Lut 3
3
Lutite bali sasada:munoyana sabala Bowa:sadima saoyana gi
1Eta:mi kadepa a pa:na:diyala, Naomite a:negelayana Lutidima, awapa na: a:pe dalagi uwalolamalowa, e a:pe noneyada gwama a:pe genama bapila awapale elamalale. 2A: gi sa:lele iwalelamalelo, a:na:pi ma:ma dalagi Bowa:s, e obape okona atoda oko a:na:munoyana, oba enoba sa:da gi menaginapa dalagi. Enobala a: ma:ma gilala enama. Bowa:s ama debela bali sasada:mina sabama welamalelo. 3Enobala a: wi talote sa:lenapa ipowada:napa lopalale wade ete, sa:sa:lena kakana lopala kakaminamalelo. Amale a: obate bali sasada:minanona sabama welamalelo, ameta a: ege Bowa:sate bayata: wita: pa: nanapa tepala sela oba dima gilala lalamalelo. 4A:pite a: obate tenelamalelona saba sa:lele tilamalelo, wapikile obate teneladele inigwima welamalelona tepala a: wete obape a:wa lopala pakamite obape a:i ekakawa palama tenelamalelo. Amale obate powa gi a: anamalelona a:ma enoba gi a: a:na:minamalelo.
5Lut ameta wisa eladele a:negelayana, sa:lebega, na: e ladolona gi waelabega a:na:da:munamalowa. 6Enobala Lut Bowa:sate bali sasada:munoyana sabama weleyana, amale obate obape apilate ladoloyana gi enoba a:na:pi a:na:da:mina eyana. 7Amale Bowa:sate bayata: wita: nana gi guyana tepala obate awapa ete sa:kelaloyana. A:pite oba balite dowatiliyana sabama wete a:mama teneyana. Lut amale sesepulale patila welabega ete Bowa:sape a:wa lopala pakamite obape a:i ekakawa palama teneyana. 8A:pite isa tepa bapila Bowa:sate salete patadele susa:gi obape a:i ekakawa palala tenelaleyala tilite emosa:miyana.
9A:pite Bowa:s a:negelayana, a: powateya.
Lut ameta a:negelayana Bowa:sadima, Apeyanapa, na: enoba Lut. Awapa a: na: mamana:minadele sa:lele tinonamalelo, gi ase a: enoba ne lope awayamana dalagipe auwanapa lumagi eta. Awapa a: na: susa:gima gwalina:malelo.
10A:pite Bowa:sate Lutidima a:negelayana, LOD a:da elamalelo. E a:pe apila Naomidima a:na:da:munoyana gi enoba awapa ameta e amapulala a:pe udaga iwaleladele a:na:minamalale iwiminanona gi enoba sa:lepula balama. A: apela kanika:napa dalagidima a:na:pi lopalada:na o pa: lopaladanapadima welanapa awapama ewena, ameta a: ma:ma gi pa:pa a:na:miwina. 11Enobala Lut a: ege gi iwaleda:bega elamalelo. Ena: dima ladolowena gi waelabega na: a:na:da:munamalowa. Ase ma:ma baigana luma waelabega iyata: itawada: a: enoba sa:lenapa susa:gi. 12#Lut 2:20A:ma gi enoba gibalama, na: enoba auwasegenapa lumagite a: amowalowa. Ameta eta auwabapinapa dalagi a:meta elelo, pa: na:. 13A: ama isa ma:mala tenelamalelo, a:pite geda: ibasegela na: a: oba dima gwalite welamalowa obate a: gwalilamaleloga. Powa tepala obate a: pa:pa iwiminamalelona awapa ameta ne a: gwalilamalowa. Enobala na: kanika:walona LODope gagile gibalamale lalelowa na: a: sa:lele amowalamalowa. Enobala a: ma:mala tenelelola kadepa pulamalelo.
14Enobala Lut Bowa:sape a:i ekakawa palala tenelalote kadepa ma:ta pulaleyala lumate oba tila gila lope patayana, gi ase Bowa:s iyata: pa:pa iwimunoyana eta:mi lumate Lutite obada eloyana gi itawa eda:mada:le. Ameta Bowa:sate eta sosawe gi pa:pa a:na:miyana Lutidima.
15A:pite Bowa:s Lut anayana, a:pe sidinapa kaka gulamina lopala kwamite a:ima alapo. Amale Lut a:ma gi a:na:miyala Bowa:sate 20 kilogla:m bali a:ma gobama kola:mite oba amowayana obape paloma mima: gima. Amale Lut a:ma bali a:iwate gwama weleyana obape genamama.
16Lut gwama saoyana tepala obape apilate oba dima a:negelayana, na:pe aminagi a: dima gi a:ta:pi saoda:ediwinaya. A:pite Lut asemite Bowa:sate oba dima a:na:da:munoyana gi waelabega Naomidima ladoloyana. 17Amale Lut a:negelayana, Bowa:s na: nanawena oba pa:pa iwimunowena ne lopala bini a: pa:te a: dima saolamalale, enobala obana: dima ma:mai bali napunowena.
18A:pite Naomi gwama Lutidima a:negelayana, a: amapula gite a:ta:pi saola elamalelona gima enamadolamalelo. Gi ase Bowa:s ama kadepala pa:pa a:me eladele gi waelabega sa:leda:munamalelo.
موجودہ انتخاب:
Lut 3: GBOTP
سرخی
شئیر
کاپی
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
Gogodala Bible Translation Project © Bible Society of Papua New Guinea, 2016.