Fêt 22
22
1“Wana noma nì bom ghɨ̂n, ghàn yuti gha ye mu time a ghàn ashyə̂ hi jìs hi gàmtè ngɨŋ à mì.” 2À ndùku mô te ghɨna ywo te wù jìsà jîs yi Hibùlùs, ghɨna china kə ni moŋ. Bôl jis na,
3“Mu mò ni, mô wut à Jûs, ma ghɨ tì bwɨ mu a yi tèk yi Tasùs, a yi lak yi Sìlisiyà mu ləma kwok kə nâ yi tèk afân, yen a ndâ ŋwàklù, chichà mù hì mô Gàmàliyà. Wù tî chwûtì saktu shyətu bè ghàhnà tu ha mu nâ tù jɨ̀m. Gha Fùyènì hì lûmà a mu wùn kəbi te yi lûmà a ghàn a wu wùn lân. 4Mu tî nyâblì nì ghɨt a bimena ghe ghɨ jûmtè Lum wu fe wuna mu gbê atɨ̂n chin ni, mu ndùku khɨte lɨmànà nì ywena yê lêmà a ndâ chyâk ywite kə nâ ale. 5Ngàŋ à ndâ Fùyèn yì ngaŋtena nâ nì chəhsu lak su làwû hi bime na mu jìsà hamok. Ghɨna tî nyak ŋwàklù sù, hi fo a jyak ha mu na mu yê fo ha wana ne yi tèk yi Dàmaskùs ma mu khɨtè ben nì ghɨt ghe ghɨ jûmtè Lum mu wûn a Jèlusalèm shyəma ghɨ fo ngə̂k ha ghɨna.”
Bôl fôktì gha ye yi gana na wù kahè hi mô wut wù bimena
6À hì mô te mu gbe hì bakha yênà a Dàmaskùs, ban yile fwu a nyə̂ mwanlò, baŋ wu luk we mu ndùku mô atɨ̂n. 7Mu fen a chyə̂ yu te wùt toŋte mu jîsà na, ‘Sôl, Sôl, wò chɨma wulu mu ni njwô ghə?’ 8Mu buf ha wun na, ‘À mò wò nde a Bâba?’ Wù fîsì na, ‘À mò mu Jisòs wù Nasalì we wò fo ngə̂k ha wûn yani.’ 9Ghɨt ghe ghàh à ghɨna ndùku mô amok yen yi ban yi tɨni biyani tê ywo jə̀ gha ye ghɨ jisa ha mu. 10Mu ki buf ha wun na, ‘Mu ti nê nâ ghə chin a Bâba?’ Wù jis na, ‘Lòtî ma wò lyê yen yi lak yi Dàmaskùs ma ghɨ fokti gha ye Yènfù khɨŋa na wò ni.’ 11Ban yi tɨni tî nî se ma hì fê yena wi luktu, ghɨt ghe ghàh à ghɨna ndùku mô amok khɨti mu wu kpên gûftì lyi nì mu a Dàmaskùs.
12Wùt lè ndùku chyə afû kokhe Fùyèn, chyə kə nâ te sak yi ghàhnà khɨŋa, nâ ghɨt a Jûs à jɨ̀m kokhe wûn, yet yi wuni mô Ànàniyàs. 13Wù ben time a mu ngwùŋ jis ha mu na, ‘Wâ nôm Sôl kaha yen luktu.’ Te wù jìsa mihe ni se ma yulî kə wu yu mefû, mu ki yen wûn. 14Wù jis ha mu na, ‘Yèn fe a be ghàhnà ndùku ngumle ti chwok wò na wò khɨli gha ye fu khɨŋa na wò ni ma wò fê yen à khɨli wùt we wùt wù fètana à wûn we wù mò chilichili a mò wûn we a wù jîsà ha wò kə nâ nì ngɨŋ à wûn, 15beka wò bè time fôktèlò kum wûn, a gha afa wò ywo fî yen nì se ha ghɨt à jɨ̀m. 16Nâ chîn kə chyàhi yu. Lòtî fyi mòlû ma chyati Bâba na wù lèhefo be sasu.’
