Mateus 18
18
Yesus Niakaan maktuir sia nusu lia, see mak boot kaliuk
(Markus 9:33-37; Lukas 9:46-48)
1Baa oras nia, Yesus Niakaan maktuir sia mai nusu baa Nia naꞌak, “Ama! Nosi Naꞌi Maromak eman hotu-hotu, see mak boot kaliuk?”#Lukas 22:24
2Rona nunia, Yesus bolu nola lawarik oan ida, hotu natuur baa siakaan klaran. 3Hotu Nia dale naꞌak, “Rona, tan Haꞌukaan dalen neꞌe, tebes no loos! Ema mak nakara dadi baa Naꞌi Maromak eman, nia musti filas neon no laran, nebee dadi hanesan lawarik oan mak neon loos.#Markus 10:15; Lukas 18:17 4Ema mak naraik aan hanesan lawarik oan neꞌe, ema nia mak boot kaliuk iha Naꞌi Maromak oin. 5Kalo noo ema simu ema kiꞌik tan fiar baa Haꞌu, hanesan lawarik oan neꞌe, neꞌe naꞌak, ema nia moos simu Haꞌu.”
Yesus katak nosi lia ema mak sasuꞌat ema seluk toꞌo nalo sala
(Markus 9:42-48; Lukas 17:1-2)
6Hotu Yesus katak tenik baa sia naꞌak, “Kalo ema sasuꞌat ema kiꞌik ida nebee nia tuir dalan sala toꞌo la fiar tenik baa Haꞌu, ema nia musti sintidu! Diꞌak liu kesi fatuk boot ida#18:6Hakerek Moon lia Yunani naꞌak ‘fatuk laledun’. Uluk ema Yahudi sia ledu hare gandum nodi fatuk laledun mak boot liu ema. Sia feur fatuk nia nodi kuda keledai. baa niakaan kakorok, hodi baa tonan mout baa tasi laran. 7Raiklaran neꞌe nanis fatin mak nakonu dinu, tan noo lia waꞌin mak nalo ema toꞌo monu baa sala. Mais ema mak netan dinu kaliuk, neꞌe mak, ema mak naseꞌi dalan aat toꞌo ema seluk nalo sala.
8Kalo malo sala modi okaan liman, lale, okaan ain, taa kotu baa dei! Diꞌak liu o tama laleꞌan modi liman sorin dei, lale, ain sorin dei, nosi sia soe o baa haꞌi naraka modi liman rua no ain rua.#Mateus 5:30 9Kalo o malo sala modi matan, sukit sai dei! Diꞌak liu o tama laleꞌan modi matan sorin dei, nosi sia soe o baa haꞌi naraka modi matan rua.”#Mateus 5:29
Yesus foo lia hatetek nosi bibi malae mak lakon
(Lukas 15:3-7)
10Hotu Yesus dale tenik naꞌak, “Sintidu! Keta toꞌo emi titu haraik ema kiꞌik hanesan lawarik neꞌe sia, tan Naꞌi Maromak Niakaan makbukar laleꞌan daka sia. Baa oras nabee dei, makbukar laleꞌan nia sia bele tama baa Naꞌi Maromak atu nasara siakaan lia.
11-13Rona mai. Noo ema makbalin ida, niakaan bibi malae matan atus ida. Baa loron ida, bibi malae matan ida lakon. Emi haneo makbalin nia musti nalo saa? Nia nanis laꞌo nela niakaan bibi malae matan siwi nulu resin siwi nia iha foho leten, baa buka bibi malae matan ida mak lakon nia.#Lukas 19:10
Netan nikar tiꞌan, makbalin nia neon diꞌak tebes naree bibi malae matan ida mak lakon nia, liu nosi nia naree niakaan bibi malae matan siwi nulu resin siwi mak la lakon. [Haꞌu neꞌe, Ema Raiklaran Isin nosi laleꞌan. Haꞌu kmai atu sori ema mak lakon nosi dalan moris loos.]#18:11-13Hakerek lia Yunani mak tuan kaliuk la noo lia fuan mak tau iha lalutuk laran neꞌe. 14Masik mak lakon nia, lawarik kiꞌik oan ida dei moos, Haꞌukaan Ama iha laleꞌan la nakara.”
Yesus nalore dalan nebee ita bele dame hikar ho ema mak nalo sala baa ita
15Hotu Yesus dale tenik naꞌak, “Kalo okaan maluk nalo sala baa o, o duꞌuk mak musti baa masoru nia. Emi naꞌin rua mesan tiꞌan lai, foin katak niakaan salan. Kalo nia rona o, emi dame malu tiꞌan.#Lukas 17:3 16Mais, kalo la noꞌuk rona, baa mola mamaluk ida-rua seluk. Hotu baa bele-bele hasoru ema nia, nebee dale tenik ho nia. Hakerek Moon naꞌak, ‘Iha lia ida, musti noo ema naꞌin rua-tolu mak naree nodi matan duꞌuk, foin bele simu siakaan dale.’#Hanoin Hikar Dalan Moris 19:15 17Mais, kalo ema nia sei la noꞌuk rona emi, baa katak baa fukun sarani sia. Kalo nia la noꞌuk rona tenik, filak nia baa ema mak la natene Naꞌi Maromak. Kalo lale, filak nia baa ema matak, hanesan ema maksisi bea sia.
