨ nyaʼa bòmnɨ̀ ɨmbə̀ʼ nweenɨ ənû zɔ̂. 7Ənɨ mbɨ nyaʼa fə gham ənɨ əgha ə se, Pità nyaʼa nɔ̀ʼ təm rətiə ghà əmbɨ mɨ̀mə̌d ni, “Mbɨ bɔŋgɔb, mbə̀ kyerɨ ni à nyaʼa ɨŋga ɨni mbe nɨ ɨnû mbɔ̂ nyaʼa kɔ, Ŋwìə̀ nyaʼa chɔʼ əmɨ rəkaʼ nən ni mə gha ɨkə̂n chɔ̀m əmbɨ bə̂d mbe nɨ kaʼi mɨ̀Jû, ɨmbə̀ʼ mbɨ zu benɨ. 8Əne Ŋwìə̀ we nɨ kyerɨ fîŋ rɨ bə̂d mɨjìm nyaʼa chwi ni tə fə chɔʼɔ mɨ̀mə̌d ɨchî nɨ wɨ̀ nyaʼa naʼ Əzwî ə Zeŋɨ əmbɨ mɨ̀mə̌d àmei ɨchî nɨ wɨ̀ nyaʼa bə̀ naʼ ɨ na. 9Chəi wɨ̀ nyaʼa ghɨ ni ɨkwepɨ jwɨ əkaʼ na mbɨ mɨ̀mə̌d. Ɨchî nɨ mbɨ nyaʼa ben ə Kristo, wɨ̀ nyaʼa bə̀ waʼ ɨnû rɨbɔ̀ŋ mɨ̀mə̌d. 10Əne tɨ̀nîn mbə̀ kɨə kəb zweʼrɨ ə Ŋwiə̀ ɨchî nɨ mbɨə zɨ̀ ɨkom nɨ nirɨ ɨgun ə bə̂d mbe nɨ ben ə Kristo, nɨ chəi mba mɨ̀mbǎʼ rəŋwe kɨ̀ mbǎ mbe tɨ̀ rɨ̀ bèʼ, kɨ ɨmbə̀ʼ ə yè ə? 11Àyɨə tɨ̀ benɨ ni tɨ̀ bɨrɨ jwɨ rəŋgəʼ ənjìm ɨ̀chɔ̀m Ə̀nùŋɨ̀sɨg Yeso, àmei ɨchî nɨ mɨ̀mə̌d bɨrɨ bɨ jwɨ̀.”
12Bə̂d mɨjìm mbe nɨ nyaʼa ɨŋga fetɨ we nyaʼa kəm rəziə ɨchî nɨ mbɨ nyaʼə zwetɨə ɨnû mbe nɨ Banabàs mbɨ Pɔ̂l nyaʼə ghà ɨmbə̀ʼ ɨchî nɨ Ŋwiə̀ nyaʼa che ənjìm mɨ̀mə̌d ghɨ̀ ɨnweenɨ-ɨnû bə̀ ghɨ̀ ɨnû yiirɨ əkaʼ bə̂d mbe nɨ kaʼi mɨ̀Jû. 13Ənɨ mbɨ nyaʼa fə ghamɨ màànɨ̀, Jems nyaʼa ghà ni, “Bɔŋgɔb, mbə̀ zwetɨ mə ghamə. 14Saimòn fə tòʼrɨ̀ ɨchî nɨ Ŋwìə̀ nyaʼa be chwi ni tə wɨə nəŋgɨə bə̂d mbe nɨ kaʼi mɨ̀Jû. Wɨ̀ nyaʼa ghɨ̀ əne ɨchî nɨ wɨ̀ nyaʼa chɔʼ bə̂d mɔʼɔ rəkaʼ mɨ̀mə̌d ənɨ mbi. 15Mɨŋgam mbe nɨ bə̂d ɨ̀kə̀n Ŋwiə̀ nyaʼa ŋwaʼnɨ ə bòmnɨ̀ mbɨ ɨnû mbɔ̂ nɨ mə̀ gha ɨ nən. Mbɨ nyaʼa ŋwàʼnɨ̀ ni,
16'Ənû zɔ̂ ə mɨ chè, mə bɨrɨ wɨrɨ yeʼe,
əne nɔ̀ɔ̀rɨ̀ ənû ɨfɔ̀n ə Dèvîd ze nɨ nyaʼa buʼə.
Mə bɨrɨ wɨrɨ nɔɔrɨ tɨfum te,
əne ghɨ̀ ənû ɨfɔ̀n ze ə təm kàànɨ̀.
17Mə bɨrɨ ghɨ əne, ɨmbə̀ʼ ə̀bùʼ ə bə̂d mɨ̀jìm wɨrɨ kəb Ə̀nùŋɨ̀sɨg.
Bə̂d mɨjìm mbe nɨ kaʼi mɨ̀Jû nɨ mbɨə tɔŋ ənɨ mbɨ bə̂d bɨrɨ bɨ kəb əmɨ.
