ᐃᓯᐦᒋᑫᐃᐧᓂᐋᐧᐊᐧ 28
28
1ᐃᐢᐱ ᒫᑲ ᑲᐦᑭᔭᐤ ᑳ ᑲᐹᔮᕽ, ᐁᑲᐧ ᓂ ᑭᐢᑫᔨᑌᓈᐣ ᐊᓂᒪ ᒥᓂᐢᑎᐠ ᒣᓬᐃᑕ ᐁ ᐃᓯᔨᐦᑳᑎᐠ. 2ᐱᑲᐧᒋ ᐊᔨᓯᔨᓂᐊᐧᐠ ᒫᑲ ᓇᒪᐃᐧᔭ ᐱᑯ ᐊᐱᓯᐢ ᓂ ᑭ ᒥᔪ ᑐᑖᑯᓈᓇᐠ: ᒋᑫᒫ ᑭ ᑯᑕᐁᐧᐊᐧᐠ, ᒥᓇ ᓂ ᑭ ᐅᑎᓂᑯᓈᓇᐠ ᑲᐦᑭᔭᐤ, ᐃᐧᔭ ᒣᑳᐧᐨ ᐁ ᑭᒥᐊᐧᕽ, ᒥᓇ ᐁ ᑕᑳᔮᐠ. 3ᒫᑲ ᐃᐢᐱ ᐹᓬ ᑳ ᒫᐊᐧᓴᑯᓇᕽ ᒥᐢᑎᑯᓴ, ᒥᓇ ᑳ ᐳᓇᕽ, ᑭᓀᐱᑲᐧ ᑭ ᐯ ᐅᐦᒋᐸᔨᐅᔨᐊᐧ ᐁ ᑭᓯᑌᔨᐠ, ᒥᓇ ᑭ ᐊᑲᐧᑕᒧᔨᐊᐧ ᐅᒋᐦᒋᕽ. 4ᐃᐢᐱ ᒫᑲ ᐱᑲᐧᒋ ᐊᔨᓯᔨᓂᐊᐧᐠ ᐃᐧᔮᐸᒫᒋᐠ ᐊᓂᐦᐃ ᐱᓯᐢᑭᓯᓴ ᐁ ᐊᑯᒋᓂᔨᐟ ᐅᒋᐦᒋᔨᕽ, ᑭ ᐃᑎᑐᐊᐧᐠ, ᑫᒋᓈ ᐊᐊᐧ ᓈᐯᐤ ᐅᓂᐸᑖᑫᐤ, ᐁᑯᓯ, ᐋᑕ ᐁ ᑭ ᐸᐢᐱᐟ ᑭᐦᒋᑲᒥᕽ ᐅᐦᒋ, ᓵᑯᐨ ᐅᔭᓱᐁᐧᐃᐧᐣ ᓇᒪᐃᐧᔭ ᐃᔨᓇᒫᐠ ᑭᑕ ᐱᒫᑎᓯᐟ. 5ᒫᑲ ᑭ ᐁᐧᐱᐸᔨᐁᐤ ᐊᓂᐦᐃ ᐱᓯᐢᑭᓯᓴ ᐃᐢᑯᑌᕽ, ᐁᑯᓯ ᓇᒪ ᓈᓇᑕᐤ ᐃᓯ ᐊᔮᐤ. 6ᒫᑲ ᐃᐧᔭᐋᐧᐤ ᑭ ᐃᑕᑌᔨᑕᒫᐧᐠ ᑭᑕ ᐹᑭᐸᔨᔨᐟ, ᐊᐦᐳ ᓯᓯᑯᐨ ᑭᑕ ᐸᐦᑭᓯᓂᔨᐟ ᐁ ᓂᐱᔨᐟ; ᒫᑲ ᐃᐢᐱ ᑭᓀᐧᐢ ᑳ ᐯᐅᒋᐠ, ᐁ ᐋᐧᐸᐦᑕᐦᑭᐠ ᒫᑲ ᐁᑳ ᓈᐣᑕᐤ ᐁ ᐃᓯ ᐊᔮᔨᐟ, ᐁᑲᐧ ᐱᑐᐢ ᑭ ᐃᑌᔨᑕᒪᐧᐠ, ᒪᓂᑐᐃᐧᐤ ᐁᑲᐧ ᐃᑌᐧᐊᐧᐠ.