18Haꞌukaan dalen neꞌe, tebes no loos! Saa mak emi hakahik iha raiklaran, Naꞌi Maromak nakahik tiꞌan iha laleꞌan. Saa mak emi habusik iha raiklaran, Naꞌi Maromak nabusik tiꞌan iha laleꞌan.#Mateus 16:19; Yohanis 20:23
19Haꞌu kdale tebes tenik kaꞌak, masik emi naꞌin rua dei hamulak hodi neon ida, Haꞌukaan Ama iha laleꞌan atu foo saa mak emi husu. 20Kalo ema libur malu tan Haꞌu, masik naꞌin rua-tolu dei moos, Haꞌu kamutuk ko sia iha nia.”
Yesus foo lia hatetek nosi ema mak la foo pardua baa belun
21Yesus dale notu nunia, Petrus mai nusu baa Nia naꞌak, “Ama Boot, haꞌu atu kusu oan ida. Kalo haꞌukaan belun nalo sala rua-ruan baa haꞌu, haꞌu kmusti foo pardua baa nia isin hira? Toꞌo isin hitu ka?”
22Yesus nataa naꞌak, “Lale! Musti foo pardua baa belun isin hitu dala hitu nulu#18:22Hakerek Moon lia Yunani lia isin iha neꞌe bele naꞌak, “isin hitu dala hitu nulu”. No bele naꞌak, ‘isin hitu nulu resin hitu”. toꞌo la bele sura hola.#Lukas 17:3-4 23Tan Naꞌi Maromak moos atu sura nunia, hanesan naꞌin iha lia hatetek neꞌe. Rona mai! Noo naꞌin ida mak nakara sura tusan nosi eman serwisu sia. 24Nia naruka ema baa bolu nola ema serwisu ida mak natusan maliun-maliun baa nia.#18:24Niakaan tusan nia, Hakerek Moon lia Yunani naꞌak “10.000 τάλαντον (talanton)”. Talanton ida, bele selu ema ida kanseran tinan sanulu resin lima toꞌo tinan rua nulu laran. 25Mais nia la bele selu nola tusan nia. Rona nola nunia, naꞌin naruka naꞌak, ‘Baa faꞌan ema neꞌe no feen-oan sia hotu-hotu, dadi baa ata. Hotu faꞌan niakaan naha sia hotu-hotu, hodi selu niakaan tusan.’
26Rona nola nunia, ema serwisu nia nakniꞌa iha naꞌin oin nodi nakroꞌan naꞌak, ‘Adeei ama! Tulun foo leet oan ida baa haꞌu lai, foin haꞌu kselu moos haꞌukaan tusan.’ 27Rona nola nunia, naꞌin neon monu. Nia moos noꞌas mohu tusan nia sia hotu-hotu, hotu nabusik ema serwisu nia.
28Mais baa oras ema serwisu nia sai, nia nasoru nola belun ida mak natusan oan ida baa nia. Nia kohi nola kedan belun nia, misak baa kakorok nodi nakbehek naꞌak, ‘Hoi! Selu kedan okaan tusan oras neꞌe ona!’#18:28Niakaan tusan nia, Hakerek Moon lia Yunani naꞌak, “100 δηνάριον (deinarion)”. Deinarion ida, bele selu ema ida kanseran loron ida laran. Kalo hanesa tusan neꞌe no tusan uluk, tusan neꞌe la folin.
29Rona nola nunia, belun nia moos nakniꞌa nodi nakroꞌan naꞌak, ‘Adeei belu! Tulun foo leet oan ida baa haꞌu lai, foin haꞌu kselu moos haꞌukaan tusan baa o.’
30Mais ema nia naꞌak, ‘La bele! Musti selu kedan!’ Hotu nia natama belun baa bui, toꞌo belun selu mohu niakaan tusan. 31Baa oras naꞌin eman seluk sia rona saa mak dadi tiꞌan nia, sia noran susar. Hotu sia baa nasara kedan baa naꞌin. 32Rona nola nunia, naꞌin bolu nola ema mak la natene aan nia. Nia deꞌan naꞌak, ‘Hoi ema aat! O musu haꞌu nebee kadomi o, hotu haꞌu koꞌas mohu okaan tusan hotu-hotu. 33Mais, tan saa o la madomi okaan belun hanesan haꞌu kadomi o nia?’ 34Naꞌin krakat toꞌo naruka dada hatama ema nia baa bui, nebee ema tonan naloot toꞌo nia selu mohu niakaan tusan sia hotu-hotu.”
35Hotu Yesus taka lia hatetek nia nodi katak naꞌak, “Haꞌukaan Ama iha laleꞌan moos atu sura nunia, kalo emi la haluꞌa lakon emikaan belun salan.”
موجودہ انتخاب:
Mateus 18: tetNTPO
سرخی
شئیر
کاپی
Want to have your highlights saved across all your devices? Sign up or sign in
© 2013, Wycliffe Bible Translators, Inc. All rights reserved.