18Əzɔ̂ yɨ ənû nɨ Ə̀nùŋɨ̀sɨg we nɨ nyaʼa ghɨ ni mbɨ kyerɨ ɨnû mbɔ̂ nɔ̀ʼ tɨ rəŋwe, ghǎ.'
19“Əne ənû nɨ mə̀ kɔndɨ yɨ ni, tɨ rɨ̀ chə a bə̂d mbe nɨ kaʼi mɨ̀Jû nɨə beenɨ əbɔʼ ə Ŋwiə̀. 20Àyɨə tɨ̀ ŋwaʼnɨ əmbɨ mɨ̀mə̌d ni tɨ mbɨ jɨg ə tɨjɨg te nɨ mbɨ naʼ ənɨ əghɨ ə̀fà əmbɨ mbɨ̀anèŋ, ni tɨ mbɨ ghɨ̀ ə ɨfabrɨ-ɨnû, ni tɨ mbɨ kud ə nyam te nɨ mbɨ sweenɨ mbɨ ni tɨ mbɨ jɨg ə ənəm. 21Mbɨ nyaʼa fə kɔ gha ɨnû ɨmbə̀ʼ rɨkə rɨ Mose ɨŋga ɨsɨ jìm nɔ̀ʼ tɨ rəŋwe. Bə̂d mbɨə bə̀ foŋ ɨŋgam we ɨŋga nəb tɨ ə̀kàtɨ̀ ɨni ɨkwɨ mɨ̀Jû jìm.”
Bə̂d tom Kristo nyaʼa ŋwàʼnɨ̀ əmbɨ ə bə̂d mbe nɨ kaʼi mɨ̀Jû
22Bə̂d tom Kristo mbɨ ə bə̂d mbe nɨ nyaʼə chà ɨfetɨ we rɨ ə Jèrusalèm mbɨ ə bə̂d Kristo mɨjìm nyaʼa chɔʼɔ mbaŋə̀ rɨ̀be rəkaʼ mɨ̀mə̌d, əne tom ni mbɨ wo ə Antiɔ̀k mbɨ Pɔ̂l fɔrɨ ə Banabàs. Mbɨ nyaʼa tom ə Judàs we nɨ mbɨ nyaʼə bə̀ tɔŋ ənɨ Bàsabàs mbɨ Sailàs. Mbɨ yɨə nyaʼə bə̂d kyeŋ əkaʼ bə̂d Kristo mbe ə Jèrusalèm. 23Mbɨ nyaʼa tom mɨ̀mə̌d mbɨ ə̀ŋwàʼnɨ̀ nɨ nyaʼa gha ni:
“À yɨə mbà mbə bɔŋgɔb bə̂d tom Kristo mbɨ ə bə̂d mbe nɨə chà ɨfetɨ we rɨ ə Jèrusalèm ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ ɨ nən, mbə̀n mba bɔŋgɔb mbe nɨ kaʼi mɨ̀Jû nɨ yeʼ ə Antiɔ̀k, ə Sirià bə̀ fɔrɨ ə Selisià. Tɨ̀ wɨə chàʼrɨ̀ əwən. 24Tɨ̀ fə zu ni bə̂d mɔʼɔ fə nɔ̀ʼ rəkaʼ na yeʼe əwɔ ghanə chə əwən mbɨ mɨŋgam bə̀ tɔbə tə fîŋ, nɨ chəi tɨ̀ nyaʼa gha ni mbɨ ghɨ əne. 25Tɨ̀ fə bòmnɨ̀, zɨ̀ mba ɨtu ənɨ mbɨ mɔʼ, zə ni zɨə bɔ̀ŋ ni tɨ̀ chɔʼ bə̂d mɔʼɔ tom əsɨ nən mbɨ Banabàs mbɨ Pɔ̂l. Mbɨ yɨ mba bɔŋgɔb nɨ tɨ̀ ghaʼi kwàʼ rɨŋgəʼ. 26Mbɨ fə sweŋ ə ɨ̀tènɨ̀ ɨmbə̀ʼ gham əmbɨ ə bə̂d ɨmbə̀ʼ a Ə̀nùŋɨ̀sɨg Yeso Kristo. 27Əne tɨ̀ fə tom ə Judàs mbɨ Sailàs əsɨ nən. Mbɨ bɨrɨ ghà ɨnû mbe nɨ tɨ̀ ŋwaʼnɨ ɨ nən mbənə mbənə. 28Zɨə bɔ̀ŋ əmbɨ Əzwî ə Zeŋɨ bə̀ bɔ̀ŋ ɨ na ni tɨ rɨ̀ nyeŋ a ɨnû cherə ɨgwɨ nən chè rɨ ənɨ mbɔ̂ nɨ mbə berɨ nɨ ghɨ̀. 29Ɨnû mbe yɨ ni tɨ mbə̀ jɨg ə tɨjɨg te nɨ mbɨ naʼ ənɨ ɨghɨ ə̀fà əmbɨ mbɨ̀anèŋ, tɨ mbə̀ jɨg ə ənəm, tɨ mbə̀ kud ə nyam te nɨ mbɨ sweenɨ, mbɨ ni tɨ mbə̀ ghɨ̀ ə ɨfabrɨ-ɨnû. Mbə bɨrɨ ghɨ̀ ənû ə chɔ̀m əwù ze nɨ chəi mbə̀ ghɨ ɨnû mbɔ̂. Mbə̀ chub ɨchî chɔ̀m.”