7ᑭᓯᐋᐧᐠ ᒫᑲ ᐁᑯᑕ ᑭ ᐃᐦᑕᑲᐧᓂᔨᐤ ᐊᐢᑭ ᐁ ᑎᐯᔨᑕᕽ ᑳ ᑭᐦᒋᔨᓂᐃᐧᐟ ᐁᐊᐧᑳᐧᓂᒪ ᒥᓂᐢᑎᐠ, ᐸᑊᓬᐃᔭᐢ ᐁ ᐃᓯᔨᐦᑳᓱᐟ; ᐁᐊᐧᑯ ᓂ ᑭ ᐱᑐᑲᐃᑯᓈᐣ, ᒥᓇ ᓂᐢᑐ ᑭᓯᑳᐤ ᒥᑐᓂ ᓂ ᑭ ᒥᔪ ᐸᒥᐃᑯᓈᐣ. 8ᑭ ᐊᔨᑭᐣ ᒫᑲ, ᐅᑖᐃᐧᔭ ᐸᑊᓬᐃᔭᐢ ᑭ ᐱᒥᓯᓂᔨᐊᐧ ᐁ ᑭᓯᓱᐋᐧᐢᐱᓀᔨᐟ ᒥᓇ ᐁ ᒥᐦᑯᐋᐧᐢᐱᓀᔨᐟ: ᐁᐊᐧᑯᓂ ᐹᓬ ᑭ ᐱᑐᑲᐁᐧᐤ, ᐁᑯᓯ ᑭ ᐊᔭᒥᐦᐋᐤ, ᒥᓇ ᐁ ᓵᒥᓈᐟ ᑭ ᐃᔨᓂᑲᐦᐁᐤ. 9ᐃᐢᐱ ᒫᑲ ᐅᒪ ᑳ ᐃᑐᒋᑳᑌᐠ, ᑯᑕᑲᐠ ᒥᓇ ᐋᑯᓯᐃᐧᓇ ᑳ ᐋᔮᒋᐠ ᐁᐊᐧᑳᐧᓂᒪ ᒥᓂᐢᑎᑯᕽ ᑭ ᐯ ᐃᑐᐦᑌᐊᐧᐠ, ᐁᑯᓯ ᑭ ᐃᔨᓂᑲᐋᐊᐧᐠ: 10ᐁᐊᐧᑯᓂᐠ ᒥᐦᒉᑕᐧᔭᐠ ᓂ ᑭ ᐋᐧᐸᐦᑕᐦᐃᑯᓈᓇᐠ ᐁ ᑭᐢᑌᔨᒥᑯᔮᐦᑭᐠ; ᐃᐢᐱ ᒫᑲ ᓭᐯᐧᔮᓯᔮᕽ, ᑭ ᐳᓯᑖᐊᐧᐠ ᑕᐦᑐ ᑫᑲᐧᐩ ᐁ ᑭᐧᑕᒫᔮᕽ.