Bôl fôktì te Bâba tuma wûn ha tumu
17Mu kaha yen a Jèlusalèm lye a ndâ Fùyèn shihi jə̀m gha fwo a mu yi kə̀k te ghɨ fwu a jəm. 18Mu yen Bâba, wù jis ha mu na, ‘Nyàŋhi lòti lô a Jèlusalèm afân beka ghɨt ghɨ̂n nè bime wi gha ye wò jîsà kum mu.’ 19Mu fîsì ha wun na, ‘Bâba, ghɨna khə kə nâ hamok na mu ha mu ngɨŋ chehì khɨte à ghɨ̂t ghe ghɨ bime ha wò a wo ndasu chintesu yê fâ ghɨna a chyâk fê samâ. 20À ndùku mô te ghɨ ywe Sìtifèn we wù ndùku fôktè kum wò, nâ mu mô afû ta kə na wù kəta hi kpû. À ndùku kine kə nâ mu nì njusu ghɨt ghe ghɨ tì ywe wûn.’ 21Bâba fî jis ha mu na, ‘Lô beka mu nè tumalò wò nâ hadà ha tumu.’
22Te Bôl ndùku jîsà ni, ghɨna hì yute kə yi yutî. Wù jis ni yen tan a leŋ afân ghɨna hì bwate kə yi bwatî jîsà na ghàn ywê màka shyə mɨ ghɨ̂n! Wù kpene wi hi tè chyə̂. 23Ghɨna hì bwatê chwokte njusu ghɨna su lesu lâŋà kokhe a nyə̂ fê mwə̂tà wu bwû waŋa kokhe a nyə̂. 24To sù sojà ki jîs na, ghɨ lyê lyi nì Bôl atɨ̂n à mbàn, ma ghɨ sam wûn nâ a jûŋ nì wànsù shyəma wù fokti na ghɨt a Jûs jìsà gha ghɨ̂n kum wûn nì njwô ghə agha. 25À hì mô te ghɨ kwuta wûn hì khɨŋa hi sâm wù buf ha to sù sojà ghɨ le ghe ghɨ tì time kumhe a wun a ngwùŋ na, “Saki bimelò na ghɨ sam wùt à Lûm teka ghɨ yen gha ye wù bobhe agha?”
26Te to sù sojà ghe fate ywo gha mi yin ni, yen buf ha to sù sojà ghɨ chika na, “Wò khɨŋa hi mòmà ghə ni? Wùt wunâ mò ni a mô wùt à Lûm.”
27To sù sojà mu ghê ki yen Bôl jis ha wun na, “Fòkti ha mu na wò mò wùt à Lûm agha.” Bôl fîsì na mu mò kə nâ wùt à Lûm.
28To sù sojà ghê ki jîs na, yi ti ləsì ka wu dô kə ni shyəma yi hi mô wùt a Lûm biyani Bôl jis na, “Mu mò kə nâ wùt à Lûm a yi bwɨ̂.”
29Kə wu yu te wù jîsà ni, ghɨt ghe ghɨ ndùku khɨŋa hi sama wûn yîmì hi tè kòtì yi bàm, fânì kwo to sù sojà mu ghê beka wù ywo na Bôl mò wut à Lûm ma wù te kwut wûn nì chyaksu.
30Tuku yû, to sù sojà ghê jis na ghɨ de wûn, fî jis na ngàŋsu ndâ Fùyènsu chiksu nì ghɨt a sakana na ghɨ bê yuŋti beka wù ndùku khɨŋa hi yu hamok na ghɨt a Jûs ngane Bôl ha ghə agha. Ghɨna bên, ki jîs na Bôl chyâ time ashyə̂ yì chìntì afû.
موجودہ انتخاب:
Fêt 22: bmv
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© Wycliffe Bible Translators, Inc.