30Mbɨ nyaʼa tom bə̂d mbe, mbɨ swiʼ wò ə Antiɔ̀k. Mbɨ nyaʼa pè əŋgu fetɨ bə̂d Kristo mɨ̀jìm əsɨ ə mɔʼ, nàʼ ə̀ŋwàʼnɨ̀ ze əmbɨ mɨ̀mə̌d. 31Ənɨ mbɨ nyaʼa foŋ ə̀ŋwàʼnɨ̀ ze, mbɨ nyaʼa ghaʼ kwàʼ rɨŋgəʼ, ɨmbə̀ʼ ɨghəm nɨ ənû ze nɨ nyaʼa jwɨ rɨŋga ə̀ŋwàʼnɨ̀ ze ə nyaʼa tìmbɨ̀ mɨ̀mə̌d. 32Əne Judàs mbɨ Sailàs nɨ nyaʼə bə̂d ɨ̀kə̀n Ŋwiə̀ mbənə mbənə nyaʼa ghà ɨnû nɔnɔʼ tìmbɨ̀ bɔŋgɔb mbe bə̀ ghɨ̀ ni ɨbenɨ mɨ̀mə̌d kaanə. 33Ənɨ mbɨ nyaʼa fə chub əŋgu ənɨ əkɔb ə nyumə̀, bɔŋgɔb mbe nyaʼa wɨrɨ chà mɨ̀mə̌d ənɨ əbɔrəbɔd əmbɨ mbe nɨ nyaʼa tom mɨ̀mə̌d. 34[Àyɨə Sailàs nyaʼa chub əŋgu.] #15.34Chəi əsɨ ə̀ŋwàʼnɨ̀ zɔ̂ ɨŋga ɨ̀ŋwàʼnɨ̀ ənun mɔʼɔ.
35Pɔ̂l mbɨ Banabàs nyaʼa tèn ə Antiɔ̀k. Mɨ̀mə̌d mbɨ ə bə̂d mɨ̀nɔnɔʼ cherə nyaʼə chwi ɨnû bə̀ ghà ɨŋgam ɨmbə̀ʼ Ə̀nùŋɨ̀sɨg.
Pɔ̂l mbɨ Banabàs nyaʼa ghabrɨ
36Ənɨ ɨni mɔʼɔ nyaʼa chě, Pɔ̂l nyaʼa ghà əmbɨ Banabàs ni, “Yeʼe tɨ̀ wɨrɨ bə̀ndɨ̀ wò mò bɔŋgɔb mbe rɨŋga ɨsɨ jìm mbe nɨ tɨ̀ nyaʼa gha ɨŋgam Ŋwiə̀ əŋgu, bə̀ zə ɨchî nɨ mbɨ yeʼ ə.” 37Banabàs nyaʼa kə̀b ni njɨ mbə̀ nɨŋ ə Jɔ̌n Mak wò mbɨ məd. 38Àyɨə Pɔ̂l nyaʼa kɔndɨ əzi yeʼ ni zɨ rɨka bɔŋ i ni mbə̀ nɨŋ əməd, ɨmbə̀ʼ ɨghəm ni wɨ̀ nyaʼa waʼ əwən ə Pamfilià bə̀ndɨ̀ wò i. Chəi wɨ̀ nyaʼa wo ɨmbì mbɨ nən ənɨ ə̀fàʼì ze nɨ mbə̀ nyaʼa berɨ wo fàʼ. 39Ənû ze ə nyaʼa ghɨ̀ mbɨ tàŋ kwàʼ rɨŋgəʼ. Əze ə nyaʼa ghɨ̀ mbɨ ghàbrə̀. Banabàs nyaʼa nɨŋ ə Mak mbɨ ni mbɨ nyɨ əbaŋ ɨgyɨ̀ wò ə Saiprùs. 40Àyɨə Pɔ̂l nyaʼa chɔʼ ə Sailàs mbɨ wò ɨnɔ̂n. Bə̂d mbe nɨ nyaʼa ben ə Kristo nyaʼa kɔ̀ŋgɨ̀ ə Ŋwiə̀ ɨgwɨ mɨ̀mə̌d ni Ə̀nùŋɨ̀sɨg ghɨ ɨ̀chɔ̀m ənɨ mɨ̀mə̌d. 41Pɔ̂l nyaʼa wò chè ə Sirià fɔrɨ Selisià, yènə̀ tìmbɨ̀ ə bə̂d Kristo rɨŋga tɨfetɨ te nɨ nyaʼa ɨsɨ mbe.
موجودہ انتخاب:
Ɨ̀fàʼì 15: mgo
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© 2013, Cameroon Association for Bible Translation and Literacy