11ᓂᐢᑐ ᐱᓯᒼ ᒫᑲ ᐃᔨᑯᕽ, ᐁᑲᐧ ᑳ ᓯᐯᐧᔮᓯᔮᕽ ᓈᐱᑳᐧᓂᕽ ᐋᓬᐃᐠᓵᐣᑕᕒᐃᔭ ᐅᐦᒋ ᐁᑯᑕ ᒥᓂᐢᑎᑯᕽ ᐁ ᑭ ᐱᐳᓂᓯᒪᑲᕽ, ᓂᓱᑌᐊᐧᐠ ᐁ ᐃᓯ ᑭᐢᑭᓇᐋᐧᒋᑌᐠ. 12ᐁ ᑲᐸᔮᕽ ᒫᑲ ᓯᕒᐊᑯᓯᕽ, ᐁᑯᑕ ᓂᐢᑐ ᑭᓯᑳᐤ ᓂ ᑭ ᐊᔮᓈᐣ. 13ᐁᑯᑕ ᐅᐦᒋ ᒫᑲ ᓂ ᑭ ᐋᐧᔪᓈᓯᓈᐣ ᒥᓇ ᓂ ᑭ ᑕᑳᐧᓯᓈᐣ ᐊᓂᑕ ᕒᐃᒋᔭᒼ: ᐁᑯᓯ ᐯᔭᐠ ᑭᓯᑳᐤ ᐃᔨᑯᕽ ᐁᑳᐧ ᒫᒋ ᓵᐊᐧᓇᐊᐣ, ᐁᑯᓯ ᑭᑖᐧᒼ ᐁ ᑭᓯᑳᐠ ᓂ ᑕᑳᐧᓯᓈᐣ ᐊᓂᑕ ᐳᑎᐋᓬᐊᐩ: 14ᐁᑯᑕ ᒫᑲ ᓂ ᑭ ᒥᐢᑲᐋᐧᓈᓇᐠ ᐅᒋᐋᐧᒥᒫᐊᐧᐠ, ᐁᑯᓯ ᓂ ᑭ ᑭᐦᑭᒥᑯᓈᓇᐠ ᑭᑕ ᐃᐧᒋ ᐊᔮᒫᔮᑭᐠ ᑌᐸᑯᑊ ᑭᓯᑳᐤ: ᐁᑯᓯ ᒫᑲ ᑳ ᑭ ᐊᑎ ᑕᑯᓯᓂᔮᕽ ᐊᓂᑕ ᕒᐅᒥᕽ. 15ᐁᑯᑕ ᒫᑲ ᐅᐦᒋ ᐅᒋᐋᐧᒥᒫᐊᐧᐠ, ᐃᐢᐱ ᐱᔦᐦᑕᐦᑭᐠ ᐁ ᐋᒋᒥᑲᐃᐧᐋᐧᔭᕽ, ᓂ ᑭ ᐯ ᓇᑕᐃᐧ ᓇᑭᐢᑳᑯᓈᓇᐠ ᐃᐢᑯ ᐅᐟ ᐊᑖᑐᐃᐧᑲᒥᑯᕽ ᐊᐹᔭᐢ, ᒥᓇ ᓂᐢᑐ ᒥᒋᓱᐃᐧᑲᒥᑲᐧ: ᐁᐊᐧᑯᓂ ᐃᐢᐱ ᐹᓬ ᐃᐧᔮᐸᒫᐟ, ᑭ ᓇᓈᐢᑯᒣᐤ ᑭᓭᒪᓂᑐᐊᐧ, ᒥᓇ ᑭ ᒪᐢᑲᐁᐧᔨᑕᒼ.
16ᐃᐢᐱ ᒫᑲ ᑳ ᐱᐦᑐᑫᔮᕽ ᐊᓂᑕ ᕒᐅᒼ ᐅᑌᓈᕽ, ᐹᓬ ᑭ ᐃᔨᓇᒪᐋᐧᐤ ᐱᐢᑭᐢ ᑭᑕ ᐊᔮᐟ ᐊᓯᒋ ᐯᔭᐠ ᓯᒫᑲᓂᓴ ᑳ ᑲᓇᐁᐧᔨᒥᑯᐟ.
