Zaburey 143
143
Abadantaa, masi ciiti ay bande
1Woo ti Dawda zabur foo.
Abadantaa, haŋajer ay ŋaarayroo se,
maa ay suurandiyaney se.
Tuuru ya ne ni laadirtaraa nda ni šerretaraa ra.
2Masi ciiti agay, ni tamoo bande,
zama baahunante kul si šerre ni jine.
3Iberoo goo ma zuru ay hundoo bande,
a goo mʼay hunaroo motti laboo ra,
a gʼay gorandi nongu kubantey ra,
sanda borey kaŋ buu za gayyan.
4Ay binoo hun,
ay binoo hasara ay gundoo ra.
5Ay ga honga cee jinaa waatey,
ay ga ni goyey kul har,
ay ga miile ni kabe teegoyey ga.
6Ay gʼay kabey šerre ni here,
ay goo ni jine sanda labu koga. Kay-kayna
7Abadantaa, ay zaabi tanba!
Ay binoo hun.
Masi ni ndumoo tugu ya ne,
nda manʼti woo, ay ga hima nda borey kaŋ ga zunbu saaraa guusoo ra.
8Naŋ ya maa za subbaahoo ra ni borohennataraa.
Zama ay nʼay naanaa daŋ ni ra.
Fondaa cebe ya ne kaŋ ra ay ga hima ka dira.
Zama ay gʼay binoo bere ni here.
9Abadantaa, ay kaa agay iberey ra!
Ay si tugu kala ni jere.
10Ay dendenandi ya ni ibaayoo tee,
zama ni ti ay Koyoo.
Yala ni Hundi hennaa mʼay gongu labu kanante ga!
11Abadantaa, ay hunandi ni maaɲoo sabbu se!
Ni šerretaraa ra, ay hundoo kaa binemarayyanoo ra.
12Ni borohennataraa ra, nʼga agay iberey benandi,
nʼgʼay hundoo torrokey kul derandi,
zama ay manʼti kala ni tamoo.
موجودہ انتخاب:
Zaburey 143: ses
سرخی
کاپی
موازنہ
شئیر
کیا آپ جاہتے ہیں کہ آپ کی سرکیاں آپ کی devices پر محفوظ ہوں؟ Sign up or sign in
© BFP Velberter Mission and Wycliffe Bible Translators, Inc.