Daniel 6
6
Humpinelkai Kua sungah Daniel
1Darius in a kumpi-gam sung uk dingin gamkhen-uk 120 koiha 2 amaute tungah a uksawn dingin mi thum koihin tuate lakah khatna Daniel dingin a lungkim hi. Kumpipa a sup loh nadingin gamkhen-ukte tungah tuate in thuneihna nei uh hi. 3 Tua thu vaihawmpite le gamkhen-ukte lakah Daniel kivatuam diaka, kumpipa in a gambup a uksak dingin a geel hi. 4 Hih thu hangin thuvai-hawmpite le gamkhen-ukte in Daniel mawhsak nadingin a kumpi nasepna ah encikin mawhzon uh hi; ahi hangin bangmah cih thei lo uh hi. Amah muanhuai-in ngentela na lopthop sep lo ahi manin nawngkaisak nading a mu zo kei uh hi. 5 A tawpna ah tua mite in, "Hih Daniel pen a Pasian thukham tawh kisai-in bang khatpeuh hih ding i hi kei ngal leh amah i mawhmat nading thu khatpeuh i mu zo kei ding hi," a ci uh hi.#Da 5:31; Ns 24:13-16
6 Tua ciangin thuvai-hawmpite le gamkhen-ukte kipawlin kumpipa kiangah paikhawm uh a, "Kumpipa Darius aw, na khan sawt hen! 7 Kumpipa aw, nangmah in thukip khat bawlin, tu-a kipan ni sawmthum sungin nang longal mi khatpeuhin pasian khatpeuh ahikeh mi khatpeuh tungah thungen a om leh humpinelkai kua sungah kilawn ta hen, ci lecin a, tua thukiptakin kizui leh ci-in ko kumpipa thuvai-hawmpite, uliante, gamkhen-ukte, thudotte le ukpite khempeuh ka vekun ka thukim uh hi. 8 Kumpipa aw, tu-in tua thukip suaksak inla Media-te le Persia-te upadi a kikhel loh bangin a kikhel loh nadingin lai-in gelh in" a ci uh hi. 9 Tua ciangin Kumpipa Darius in thukip a gelh hi.
10 Daniel in tua thukip kihawmkhia khin zo hi, cih a theih ciangin Jerusalem lam nga-a kongvangneu kihong, ama omna inntung inndei ah a pai hi. A hih ngei bangin ni khatin thumvei khukdinin thu ngen-a a Pasian tungah lungdam a ko hi. 11 Tua ciangin hih mite a honin va pai uh a Daniel in Pasian huh nading a nget laitak a tuak uh hi. 12 Tua ciangin amaute kumpipa kiangah pai-in a thukip suahsak tawh kisai hopih uh a: "Tu-a kipan ni sawmthum sungin mi khatpeuh, nang tung longal pasian khatpeuh ahikeh mi khatpeuh tungah thungen a om leh, "Kumpipa aw, humpinelkai kua sungah kilawn ta hen, cih thukip hawmkhia khin hi lo na hi hiam?" a ci uh hi.
Kumpipa in, "Thukip a kiplai hi - Media-te le Persia-te upadi tawh kizui-in a kikhel kik thei nawn lo ding ahi hi," ci-in a dawng hi.#Est 1:19; Da 3:8-12
13 Tua ciangin amaute in kumpipa kiangah, "Judah salte lakah Daniel kicipa khat in, kumpipa aw, nang le nangma gelhsa thukip a thusim kei hi. Ni khatin thumvei thu ngen lai hi," a ci uh hi. 14 Kumpipa in hih thu a zak ciangin a lungdong mahmah hi; Daniel hutkhiat sawma nitum dongin a hotkhiat theih nading a ngaihsun hi.#Eze 14:14
15 Tua ciangin mite a honin kumpipa kiangah pai uh a, "Kumpipa aw, Mediate le Persia-te upadi tawh kizui-in kumpipa in a suahkhiatsaksa thukip ahikeh thukhote a kikhek theih loh lam phawk in," a ci uh hi.#Est 8:8
16 Tua ciangin kumpipa in thu pia a, amaute in Daniel paipihin humpinelkai kua sungah a lawn uh hi. Kumpipa in Daniel kiangah, "A tawntunga ama na na sep na Pasian in nang hong hukhia ta hen!" a ci hi.#Job 5:19
17 Suangtumpi khat khukin humpi-nelkai kuavang a huk khit uh ciangin Daniel omzia a kikhel theih loh nadingin kumpipa in a seal khetna zungbuh-in ciamteh a, a uliante zungbuh-in zong a ciamteh uh hi. 18 Tua ciangin kumpipa a inn ah ciah a, bangmah ne loin, ama ading gualnopna bangmah a bawlsak kei hi. Tuaci-in a ihmu thei kei hi.#Mt 27:66
19 Khuavak phetin kumpipa tho a, humpinelkai kua ah a paipah vingveng hi. 20 Tua kuavang gei a tun ciangin aw lingsa in, "A nungta Pasian nasempa Daniel aw, a tawntunga ama na na sep na Pasian in humpinelkaite panin hong hukhia hiam?" a ci hi.#Da 3:17
21 Daniel in, "Kumpipa aw, na khan sawt hen! 22 Ka Pasian in a vansawltak hong sawlin amah in humpinelkaite kam a humsak hi. Ama muhna ah mawhpeng ka hi manin hong liamsuah kei uh hi. Tua tham loin kumpipa aw, na mai-ah bangmah ka khial kei hi," a ci hi.#Pn 32:1; Ne 2:3
23 Kumpipa lungdam lua a, humpinelkai kua sung pan Daniel a kaihkhiat nadingun thu a pia hi. Humpinelkai kua sung pan Daniel a kikaihkhiat ciangin a Pasian a muan manin a ci tungah liamma khat beek a kimu kei hi.#Da 3:27
24 Kumpipa thupiakna bangin a maan lopi-a Daniel a hekte a zite le a tate teng uh tawh kipaipih in humpinelkai kua sungah kilawn khawm hi. Amaute humpinelkai kua taw zong tu man loin humpinelkaite in bawh uh a, a guhte khempeuh uh a balzan gawp uh hi.#Tp 19:18-19
25 Tua ciangin Kumpipa Darius in gam sung buppi ah mite, minamte le pau nam tuamtuamte tungah lai paisak a:#Da 3:4
"No tungah daupaina lianpi tung ta hen!#Da 4:1
26 "Thukip khat kong piak inah: Ka kumpi-gam mun tuamtuama mite khempeuh in Daniel Pasian kihta in a zahtak pelmawh ding uh hi.#Ph 5:7
"Ahang in, amah a nungta Pasian hi a,
a om tawntung ahi hi;
a kumpi-gam kisusia ngeilo dinga,
ama ukna a bei ngei kei ding hi.#Jos 2:11; Kil 1:18
27 Amah in hu-in honkhia hi;
vante le leitungah lim le
a lamdangte a bawl hi.#Da 4:3
Amah in humpinelkaite vangliat na panin
Daniel a hukhia hi," ci-in a gelh hi.
28 Tua ciangin Darius le Persia mi Cyrus a#6.28 Ahikeh Darias, tua in Cyprus kumpi sep sung ahi hi. in kumpi a sep hun sungin Daniel a lamzang mahmah hi.
موجودہ انتخاب:
Daniel 6: ZIV
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Copyright 1994 Myanmar Center for World Mission