17ᑭ ᐊᔨᑭᐣ ᒫᑲ, ᓂᐢᑐ ᑭᓯᑳᐤ ᑳ ᒪᔮᐢᑲᒧᐸᔨᐠ, ᑭ ᒫᒪᐃᐧ ᓇᑐᒣᐤ ᐊᓂᐦᐃ ᒍᐊᐧ ᑳ ᓂᑳᓀᔨᑖᑯᓯᔨᐟ; ᐃᐢᐱ ᒫᑲ ᑳ ᐯ ᒫᒪᐃᐧ ᐃᑐᐦᑌᔨᐟ, ᑭ ᐃᑌᐤ, ᓂᔭ, ᓂᒋᐋᐧᒥᑎᐠ, ᐋᑕ ᐁᑳ ᐁ ᑭ ᐅᐦᒋ ᓈᐣᑕᐤ ᐃᓯ ᓇᐢᐹᐨ ᐃᑐᑕᐊᐧᑭᐠ ᐊᔨᓯᔨᓂᐊᐧᐠ, ᐊᐦᐳ ᐅᐟ ᐃᓯᐦᒋᑫᐃᐧᓂᐋᐧᐊᐧ ᑯᑖᐃᐧᓇᐊᐧᐠ, ᐁᔨᐁᐧᕽ ᑭᐸᐦᐅᑐᐃᐧᑲᒥᑯᕽ ᓂ ᑭ ᐃᓯ ᐸᑭᑎᓂᑲᐃᐧᐣ ᒉᕒᐅᓴᓬᐊᒥᕽ ᐅᐦᒋ ᐅ ᒋᐦᒋᐋᐧᕽ ᕒᐅᒪᓇᕽ: 18ᐁᐊᐧᑯᓂᐠ, ᐃᐢᐱ ᒥᑐᓂ ᑳ ᑲᑫᐧᒋᒥᒋᐠ, ᓂ ᑭ ᐃᐧ ᐸᑭᑎᓂᑲᐧᐠ, ᒋᑫᒫ ᐁᑳ ᑫᑲᐧᐩ ᑭᑕ ᐅᐦᒋ ᓂᐸᐃᑲᐃᐧᔮᐣ ᐁ ᑭᑭᐢᑳᑯᔮᐣ. 19#ᐃᓯᐦᒋᑫᐃᐧᓂᐋᐧᐊᐧ 25:11ᒫᑲ ᐃᐢᐱ ᒍᐊᐧᐠ ᓇᐢᐹᐨ ᐁᓯ ᐱᑭᐢᑳᐧᑕᑭᐠ ᓂᑕᐋᐧᐨ ᓂ ᑭ ᓇᑐᑌᐣ ᓯᓴᕒ ᑭᑕ ᐅᔭᓱᐋᐧᓯᐟ; ᓇᒪᐃᐧᔭ ᒫᑲ ᐋᑕᐃᐧᔭ ᑫᑲᐧᐩ ᐁ ᐊᔮᔮᐣ ᓂ ᐃᐧᑕᐢᑭᒫᑲᓇᐠ ᑭᑕ ᐊᑖᒥᒪᑭᐠ. 20ᐁᐊᐧᑯᒪ ᒫᑲ ᐅᐦᒋ ᑳ ᑭ ᓇᑐᒥᑕᑯᐠ ᑭᑕ ᐋᐧᐸᒥᑕᑯᐠ ᒥᓇ ᑭᑕ ᐃᐧᒋ ᐱᑭᐢᑫᐧᒥᑕᑯᐠ: ᒋᑫᒫ ᐅᐟ ᐃᓯ ᐸᑯᓭᔨᒧᐃᐧᐣ ᐃᐢᕒᐁᐃᓬ ᑳ ᐅᐦᒋ ᑕᑯᐱᑎᑯᔮᐣ ᐅᒪ ᐱᐋᐧᐱᐢᐠ. 21ᑭ ᐃᑌᐊᐧᐠ ᒫᑲ, ᓇᒪᐃᐧᔭ ᓄᐦᒋ ᒪᓯᓇᐦᐊᒫᑲᐃᐧᓈᐣ ᒍᑎᔭᐃᕽ ᐅᐦᒋ ᑭᔭ ᑭᑕ ᐊᒋᒥᑲᐃᐧᔭᐣ. ᒥᓇ ᓇᒪᐃᐧᔭ ᐊᐃᐧᔭᐠ ᐅᒋᐋᐧᒥᒫᐊᐧᐠ ᐅᑕ ᐅᐦᒋ ᐯ ᐃᑐᐦᑌᐊᐧᐠ ᑭᔭ ᐁ ᐋᒋᒥᐢᑭᐠ ᐊᐦᐳ ᓈᐣᑕᐤ ᓇᐢᐹᐨ ᐁ ᐃᑎᐢᑭᐠ. 22ᒫᑲ ᑭ ᓄᐦᑌ ᐯᑖᑎᓈᐣ ᑖᓂᓯ ᐁ ᐃᑌᔨᑕᒪᐣ: ᒋᑫᒫ ᐃᐧᔭ ᐅᑭ ᐱᑐᐢ ᑳ ᐃᓯᑖᐧᒋᐠ ᓂ ᑭᐢᑫᔨᑌᓈᐣ ᒥᓯᐁᐧ ᐃᑕ ᐁ ᐋᑕᐁᐧᔨᑕᒧᐃᐧ ᐱᑭᐢᑳᐧᑕᒥᕽ.
23ᐃᐢᐱ ᒫᑲ ᑳ ᐅᔭᑭᑕᒪᐋᐧᒋᐠ ᑭᓯᑳᐤ, ᒥᐦᒉᐟ ᑭ ᐯ ᓈᑎᐠ ᐃᑕ ᑳ ᐃᐧᑭᐟ; ᐁᐊᐧᑯᓂ ᒥᑐᓂ ᑭ ᐊᐧᐃᐧᑕᒪᐁᐧᐤ, ᐁ ᐋᒋᒧᐢᑕᐋᐧᐟ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ, ᒥᓇ ᐁ ᒪᒥᔮᐧᑳᒋ ᐃᐧᐦᑕᒪᐋᐧᐟ ᒋᓴᓴ ᐅᐦᒋ, ᐅᔭᓱᐁᐧᐃᐧᐣ ᒧᓯᐢ ᐁ ᐋᐸᒋᑖᐟ ᒥᓇ ᐅᑭᐢᑭᐁᐧᐦᐃᑫᐊᐧᐠ ᐅ ᒪᓯᓇᐦᐃᑲᓂᐋᐧᐊᐧ, ᐁ ᑫᑭᓭᐹᔮᐠ ᐅᐦᒋ ᐱᔨᐢ ᐁ ᐅᑖᑯᓯᐠ. 24ᐋᑎᐦᐟ ᒫᑲ ᑭ ᑖᐯᐧᑕᒫᐧᐠ ᐊᓂᐦᐃ ᑳ ᐃᐧᒋᑳᑌᔨᑭ, ᐊᑎᐦᐟ ᒫᑲ ᐋᓀᐧᑕᒪᐧᐠ. 25ᐃᐢᐱ ᒫᑲ ᐁᑳ ᑖᐱᐢᑯᐨ ᐁ ᑭ ᐃᑌᔨᑕᐦᑭᐠ, ᑭ ᓯᐯᐧᑌᐊᐧᐠ ᐹᓬ ᒥᓇ ᐯᔭᐠ ᐃᑌᐧᐃᐧᐣ ᑳᐦ ᐃᑖᐟ, ᑲᐧᔭᐢᐠ ᑖᐯᐧ ᑭ ᐃᓯ ᑭᑐᑌᐤ ᑳ ᑲᓈᑎᓯᐟ ᐊᐦᒑᕽ ᑯᑖᐃᐧᓇᐊᐧ ᐊᐩᓵᔭ ᐅᑭᐢᑭᐁᐧᐦᐃᑫᐊᐧ ᐅᐦᒋ, 26#ᐊᐩᓵᔭ 6:9,10ᐁ ᐃᑖᐟ,
ᓈᓯᐠ ᐅᑭ ᐊᔨᓯᔨᓂᐊᐧᐠ, ᒥᓇ ᐃᑌᐧ, ᐁ ᐅ ᐯᑕᒧᐃᐧᓂᔦᐠ ᑭ ᑲ ᐯᐦᑌᓈᐋᐧᐤ, ᒫᑲ ᓇᒪ ᓈᐣᑕᐤ ᐃᓯ ᑭ ᑲ ᓂᓯᑐᑌᓈᐋᐧᐤ; ᒥᓇ ᐁ ᐋᐧᐸᐦᑕᒫᔦᐠ ᑭ ᑲ ᐋᐧᐸᐦᑌᓈᐋᐧᐤ, ᒫᑲ ᓇᒪ ᓈᐣᑕᐤ ᑭ ᑲ ᐃᓯ ᓂᓯᑕᐃᐧᓀᓈᐋᐧᐤ:
27ᒋᑫᒫ ᐅᑭ ᐊᔨᓯᔨᓂᐊᐧᐠ ᐅ ᑌᐦᐃᐋᐧᐤ ᐊᑐᐢᑲᒼ ᐊᑎ ᒪᐢᑲᐋᐧᔨᐊᐧ, ᒥᓇ ᐅᑕᐊᐧᑳᐋᐧᐊᐧ ᓇᒪᐃᐧᔭ ᐊᐧᐃᐧᔭᐃᐧᑕᒧᒪᑲᓂᔨᐊᐧ. ᒥᓇ ᑭ ᐸᓴᑳᐧᐱᐊᐧᐠ; ᑫᑲ ᓈᐣᑕᐤ ᐃᓯ ᑭᑕ ᓂᓯᑕᐃᐧᓇᑭᐠ ᐅᐢᑭᓯᑯᐋᐧᐊᐧ ᐅᐦᒋ, ᒥᓇ ᑭᑕ ᓂᓯᑐᐦᑕᐦᑭᐠ ᐅ ᑌᐦᐃᐋᐧᕽ, ᐁᑯᓯ ᑭᑕ ᑫᐧᐢᑭᒋᐠ ᒥᓇ, ᑭᑕ ᐃᔨᓂᑲᐊᑭᐠ ᒫᑲ.
28ᑭᐢᑫᔨᑕᒧᐠ ᒫᑲ, ᐅᒪ ᐅ ᐱᒫᒋᐦᐃᐁᐧᐃᐧᐣ ᑭᓭᒪᓂᑐ ᐃᓯᑎᓴᐦᐊᒪᐋᐧᐊᐧᐠ ᒉᐣᑕᐃᓬᐊᐠ: ᐁᑯᓯ ᑭᑕ ᐯᑕᒪᐧᐠ ᐃᐧᔭᐋᐧᐤ. 29ᐃᐢᐱ ᒫᑲ ᐅᒪ ᑳ ᐃᑌᐧᐟ, ᒍᐊᐧᐠ ᑭ ᓯᐯᐧᑌᐊᐧᐠ ᒥᐢᑕᐦᐃ ᐃᐧᔭᐋᐧᐤ ᐁ ᐅᑌᐧᐁᐧᒥᑐᒋᐠ.
30ᑭ ᐊᔮᐤ ᒫᑲ ᒥᑐᓂ ᓂᓱ ᐊᐢᑭ ᐃᐧᔭ ᐃᐧᑭᕽ ᐁ ᑭ ᓇᑖᑕᒧᐟ, ᐁᑯᓯ ᑭ ᐱᐦᑐᑲᐦᐁᐤ ᑲᐦᑭᔭᐤ ᑳ ᐯ ᓈᑎᑯᐟ 31ᐁ ᑲᑫᐢᑭᒥᐁᐧᐟ ᑭᓭᒪᓂᑐ ᐅᐟ ᐅᑌᓇᐃᐧᐃᐧᐣ, ᒥᓇ ᐁ ᑭᐢᑭᓄᐦᐊᒫᑫᐟ ᐊᓂᐦᐃ ᑳ ᐃᓯ ᐋᒋᒥᐦᐟ ᑳ ᑎᐯᔨᐦᒋᑫᐟ ᒋᓴᐢ ᙭ ᒥᑐᓂ ᓱᑫᔨᒧᐃᐧᓂᕽ, ᐁᑳ ᐊᐃᐧᔭ ᐁ ᑭᑕᐊᒫᑯᐟ.
موجودہ انتخاب:
ᐃᓯᐦᒋᑫᐃᐧᓂᐋᐧᐊᐧ 28: KKMs
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
This Bible text is a corrected edition of the 1908 Western Cree Bible; it is in the public domain.